DOG 89 do 09/05/2003 - ORDE do 30 de abril de 2003 pola que se aproban as bases que rexerán as convocatorias de axudas para a contratación de doutores en organismos públicos de investigación da Comunidade Autónoma de Galicia (programa Isidro Parga Pondal) e se procede á súa convocatoria.

III. OUTRAS DISPOSICIÓNS

CONSELLERÍA DE INNOVACIÓN, INDUSTRIA E COMERCIO

ORDE do 30 de abril de 2003 pola que se aproban as bases que rexerán as convocatorias de axudas para a contratación de doutores en organismos públicos de investigación da Comunidade Autónoma de Galicia (programa Isidro Parga Pondal) e se procede á súa convocatoria.

A Lei 12/1993, de fomento de investigación e desenvolvemento tecnolóxico de Galicia, no seu artigo 1, establece como obxectivo xeral o fomento da investigación científica e a innovación tecnolóxica para promove-lo desenvolvemento económico, social e productivo de Galicia. Como unha ferramenta encamiñada ó logro deste obxectivo, a citada lei, no seu capítulo II, crea o Plan Galego de Investigación e

Desenvolvemento Tecnolóxico. O Consello da Xunta de Galicia, na súa reunión do 14 de marzo de 2002, aprobou o Plan Galego de Investigación, Desenvolvemento e Innovación Tecnolóxica (2002-2005).

O plan está integrado por programas xerais, sectoriais e horizontais. Dentro dos programas horizontais figura o programa de Recursos Humanos que ten, entre outros obxectivos, o de incrementa-los recursos humanos dedicados a actividades de I+D+I tanto en número como en especialización nas áreas de maior interese, así como incrementa-lo número de doutores e tecnólogos incorporados ó sistema público de I+D.

O obxectivo desta convocatoria é a inserción nas universidades do sistema universitario de Galicia e en centros de investigación da Comunidade Autónoma de doutores novos cunha formación investigadora acreditada en organismos científicos nacionais ou estranxeiros. O fin último do programa Isidro Parga Pondal que agora se pon en marcha é contribuír a supera-lo déficit de recursos humanos que afecta o sistema de I+D en Galicia.

Na súa virtude e consonte co previsto no convenio de colaboración suscrito pola Consellería de Innovación, Industria e Comercio coas universidades do sistema universitario de Galicia e o CSIC, esta consellería

DISPÓN:

Artigo 1º.-Finalidade da convocatoria.

A presente convocatoria establece as bases que regulan a concesión de axudas para a realización de 50 contratos laborais de duración determinada e destinados á incorporación de investigadores, que teñan acadado o título de doutor, ás universidades do sistema universitario de Galicia, ós centros en Galicia do Consello Superior de Investigacións Científicas (CSIC), así como ós centros públicos de investigación dependentes da Xunta de Galicia que a continuación se indican:

-Centro de cultivos mariños de Ribadeo.

-Centro de investigacións mariñas de Corón.

-Centro de investigacións forestais de Lourizán.

Artigo 2º.-Requisitos dos candidatos.

Os candidatos á obtención dalgún dos contratos obxecto desta convocatoria deberán acredita-lo cumprimento dos seguintes requisitos:

a) Posuí-la nacionalidade española, ser nacional dun país membro da Unión Europea ou ser estranxeiro con permiso de residencia en España.

b) Estar en posesión do grao de doutor.

As titulacións obtidas no estranxeiro deberán estar homologadas polo Ministerio de Educación e Cultura a excepción das obtidas en países membros da Unión Europea.

Admitiranse solicitudes de candidatos que teñan iniciado o trámite de homologación do título de doutor polo Ministerio de Educación e Cultura, pero neste caso a selección do candidato, de producirse, quedará condicionada a que a dita homologación se conceda antes do 1 de outubro de 2003.

c) Ter realizado estadías en universidades ou en centros de investigación distintos a aquela universidade na que se expediu o seu título de doutor, durante un período mínimo de 6 meses despois de ter acadado o grao de doutor.

Artigo 3º.-Dotación, número e duración dos contratos.

A axuda máxima concedida para cada contrato laboral será de 26.075 euros por ano de contrato, incluíndo neste importe a retribución bruta anual do contrato e o pagamento de custos sociais.

O número máximo de contratos que poderán financiarse é de 50 dos que ata un máximo de 3 poderán corresponder ós centros de investigación dependentes da Xunta de Galicia, indicados no artigo 1º; neste caso os contratos dos candidatos seleccionados serán financiados con cargo ás dotacións do capítulo I dos orzamentos para os anos 2003, 2004 e 2005 da Dirección Xeral de Investigación e Desenvolvemento. Os restantes contratos serán financiados con cargo á aplicación orzamentaria 04.06.432A.740.0 dos orzamentos xerais da Comunidade Autónoma para os anos 2003, 2004 e 2005, de acordo coa seguinte distribución: 2002: 306.381,25 A, 2003: 1.225.525 A, 2004: 919.143,75 A. A universidade correspondente ou o CSIC segundo corresponda serán os encargados do pagamento dos correspondentes contratos laborais.

