O Decreto 13/2012, do 4 de xaneiro, polo que se fixa a estrutura orgánica das consellerías da Xunta de Galicia, establece no seu artigo 5 a estrutura da Consellería de Cultura, Educación e Ordenación Universitaria.
O artigo 43.3 da Lei 1/1983, do 22 de febreiro, de normas reguladoras da Xunta e da súa Presidencia, establece que os titulares das consellerías poderán delegar competencias administrativas nos seus órganos inmediatamente inferiores, cando as necesidades de funcionamento así o aconsellen. O réxime xurídico da delegación de competencias aparece regulado no artigo 44 da citada Lei 1/1983, así como no artigo 6 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
A presente orde pretende acadar unha maior eficacia na tramitación e resolución dos asuntos atribuídos a esta consellería, de acordo co actual escenario de xestión ao que se enfrontan os diferentes órganos que a integran. En materia de axudas e subvencións públicas, a experiencia acadada aconsella non realizar unha delegación de competencias xenérica para todos os procedementos. Por este motivo, a disposición adicional prevé que a persoa titular da consellería poida delegar a competencia para resolver o procedemento na propia orde de convocatoria, nos casos en que se estime oportuno.
En consecuencia, en virtude das facultades que me confire o artigo 34 da Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo 1.
Deléganse na persoa titular da Secretaría Xeral Técnica as seguintes atribucións:
a) Resolver os recursos administrativos que lle correspondan á persoa titular da consellería, nos casos en que non estean expresamente delegados noutros órganos, así como as reclamacións en materia de responsabilidade patrimonial.
b) Autorizar e dispoñer os gastos xerais dos servizos da consellería ata o límite dos créditos autorizados e non reservados á aprobación do Consello da Xunta de Galicia, así como recoñecer as obrigas de gasto e propoñer os pagamentos, agás o disposto nos artigos 2.a) e 3.a) da presente orde.
c) As funcións que como órgano de contratación lle corresponden á persoa titular da consellería de acordo coa lexislación vixente.
d) As competencias que lle correspondan á persoa titular da consellería en materia de persoal, no que se refire ao persoal dependente dos órganos da extinta Consellería de Cultura e Turismo que foron adscritos á nova consellería.
e) Designar as comisións de servizos con dereito a indemnización, previstas no Decreto 144/2001, do 7 de xuño, sobre indemnizacións por razón do servizo ao persoal con destino na Administración autonómica de Galicia, agás o disposto nos artigos 2.b, 3.b) e 7.c) da presente orde.
f) Autorizar a asistencia do persoal adscrito a esta Secretaría Xeral Técnica a cursos e actividades de formación e perfeccionamento.
g) Dispoñer canto concirne ao réxime interno da consellería cando non sexa competencia exclusiva da persoa titular da consellería ou estea atribuída ou delegada noutros órganos.
h) As funcións que derivan do exercicio do protectorado das fundacións de interese galego adscritas a esta consellería.
Artigo 2.
Deléganse na persoa titular da Secretaría Xeral de Cultura as seguintes atribucións:
a) Autorizar e dispoñer os gastos ata o límite dos créditos autorizados e non reservados á aprobación do Consello da Xunta de Galicia, así como recoñecer as obrigas de gasto e propoñer os pagamentos, respecto dos créditos asignados a esta secretaría xeral nas correspondentes leis de orzamentos xerais.
b) Designar as comisións de servizos con dereito a indemnización, previstas no Decreto 144/2001, do 7 de xuño, do persoal adscrito a esta secretaría xeral, así como autorizar a súa asistencia a cursos e actividades de formación e perfeccionamento.
c) Resolver os recursos de reposición que se interpoñan contra os actos administrativos ditados no exercicio das facultades delegadas.
Artigo 3.
Deléganse na persoa titular da Secretaría Xeral de Política Lingüística as seguintes atribucións:
a) Autorizar e dispoñer os gastos ata o límite dos créditos autorizados e non reservados á aprobación do Consello da Xunta de Galicia, así como recoñecer as obrigas de gasto e propoñer os pagamentos, respecto dos créditos asignados a esta secretaría xeral nas correspondentes leis de orzamentos xerais.
b) Designar as comisións de servizos con dereito a indemnización, previstas no Decreto 144/2001, do 7 de xuño, do persoal adscrito a esta secretaría xeral, así como autorizar a súa asistencia a cursos e actividades de formación e perfeccionamento.
c) Resolver os recursos de reposición que se interpoñan contra os actos administrativos ditados no exercicio das facultades delegadas.
