O punto 1 da base 6ª das reguladoras dos apoios do Igape ós proxectos empresariais de investimentos (DOG nº 142, do 23 de xullo de 2002), prevé que a concesión das axudas sexan, con carácter xeral, de ata un máximo do 15% dos gastos subvencionables.

Mediante Resolución do 1 de agosto de 2002 (DOG nº 153, do 9 de agosto), modificáronse as bases no sentido de conceder unha subvención do 50% do prezo de adquisición dos terreos localizados en polígonos de promoción pública, no caso da súa adquisición directamente ó organismo público promotor. Esta subvención atópase limitada pola porcentaxe xeral do 15% para o conxunto de gastos subvencionables.

Considérase oportuno primar aqueles proxectos de investimento promovidos por empresas xa establecidas en Galicia e que teñan como finalidade a incorporación na cadea productiva dun novo producto con alto valor engadido.

Na súa virtude e de conformidade coas facultades que teño conferidas,

RESOLVO:

Único.-Publica-la seguinte modificación das bases reguladoras dos apoios do Igape ós proxectos empresariais de investimento, acordada polo Consello de Dirección do instituto na súa reunión do 28 de novembro de 2002:

Engádese un punto 3 á base 6ª co seguinte texto:

«6.3. Naqueles proxectos de ampliación acometidos por empresas xa establecidas en Galicia coa finalidade de incorporar un novo producto con alto valor engadido na súa cadea productiva, a subvención que de se-lo

caso lle correspondese polo 50% do prezo de adquisición dos terreos localizados en polígonos de promoción pública, de conformidade co punto 5.1.A) a) I) destas bases, acumularase á subvención xeral de ata o 15% sobre os restantes gastos subvencionables».

A presente resolución entrará en vigor o día seguinte ó da súa publicación no Diario Oficial de Galicia, estendendo a súa eficacia a aqueles expedientes en tramitación, pendentes de resolución.

Santiago de Compostela, 13 de decembro de 2002.

Margarita Rodríguez Rama

Directora xeral do Instituto Galego

de Promoción Económica