Examinada a proposta da comisión de avaliación dos candidatos para a adxudicación dunha bolsa de formación en competencias técnicas vinculadas a sistemas de xestión da teleformación,
DISPOÑO:
Primeiro. Adxudicar a citada bolsa a Sergio Facal Fariña, de acordo co previsto na base oitava da Resolución do 13 de decembro de 2010 (DOG n.º 241, do 17 de decembro), por ser o candidato a que lle corresponde por orde de puntuación. A efectividade da bolsa recoñecida será desde a data da súa incorporación ata o 31 de decembro de 2011.
Segundo. Recordarlle ao beneficiario que, unha vez recibida esta notificación de concesión da bolsa, disporá dun prazo de dez días para comunicar á Escola Galega de Administración Pública a súa aceptación ou a súa renuncia da bolsa. Transcorrido este prazo sen que se producise manifestación expresa por parte do beneficiario, entenderase tacitamente aceptada, segundo o establecido no artigo 21.5 da Lei 9/2007, do 13 de xuño, de subvencións de Galicia.
No prazo de cinco días contados desde a aceptación expresa da bolsa ou do transcurso do prazo para entendela tacitamente aceptada, o candidato seleccionado deberá incorporarse para o desempeño da bolsa na EGAP. No caso de que a beneficiario non se incorporase neste prazo, ou que renunciase expresamente, perderá os dereitos inherentes á bolsa (base décima).
Terceiro. Contra esta resolución poderá interpoñerse, con carácter potestativo, recurso de reposición perante o director da EGAP, no prazo dun mes contado desde o día seguinte ao da publicación da resolución nos termos dos artigos 116 e 117 da Lei 30/1992, de réxime xurídico das administracións públicas e do procedemento administrativo común, ou directamente, recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados desde o día seguinte ao da publicación da resolución de conformidade co establecido no artigo 46.4 da Lei 29/1998, reguladora da xurisdición contencioso-administrativa (base novena).
Santiago de Compostela, 13 de maio de 2011.
Pablo Figueroa Dorrego
Director da Escola Galega de Administración Pública
