No Diario Oficial de Galicia do 25 de novembro de 2003, publícase a Resolución do 3 de novembro de 2003, da Dirección Xeral de Xustiza, pola que se convoca concurso de traslado para prazas vacantes e de nova creación de oficiais, auxiliares e axentes da Administración de xustiza (DOG nº 229, do 25 de novembro, páxs. 14.521 e seguintes); así mesmo, a publicación desta resolución no Boletín Oficial del Estado non se produciu na mesma data, estando previsto que se publique o vindeiro día 2 de decembro,
Conforme coa base cuarta da devandita resolución, as instancias para participar neste concurso deberán de presentarse «no prazo de 10 días naturais seguintes ó da publicación desta convocatoria no Diario Oficial de Galicia, ou contados a partir do día seguinte á súa publicación no Boletín Oficial del Estado, no caso de que non se faga simultaneamente», como neste caso.
Tamén, segundo a base novena, punto 7 da referida resolución disponse: «...se non se lograse a simultaneidade de publicación da resolución co Diario Oficial de Galicia, os prazos comezarán desde o día seguinte ó da publicación no Boletín Oficial del Estado».
Por todo o anteriormente exposto, coa presente resolución quérese subliña-la devandita discordancia nas datas de publicación, e que os prazos contarán a partir da publicación da resolución no Boletín Oficial del Estado (prevista para o vindeiro 2 de decembro).
Así mesmo, por esta resolución anúnciase que o número de orde de convocatoria das prazas que se desexen pedir a resultas (a día de hoxe sen a oportuna publicidade) serán expostas no taboleiro de anuncios do Tribunal Superior de Xustiza de Galicia, nas audiencias provincias, no Servicio de Xerencia e na Dirección Xeral de Xustiza, e na páxina web da Xunta de Galicia.
Santiago de Compostela, 25 de novembro de 2003.
Juan José Martín Álvarez
Director xeral de Xustiza