Examinado o expediente instruído por instancia da empresa Unión Fenosa Distribución, S.A., con enderezo para os efectos de notificación na Batundeira, 2, Velle (Ourense), aprécianse os seguintes

Antecedentes de feito.

Primeiro. Con data do 20 de xullo de 2009, a citada empresa solicita a autorización administrativa, a aprobación do proxecto de execución e a declaración de utilidade pública, en concreto, para a instalación eléctrica L.M.T., C.T. e R.B.T. Segán-San Vitoiro de Ribas de Miño-2.ª fase, no concello do Saviñao, presentando o preceptivo proxecto das instalacións a que fai referencia o Real decreto 1955/2000, do 1 de decembro (BOE núm. 310, do 27 de decembro), que regula as actividades de transporte, distribución, comercialización, subministración e procedementos de autorización de instalacións de enerxía eléctrica e xuntando a relación concreta e individualizada de bens e dereitos afectados pola instalación que determina o artigo 53 da Lei 54/1997, do 27 de novembro, do sector eléctrico (BOE núm. 285, do 28 de novembro) e o artigo 143 do Real decreto 1955/2000, antes citado, que a desenvolve.

Segundo. Con data do 26 de decembro de 2011 e debido ao cambio de sección do condutor da liña de media tensión proxectada CHA813 entre os apoios n.º 0 e n.º 20, que pasa de LA-56 a LA-110, e dado que esta liña se empregará para o enlace coa liña CH805, a empresa beneficiaria presenta a modificación n.º 1 ao proxecto L.M.T., C.T. e R.B.T. Segán-San Vitoiro de Ribas de Miño-2.ª fase.

Terceiro. O proxecto someteuse a información pública para os efectos previstos na Lei 54/1997, do 27 de novembro, do sector eléctrico, e no Real decreto 1955/2000, do 1 de decembro, mediante resolución desta xefatura territorial do 1 de febreiro de 2012. Esta resolución foi publicada no xornal El Progreso de Lugo do 10 de febreiro de 2012, no Boletín Oficial da provincia de Lugo do 17 de febreiro e no Diario Oficial de Galicia do 23 de febreiro, no taboleiro de anuncios da citada xefatura territorial e no taboleiro de anuncios do Concello do Saviñao. Con esta resolución inseríase a relación de bens e dereitos afectados.

Así mesmo, practicouse notificación individual aos interesados incluídos na referida relación de bens e dereitos afectados.

Cuarto. Enviáronselles separatas relativas ao proxecto aos diferentes organismos afectados e cumpríronse os trámites establecidos no artigo 131 do Real decreto 1955/2000, do 1 de decembro.

Quinto. Durante o trámite de información pública presentáronse as seguintes alegacións:

1. José Armando Fernández Rodríguez, que figura na relación de bens e dereitos afectados que foi publicada e notificada individualmente, como titular proposto para o predio n.º 29/1 (polígono 28-parcela 197), manifesta mediante escrito recibido no Rexistro do Portelo Único do Concello do Saviñao o 17 de febreiro de 2012 que non é súa, senón que é a estremeira (polígono 28-parcela 198).

2. Julio López Rodríguez, que figura na relación de bens e dereitos afectados que foi publicada e notificada individualmente, como titular proposto para o predio n.º 29 (polígono 28-parcela 196), manifesta mediante escrito recibido no Rexistro do Portelo Único do Concello do Saviñao o 20 de febreiro de 2012 que non é súa, senón que é a estremeira (polígono 28-parcela 197).

Sexto. O persoal dos servizos técnicos desta xefatura territorial emitiu informe favorable sobre a solicitude obxecto deste expediente, de acordo co disposto na Lei 54/1997, do 27 de novembro, do sector eléctrico, e o disposto no Real decreto 1955/2000, do 1 de decembro. Igualmente, unha vez revisado sobre o terreo o trazado da liña eléctrica proxectada, os referidos servizos técnicos informan de que non se dá ningunha das limitacións para a imposición da servidume de paso de enerxía eléctrica a que se refire o artigo 161 do Real decreto 1955/2000, en relación co artigo 57 da Lei 54/1997, sobre os predios incluídos na relación de bens e dereitos que foi obxecto de información pública e sobre os cales a empresa beneficiaria non chegou a un acordo amigable cos seus propietarios.

