Con data do 5 de xullo de 2007 concedeuse a Endesa Generación, S.A. a autorización ambiental integrada n.º 2005/0479_AIA/IPPC_025 para a unidade de produción térmica e o vertedoiro controlado de residuos non perigosos, localizados no concello das Pontes de García Rodríguez (A Coruña). Nesta autorización establécese unha vixencia de cinco anos, contados a partir do día seguinte ao da súa notificación á titular.
O artigo 25 da Lei 16/2002, do 1 de xullo, de prevención e control integrados da contaminación, estipula que, transcorrido o prazo de vixencia da autorización, esta debe ser renovada e, de ser o caso, actualizada. Atendendo ao indicado, e para os efectos previstos no artigo 7.2 do Real decreto 509/2007, do 20 de abril, polo que se aproba o regulamento para o desenvolvemento e execución da Lei 16/2002, faise público que por espazo de trinta (30) días hábiles, contados a partir do seguinte ao da publicación deste anuncio no Diario Oficial de Galicia, quedará exposta a documentación presentada pola solicitante para a renovación da autorización ambiental integrada, constituída polo documento titulado:
Solicitude de renovación. Autorización ambiental integrada. Unidade de produción térmica As Pontes. Outubro 2011.
Co fin de que calquera interesado poida consultalo e, de ser o caso, formular no dito prazo as alegacións, suxestións ou observacións que considere convenientes. O antedito documento estará á disposición dos administrados, en horario de atención ao público, nas seguintes dependencias:
– Secretaría Xeral de Calidade e Avaliación Ambiental, Servizo de Prevención e Control Integrados da Contaminación (San Lázaro, s/n, 15781 Santiago de Compostela).
– Xefatura Territorial da Coruña da Consellería de Medio Ambiente, Territorio e Infraestruturas (praza Luís Seoane, s/n, 15008 A Coruña).
– Concello das Pontes de García Rodríguez (Parque Municipal, s/n, 15320 As Pontes de García Rodríguez).
Santiago de Compostela, 15 de novembro de 2011.
Justo de Benito Basanta
Secretario xeral de Calidade e Avaliación Ambiental