Artigo 4.
Deléganse na persoa titular da Secretaría Xeral de Universidades as seguintes atribucións:
a) Autorizar e dispoñer os gastos ata o límite dos créditos autorizados e non reservados á aprobación do Consello da Xunta de Galicia, así como recoñecer as obrigas de gasto e propoñer os pagamentos, respecto dos créditos asignados a esta secretaría xeral nas correspondentes leis de orzamentos xerais.
b) Autorizar a asistencia do persoal adscrito a esta secretaría xeral a cursos e actividades de formación e perfeccionamento.
c) Resolver os recursos de reposición que se interpoñan contra os actos administrativos ditados no exercicio das facultades delegadas.
Artigo 5.
Deléganse na persoa titular da Dirección Xeral de Educación, Formación Profesional e Innovación Educativa, as seguintes atribucións:
a) Resolver os recursos de reposición que se interpoñan contra os actos administrativos ditados no exercicio das facultades delegadas.
b) Autorizar a asistencia do persoal adscrito a esta dirección xeral a cursos e actividades de formación e perfeccionamento.
Artigo 6.
Deléganse na persoa titular da Dirección Xeral de Centros e Recursos Humanos as seguintes atribucións:
a) As competencias que lle correspondan á persoa titular da consellería en materia de persoal, agás aquelas que se deleguen expresamente noutros órganos.
b) Resolver os recursos de reposición que se interpoñan contra os actos administrativos ditados no exercicio das facultades delegadas.
c) Asinar os concertos educativos aprobados pola consellería.
d) As funcións relativas á homologación e validación de títulos e estudos estranxeiros en ensinanzas non universitarias, de conformidade co Decreto 204/2008, do 28 de agosto.
Artigo 7.
Deléganse nas persoas titulares das xefaturas territoriais desta consellería as seguintes atribucións:
a) Formalizar os contratos do profesorado de relixión e anexos aos contratos vixentes, os de carácter temporal do persoal non docente e os nomeamentos do persoal en prácticas, interino e substituto docente para impartir ensinanzas reguladas na Lei orgánica 2/2006, do 3 de maio, de educación.
b) Recoñecer os servizos previos, os trienios e os sexenios aos funcionarios docentes pertencentes a corpos ou escalas adscritos a esta consellería e ao profesorado de relixión.
c) Designar as comisións de servizos con dereito a indemnización, previstas no Decreto 144/2001, do 7 de xuño, do persoal con destino no correspondente ámbito territorial, así como autorizar a súa asistencia a cursos e actividades de formación e perfeccionamento.
Artigo 8.
1. As resolucións que se adopten facendo uso das delegacións contidas nesta orde farán constar expresamente esta circunstancia e consideraranse ditadas polo órgano que as conferiu.
2. En calquera momento, a persoa titular da consellería poderá avocar o exercicio das competencias que son delegadas por esta orde.
3. En todo caso, quedan excluídos das delegacións contidas nesta orde os supostos previstos no artigo 6.4 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
4. En caso de vacante, ausencia ou enfermidade das persoas titulares dos órganos superiores e directivos desta consellería, as competencias delegadas contidas nesta orde serán exercidas, temporalmente e mentres persistan aquelas circunstancias, polo órgano superior que corresponda seguindo a orde de prelación que se establece no artigo 5.a) do Decreto 13/2012, do 4 de xaneiro, polo que se fixa a estrutura orgánica das consellerías da Xunta de Galicia.
Nos mesmos supostos, as competencias delegadas nas persoas titulares das xefaturas territoriais serán desempeñadas pola persoa responsable do Servizo de Recursos Humanos da correspondente xefatura.
Disposición adicional.
O réxime de delegacións en materia de axudas e subvencións públicas será o que se estableza, se é o caso, nas correspondentes ordes de convocatoria.
Disposición derrogatoria.
Quedan derrogadas as disposicións de igual ou inferior rango que se opoñan ao previsto nesta orde.
Disposición derradeira.
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 10 de xaneiro de 2012.
Jesús Vázquez Abad
Conselleiro de Cultura, Educación e Ordenación Universitaria