A estes feitos son de aplicación os seguintes

Fundamentos de dereito.

Primeiro. A Xefatura Territorial de Lugo da Consellería de Economía e Industria é competente para resolver este expediente con fundamento no Estatuto de autonomía de Galicia; no Decreto 36/2001, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia, en relación co Real decreto 1955/2000, do 1 de decembro, e a Lei 54/1997, do 27 de novembro, do sector eléctrico; no Decreto 245/2009, do 30 de abril, polo que se regulan as delegacións territoriais da Xunta de Galicia e no Decreto 8/2011, do 28 de xaneiro, polo que se fixa a estrutura orgánica das consellerías da Xunta de Galicia (que modifica o anterior).

Segundo. No expediente cumpríronse os trámites sinalados no artigo 53 da citada Lei 54/1997, do 27 de novembro, e os regulamentarios ordenados nos capítulos II e V do título VII do Real decreto 1955/2000, do 1 de decembro, que regula o procedemento de autorización de instalacións de enerxía eléctrica.

Terceiro. Á vista das alegacións presentadas, da contestación que deu a elas a empresa promotora e do resto da documentación que figura no expediente, considérase que aquelas non impiden continuar coa tramitación do expediente polas seguintes razóns:

As alegacións son aceptadas pola empresa beneficiaria do expediente mediante escritos rexistrados os días 2 e 9 de marzo de 2012, xunto aos cales achega unha relación de bens e dereitos corrixida.

Cuarto. Sen prexuízo do anterior, cómpre ter en conta que consonte o artigo 151 do citado Real decreto 1955/2000, do 1 de decembro, en calquera momento a empresa beneficiaria e os titulares dos necesarios bens e dereitos poden convir un mutuo acordo e causar a correspondente conclusión do expediente expropiatorio.

De acordo co exposto e en virtude das competencias que ten atribuídas, esta xefatura territorial

RESOLVE:

Primeiro. Autorizar a Unión Fenosa Distribución, S.A. o establecemento da instalación eléctrica denominada modificación n.º 1 L.M.T., C.T. e R.B.T. Segán-San Vitoiro de Ribas de Miño-2.ª fase, no concello do Saviñao, coas seguintes características técnicas principais:

– Liña de media tensión aérea a 20 kV, cunha lonxitude de 2.207 m, con orixe no apoio de liña existente (n.º 0), condutor LA-110 e final no apoio n.º 20, sobre apoios de formigón (10) e metálicos (10).

– Liña de media tensión aérea a 20 kV, cunha lonxitude de 95 m, condutor LA-56, con orixe no apoio n.º 20 e final no C.T. intemperie existente en Piñeiro, 1 apoio metálico.

– Liña de media tensión aérea a 20 kV, cunha lonxitude de 302 m, con orixe no apoio n.º 6 proxectado, condutor LA-56 e final no C.T. intemperie proxectado en San Vitoiro de Ribas de Miño, sobre apoios de formigón.

– Liña de media tensión aérea a 20 kV, cunha lonxitude de 139 m, con orixe no apoio n.º 10 proxectado, condutor LA-56 e final no C.T. intemperie proxectado en Taíz, sobre apoios de formigón.

– C.T. intemperie, 100 kVA, 20.000/400/230 V, en San Vitoiro.

– C.T. intemperie, 50 kVA, 20.000/400/230 V, en Taíz.

– R.B.T. aérea de 1.570 m, condutor R.Z., sobre apoios de formigón, con orixe no C.T. San Vitoiro proxectado.

– R.B.T. aérea de 1.519 m, condutor R.Z., sobre apoios de hormigón, con orixe no C.T. Taíz proxectado.

Segundo. Aprobar o proxecto de execución da instalación eléctrica modificación n.º 1 L.M.T., C.T. e R.B.T. Segán-San Vitoiro de Ribas de Miño-2.ª fase visado o día 12 de decembro de 2012 co número CO112865 polo ICOIIG da Coruña, e asinado polo enxeñeiro industrial Darío Sánchez Maeso, colexiado n.º 2564.