A duración dos contratos será de dous anos e poderán ser obxecto de prórroga trala publicación no DOG dunha convocatoria na que se recollan os requisitos e características desta.

A primeira anualidade dos contratos comezará a computarse na data que se indique na resolución da presente convocatoria e non será anterior o 1 de outubro de 2003.

Artigo 4º.-Formalización de solicitudes e prazo de presentación.

As solicitudes no modelo oficial RHU-10 do que a carátula externa se publica como anexo á presente

orde, están ó dispor dos interesados nas dependencias da Dirección Xeral de I+D e na Internet nos enderezos: http://www.sxid.org., o http://www.cesga.es/sxid. As solicitudes presentaranse no rexistro xeral da Dirección Xeral de I+D ou por calquera das formas previstas no artigo 38.4º da Lei 30/1992.

As solicitudes deberán ir acompañadas da seguinte documentación:

a) Fotocopia do documento nacional de identidade ou do documento equivalente no caso de ser nacional doutro país membro da Unión Europea ou da tarxeta de residente, no caso de nacionais doutros países.

b) Fotocopia compulsada do título de doutor ou doutro documento acreditativo de ter acadado o dito grao e a data da súa obtención. De se-lo caso, fotocopia compulsada da homologación polo Ministerio de Educación e Cultura, ou da solicitude de homologación presentada a dito ministerio.

c) Currículum vitae do candidato segundo o modelo oficial acompañado dos documentos xustificativos correspondentes, así como de documentos que acrediten a realización de estadías post-doutorais en universidades ou centros de investigación distintos a aquela universidade na que se expediu o seu título de doutor por un mínimo de 6 meses. Non serán obxecto de valoración aqueles méritos alegados que non sexan convenientemente acreditados.

d) Declaración das axudas solicitadas ou concedidas para o mesmo fin de tódalas administracións públicas, consonte o documento que se inclúe no modelo de solicitude.

Na instancia de solicitude o candidato indicará, por orde de prioridade descendente, o código das prazas ás que opta, entre aquelas que figuran no anexo II á presente orde, tendo en conta as correspondentes áreas temáticas e áreas de coñecemento.

O prazo de presentación de solicitudes será de 40 días hábiles que se contarán a partir do día seguinte ó de publicación da presente convocatoria no DOG.

Artigo 5º.-Tramitación.

Por parte dos servicios da Dirección Xeral de Investigación e Desenvolvemento comprobarase que tódalas solicitudes reúnan os requisitos establecidos na presente orde e exporase a lista de solicitudes admitidas e excluídas, sinalando, se é o caso, as causas de exclusión, nos taboleiros da Dirección Xeral de Investigación e Desenvolvemento, e na Internet nos enderezos http://www.sxid.org ou http://www.cesga.es/sxid. O prazo de exposición das

listas será desde o 7 ó 17 de xullo e os interesados poderán durante este prazo formular reclamacións para emendar erros e falta de documentos, perante a Dirección Xeral de Investigación e Desenvolvemento, achegando, se é o caso, a documentación necesaria. Transcorrido este prazo sen que se corrixan as causas de exclusión, procederase consonte o establecido no artigo 71 da Lei 30/1992, modificada pola Lei 4/1999.

Artigo 6º.-Avaliación, selección das solicitudes e resolución.

A avaliación científico-técnica dos méritos dos candidatos será realizada por expertos externos, de acordo cos seguintes criterios:

-Contribución científico-técnica dos candidatos na súa área temática e área de coñecemento: ata 70 puntos. Valoraranse os seguintes aspectos: as publicacións científicas preferentemente recollidas no Science Citation Index (SCI), no Social Sciences Citation Index (SSCI) ou no Arts & Humanities Citation Index (AHCI); patentes rexistradas; artigos en congresos con avaliación estricta; proxectos técnicos, se é o caso; outras publicacións científicas; etc. Darase especial relevancia ás contribucións realizadas nos últimos cinco anos.

-Outros aspectos: ata 20 puntos. Valoraranse estadías en centros de investigación e outros méritos do candidato.

A selección dos candidatos será efectuada pola comisión de selección de investigación, creada polo Decreto 37/1998, do 30 de xaneiro (DOG do 6 de febreiro) consonte o baremo seguinte:

-Avaliación científico-técnica do candidato realizada polos expertos externos: ata 90 puntos.

