De conformidade co previsto na base 3.5 do acordo de 15 de outubro de 2002, polo que se convoca proceso selectivo para a cobertura por persoal laboral fixo dun posto de traballo de técnico de xestión contable do cadro de persoal da Fundación Pública Escola Galega de Administración Sanitaria (Fegas), encadrado no grupo 7 da clasificación de persoal recollida no artigo 31 do convenio colectivo para o persoal laboral do sector sanitario de Galicia xestionado por fundacións públicas sanitarias ou empresas públicas, publicado por Resolución do 6 de maio de 2002 (DOG nº 94, do 16 de maio), ó que se adheriu esta fundación segundo se acredita na Resolución do 7 de agosto de 2002 (DOG nº 188, do 30 de setembro), anúnciase que a primeira proba eliminatoria do dito proceso se celebrará o vindeiro día 17 de decembro de 2002 ás 16 horas na sala de informática sita na planta 2ª do edificio administrativo da Consellería de Sanidade e mailo Sergas en San Lázaro, Santiago de Compostela.

Os aspirantes haberán de acudir provistos do documento nacional de identidade e de bolígrafo azul ou negro. O chamamento é único polo que quedarán excluídos do proceso os aspirantes que non comparezan.

A proba será idéntica para tódolos aspirantes, e consistirá nun exercicio tipo-test de carácter teórico-práctico sobre un cuestionario de 25 preguntas con catro respostas alternativas que se lles facilitará ós aspirantes e que se realizará nun ordenador persoal conforme as instruccións que antes de inicia-lo exercicio comunique verbalmente a comisión de selección.

Os contidos do exercicio serán os que se estableceron no acordo do 15 de outubro de 2002.

A proba será cualificada de 0 a 50 puntos, e o tempo máximo de que dispoñen os aspirantes para a súa execución será limitado e comunicado ó comezo da proba pola comisión de selección. As contestacións erróneas serán valoradas negativamente a razón dun quinto da puntuación asignada ás respostas correctas. Todos aqueles aspirantes que non acaden a puntuación mínima que estableza a comisión de selección para supera-la proba, serán cualificados directamente como non apto.

Santiago de Compostela, 4 de decembro de 2002.

Juan Carlos Copa Yáñez

Presidente da comisión de selección