Terceiro. Declarar a utilidade pública, en concreto, da instalación eléctrica obxecto do presente expediente, o que implica a necesidade de ocupación dos bens ou da adquisición dos dereitos afectados e a urxente ocupación para os efectos do artigo 52 da Lei de expropiación forzosa. Por isto, en cumprimento do disposto neste artigo, acórdase que o representante da Administración dea comezo, na data e na hora que a cada interesado se lle notificará individualmente, ao levantamento das actas previas á ocupación dos predios contidos na relación de bens e dereitos publicada no xornal El Progreso de Lugo do 10 de febreiro de 2012, no Boletín Oficial da provincia de Lugo do 17 de febreiro e no Diario Oficial de Galicia do 23 de febreiro, expostas no taboleiro de anuncios desta xefatura territorial e no taboleiro de anuncios do concello do Saviñao. Así mesmo, faise constar que ata o momento do levantamento das actas previas poderanse formular as alegacións que se consideren oportunas, para os efectos de rectificar posibles erros na relación de bens afectados que foi obxecto de publicación nos medios e nas datas anteriormente referidos. Estas alegacións deberanse presentar por escrito perante esta Xefatura Territorial de Economía e Industria (edificio administrativo da Xunta de Galicia en Lugo, rolda da Muralla, 70, 27071 Lugo).

Todo isto de acordo coas condicións seguintes:

Primeira. As instalacións que se autorizan terán que realizarse de acordo coas especificacións e cos planos que figuran no proxecto modificación n.º 1 L.M.T., C.T. e R.B.T. Segán-San Vitoiro de Ribas de Miño-2.ª fase presentado pola empresa Unión Fenosa Distribución, S.A.

Segunda. O peticionario asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade con carácter permanente.

Terceira. Deberase cumprir canto establece a lexislación técnica de liñas eléctricas de alta tensión e as súas instrucións técnicas complementarias, de acordo co Real decreto 223/2008, do 15 de febreiro, así como, de ser o caso, a lexislación aplicable ás instalacións de baixa tensión e as súas instrucións técnicas complementarias de acordo co Real decreto 842/2002, do 2 de agosto, ademais do resto de normativa e directrices vixentes que sexan de aplicación.

Cuarta. Para introducir modificacións nas instalacións que afecten datos básicos do proxecto será necesaria autorización previa desta xefatura territorial.

Quinta. O prazo para a execución das instalacións que se autorizan será de doce meses, contados a partir da data de notificación/publicación desta resolución.

Sexta. A Administración reserva para si o dereito de deixar sen efecto esta autorización por calquera das causas establecidas no artigo 34 do Decreto 1775/1967, do 22 de xullo, por incumprimento das condicións impostas ou por calquera outra causa excepcional que o xustifique.

Sétima. Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial o outros necesarios para a realización das obras das instalacións autorizadas.

A publicación desta resolución se realiza tamén para os efectos previstos no artigo 59.4 da Lei 30/1992, do 26 de novembro, de réxime xurídico das administracións públicas e do procedemento administrativo común (modificada pola Lei 4/1999, do 13 de xaneiro) cando os titulares dos predios propostos sexan descoñecidos, non se saiba o lugar de notificación, ou ben, cando tentada a notificación, non se puidese realizar e, así, dirixir ao Ministerio Fiscal as dilixencias que se produzan de conformidade co establecido no artigo 5 da Lei de expropiación forzosa de 1954.

Contra esta resolución, que non é definitiva en vía administrativa, cabe interpoñer recurso de alzada ante o conselleiro de Economía e Industria no prazo dun mes contado a partir do día seguinte ao da súa notificación/publicación nos termos establecidos nos artigos 107, 110, 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común (modificada pola Lei 4/1999, do 13 de xaneiro) sen prexuízo de que os interesados poidan interpoñer calquera outro recurso que consideren pertinente.

Lugo, 18 de abril de 2012.

José Manuel Vázquez Leirado
Xefe territorial de Lugo