-Adecuación do candidato ás prioridades do Plan Galego de Investigación, Desenvolvemento e Innovación Tecnolóxica: ata 10 puntos.

Efectuada a selección, a comisión elevará a proposta de resolución ó conselleiro de Innovación, Industria e Comercio para que resolva. Esta resolución publicarase no DOG.

O prazo máximo para resolve-las solicitudes presentadas ó abeiro da correspondente convocatoria será de 6 meses, contados desde a apertura do prazo de presentación de solicitudes. De non mediar resolución expresa no devandito prazo as solicitudes deberán entenderse desestimadas.

Contra as resolucións expresas ou presuntas que poñen fin á vía administrativa, poderán os interesados interpoñer potestativamente recurso de reposición ante o conselleiro de Innovación, Industria

e Comercio no prazo dun mes contado a partir do día seguinte ó de recepción da correspondente notificación no caso de resolucións expresas. No caso de que a resolución se entenda desestimatoria por silencio administrativo, o prazo será de tres meses contados a partir do día seguinte a aquel en que se produza o acto presunto.

De non estima-la presentación deste recurso poderán os interesados interpoñer recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia no prazo de dous meses que se contarán a partir do día seguinte ó de recepción da correspondente notificación, se a resolución é expresa. No caso de que a resolución se entenda desestimada por silencio administrativo o prazo será de seis meses contados a partir do día seguinte a aquel en que se produza o acto presunto.

Artigo 7º.-Formalización dos contratos.

Publicada a resolución no DOG, a Dirección Xeral de Investigación e Desenvolvemento, iniciará os trámites necesarios para a formalización dos contratos correspondentes a centros de investigación dependentes da Xunta de Galicia. Pola súa parte as universidades galegas e o CSIC procederán a realiza-los trámites necesarios para a contratación dos candidatos seleccionados para os seus organismos consonte ó previsto no convenio de colaboración asinado entre: a Consellería de Innovación, Industria e Comercio, as universidades galegas e o CSIC.

Os pagamentos que se realizarán ás universidades do sistema universitario de Galicia e ó CSIC por parte da Consellería de Innovación, Industria e Comercio, axustaranse ó disposto no devantido convenio.

Artigo 8º.-Obrigas dos beneficiarios e seguimento.

1. Os contratos financiados con cargo a esta convocatoria serán incompatibles coa vixencia de calquera outro contrato laboral por parte do investigador contratado.

2. Os investigadores que sexan contratados ó abeiro do disposto nesta orde poderán, por petición propia, prestar colaboracións complementarias tales como tarefas docentes, neste último caso ata un máximo de cento vinte horas anuais, tralo acordo do departamento implicado, que documentará debidamente a dita colaboración para os efectos de concurso e respectando a normativa vixente de incompatibilidades.

Santiago de Compostela, 30 de abril de 2003.

Juan Rodríguez Yuste

Conselleiro de Innovación, Industria e Comercio

ANEXO II

Solicitudes de prazas do programa Isidro Parga Pondal

Praza

Centro/lugar de traballo

Localidade

Área temática

Área científica

Organismo

P-O1	Fac. de ciencias	Vigo	Física e ciencias do espacio	Física aplicada	UVI

P-O2	Fac. de ciencias	Ourense	Física e ciencias do espacio	Física aplicada	UVI

P-O3	E.T.S.E. industriais	Vigo	Física e ciencias do espacio	Física aplicada	UVI

P-O4	Fac. de ciencias	Vigo	Ciencias da terra	Física da terra, astronomía e astrofísica	UVI

P-O5	E.T.S.E. industriais	Vigo	Ciencia e tecnoloxía dos materiais	Ciencia dos materiais e enxeñería metalúrxica	UVI

P-O6	Fac. de ciencias	Vigo	Química	Química física	UVI

P-O7	Fac. de ciencias	Vigo	Química	Química analítica	UVI

P-O8	Fac. de ciencias	Vigo	Química	Química orgánica	UVI

P-O9	Fac. de ciencias	Vigo	Química	Química inorgánica	UVI

P-10	Fac. de ciencias	Ourense	Tecnoloxía química	Enxeñería química	UVI

P-11	Fac. de ciencias	Vigo	Tecnoloxía química	Enxeñería química	UVI

P-12	Fac. de ciencias	Vigo	Bioloxía vexetal, animal e ecoloxía	Bioloxía animal	UVI

P-13	Fac. de ciencias	Vigo	Bioloxía vexetal, animal e ecoloxía	Ecoloxía	UVI

P-14	Fac. de ciencias	Ourense	Bioloxía vexetal, animal e ecoloxía	Bioloxía vexetal	UVI

