Pola Orde do 7 de febreiro de 2008 (DOG do 25 de febreiro) fíxose pública a composición do Consello Social da Universidade de Santiago de Compostela.

O artigo 7.3.d) da Lei 1/2003, do 9 de maio, dos consellos sociais do Sistema Universitario de Galicia, establece a composición dos consellos sociais, entre os que forman parte dous membros designados polos sindicatos máis representativos da Comunidade Autónoma de Galicia.

Tendo en conta que os parágrafos 1.b) e 2 do artigo 10 da citada Lei 1/2003 establecen que os membros do consello social que cesen por renuncia continuarán nas súas funcións ata a toma de posesión dos novos membros e, en todo caso, o membro substituto entenderase nomeado polo período que reste do anterior mandato. O nomeamento será publicado no Diario Oficial de Galicia.

Con data do 7 de xullo de 2011, o presidente do Consello Social da Universidade de Santiago de Compostela comunica a designación de Jesús Otero Calvo como representante da UGT Galicia en substitución, por renuncia, de José Luis Rodríguez Trigo, achegando tamén a declaración de incompatibilidade establecida no artigo 12 e) da Lei 1/2003, do 9 de maio.

O artigo 7.4 da citada Lei 1/2003, do 9 de maio, establece que os acordos de designación de membros do consello social seranlle comunicados ao conselleiro competente en materia universitaria, quen procederá ao seu nomeamento mediante orde da súa consellería.

Por todo iso,

DISPOÑO:

Artigo único.

Nomear a Jesús Otero Calvo como representante da Unión Xeral de Traballadores (UGT-Galicia), no Consello Social da Universidade de Santiago de Compostela, en substitución de José Luis Rodríguez Trigo.

Disposición derradeira.

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 1 de agosto de 2011.

Jesús Vázquez Abad
Conselleiro de Educación e Ordenación Universitaria