Con data 30 de abril de 2008 concedeuse a autorización ambiental integrada, co número de rexistro 2004/0286_NAA/IPPC_162, ao Grupo Empresarial Ence para a fábrica de pasta de celulosa situada en Lourizán. De acordo co indicado nesta resolución, a vixencia da autorización finalizará o próximo 31 de decembro de 2011.

O artigo 25 da Lei 16/2002, do 1 de xullo, de prevención e control integrados da contaminación, estipula que, transcorrido o prazo de vixencia da autorización esta debe ser renovada e, de ser o caso, actualizada. Atendendo ao indicado, e para os efectos previstos no artigo 7.2 do Real decreto 509/2007, do 20 de abril, polo que se aproba o regulamento para o desenvolvemento e execución da Lei 16/2002, faise público que, por espazo de trinta (30) días hábiles contados a partir do seguinte ao da publicación deste anuncio no Diario Oficial de Galicia, quedará exposta a documentación presentada pola solicitante para a renovación da autorización ambiental integrada, constituída polo documento titulado:

– Autorización ambiental integrada. Renovación. Fábrica de celulosa. Situación: Lourizán-Pontevedra. Grupo Empresarial Ence, S.A. Expediente: 2011/0010. Revisión: 1: marzo 2011;

co fin de que calquera interesado poida consultalo e, de ser o caso, formular no dito prazo as alegacións, suxestións ou observacións que estime convenientes. O antedito documento estará á disposición dos administrados, en horario de atención ao público, nas seguintes dependencias:

● Secretaría Xeral de Calidade e Avaliación Ambiental - Servizo de Prevención e Control Integrados da Contaminación (San Lázaro, s/n - 15781 Santiago de Compostela).

● Departamento Territorial de Pontevedra da Consellería de Medio Ambiente, Territorio e Infraestruturas (R/ Fernández Ladreda, 43-1.º-4.º - 36003 Pontevedra).

Concello de Pontevedra (praza de España, 1 - 36071 Pontevedra).

Santiago de Compostela, 20 de xuño de 2011.

Justo de Benito Basanta
Secretario xeral de Calidade e Avaliación Ambiental