P-15	Fac. de ciencias	Vigo	Bioloxía vexetal, animal e ecoloxía	Bioloxía vexetal	UVI

P-16	E.U. forestais	Pontevedra	Bioloxía vexetal, animal e ecoloxía	Ecoloxía	UVI

P-17	Fac. de ciencias	Ourense	Agricultura	Edafoloxía e química agrícola	UVI

P-18	Fac. de ciencias	Ourense	Ciencia e tecnoloxía dos alimentos	Nutrición e bromatoloxía	UVI

P-19	Fac. de ciencias	Ourense	Ciencia e tecnoloxía dos alimentos	Tecnoloxía de alimentos	UVI

P-20	Fac. de ciencias	Vigo	Bioloxía molecular, celular e xenética	Xenética	UVI

P-21	Fac. de ciencias	Vigo	Bioloxía molecular, celular e xenética	Bioquímica e bioloxía molecular	UVI

P-22	Fac. de ciencias	Vigo	Fisioloxía e farmacoloxía	Fisioloxía	UVI

P-23	E.T.S.E. industriais	Vigo	Enxeñería eléctrica, electrónica e automática	Enxeñería de sistemas e automática	UVI

P-24	E.T.S.E. industriais	Vigo	Matemáticas	Matemática aplicada	UVI

P-25	E.T.S.E. telecomunicación	Vigo	Tecnoloxía electrónica e teoría das comunicacións	Teoría do sinal e comunicacións	UVI

P-26	E.T.S.E. telecomunicación	Vigo	Tecnoloxía electrónica e teoría das comunicacións	Teoría do sinal e comunicacións	UVI

P-27	E.T.S.E. telecomunicación	Vigo	Tecnoloxía electrónica e teoría das comunicacións	Enxeñería telemática	UVI

P-28	Fac. de ciencias económicas e empresariais	Vigo	Economía	Economía aplicada	UVI

P-29	Fac. de ciencias económicas e empresariais	Vigo	Economía	Economía aplicada	UVI

P-30	Fac. de ciencias económicas e empresariais	Vigo	Economía	Fundamentos da análise económica	UVI

P-31	Fac. de ciencias	A Coruña	Agricultura	Edafoloxía e química agrícola	UDC

P-32	Fac. de ciencias	A Coruña	Bioloxía molecular, celular e xenética	Bioquímica e biloxía molecular	UDC

P-33	Fac. de ciencias da saúde	A Coruña	Medicina/ciencias da computación e tecnoloxía informática	Radioloxía e medicina física/ciencias da computación e intelixencia artificial	UDC

P-34	Fac. de ciencias	A Coruña	Química	Química analítica	UDC

P-35	Fac. de ciencias	A Coruña	Ciencias da terra	Paleontoloxía	UDC

P-36	Fac. de ciencias da saúde	A Coruña	Bioloxía molecular, celular e xenética/ciencias da computación e tecnoloxía informática	Xenética/ciencias da computación e intelixencia artificial	UDC

P-37	Fac. de ciencias da educación	A Coruña	Psicoloxía e ciencias da educación	Psicobioloxía	UDC

P-38	Fac. de ciencias da educación	A Coruña	Psicoloxía e ciencias da educación	Psicoloxía evolutiva e da educación	UDC

P-39	Fac. de filoloxía	A Coruña	Filoloxía e filosofía	Filoloxía inglesa	UDC

P-40	Fac. de socioloxía	A Coruña	Ciencias sociais	Socioloxía	UDC

P-41	Fac. de socioloxía	A Coruña	Ciencias sociais	Socioloxía	UDC

P-42	Fac. de dereito	A Coruña	Dereito	Filosofía do dereito	UDC

P-43	Fac. de dereito	A Coruña	Dereito	Dereito civil	UDC

P-44	E.T.S.E. camiños	A Coruña	Enxeñería civil e arquitectura	Enxeñería do terreo	UDC

P-45	E.T.S.E. camiños	A Coruña	Enxeñería civil e arquitectura/tecnoloxía química	Enxeñería hidráulica-enxeñería do terreo/tecnoloxía do medio	UDC

P-46	Fac. de informática	A Coruña	Matemáticas	Estatística e investigación operativa	UDC

P-47	Fac. de informática	A Coruña	Matemáticas	Matemática aplicada	UDC

P-48	Fac. de informática	A Coruña	Tecnoloxía electrónica e das comunicacións	Teoría do sinal e comunicacións	UDC

P-49	Fac. de informática	A Coruña	Tecnoloxía electrónica e das comunicacións	Enxeñería telemática	UDC

P-50	Fac. de informática	A Coruña	Bioloxía molecular, celular e xenética	Xenética	UDC

P-51

Servicios xerais de apoio á investigación

A Coruña

Química

Química analítica

UDC