Establecida a estrutura orgánica da Xunta de Galicia polo Decreto 79/2009, do 19 de abril, faise preciso adaptala ás necesidades que o momento actual aconsella acometer, tendo en conta os criterios de eficacia, economía e austeridade que deben inspirar a actuación e a organización administrativa.
Por todo iso, en virtude das atribucións que me confire o artigo 26, número 1, da Lei 1/1983, do 22 de febreiro, de normas reguladoras da Xunta e da súa Presidencia, na súa redacción dada por Lei 11/1988, do 20 de outubro, e de conformidade co disposto no artigo 23, número 2, da Lei 16/2010, do 17 de decembro, de organización e funcionamento da Administración xeral e do sector público autonómico de Galicia,
DISPOÑO:
Artigo 1.
A Xunta de Galicia estará integrada polos departamentos que a seguir se relacionan:
– Consellería de Presidencia, Administracións Públicas e Xustiza.
– Consellería de Facenda.
– Consellería de Medio Ambiente, Territorio e Infraestruturas.
– Consellería de Economía e Industria.
– Consellería de Cultura, Educación e Ordenación Universitaria.
– Consellería de Sanidade.
– Consellería de Traballo e Benestar.
– Consellería do Medio Rural e do Mar.
Artigo 2.
A orde de prelación das consellerías manterase segundo o establecido no artigo anterior.
Disposición derrogatoria.
Quedan derrogadas cantas disposicións de igual ou inferior rango se opoñan ao disposto neste decreto.
Disposicións derradeiras.
Primeira. O Consello da Xunta de Galicia adoptará as medidas necesarias para adecuar a estrutura dos distintos organismos obxecto de regulación deste decreto, dentro da política de austeridade, racionalización e redución do gasto público.
Segunda. A Consellería de Facenda realizará as modificacións e habilitacións orzamentarias precisas para o cumprimento do previsto neste decreto, sen que en ningún caso poidan orixinar incremento de gasto.
Terceira. Este decreto entrará en vigor o mesmo día da súa publicación no Diario Oficial de Galicia.
Santiago de Compostela, tres de xaneiro de dous mil doce.
Alberto Núñez Feijóo
Presidente
