O Estatuto de autonomía de Galicia, no seu artigo 27.23º en relación co artigo 148.1º 20 da Constitución española, asígnalle á Comunidade Autónoma a competencia exclusiva en materia de acción social.

A Lei 4/1993, do 14 de abril, de servicios sociais de Galicia, no seu artigo 3 recolle como un dos principios inspiradores do sistema de servicios sociais, a promoción e incorporación dos cidadáns á programación e prestación dos servicios sociais.

A participación dos cidadáns na programación dos servicios sociais, pode artellarse a través do desenvolvemento de actividades formativas, educativas e de investigación que se configuren como elementos

dinamizadores cara á mellora dos sistemas de protección social, así como instrumentos de planificación de ambientes sociais destinados ás persoas que sofren algún tipo de carencia ou necesidade.

Correspóndelle á Consellería de Asuntos Sociais, en virtude do establecido no Decreto 402/2001, do 28 de decembro, o exercicio das competencias e funcións en materia de política social, sen prexuízo das atribucións conferidas á Consellería de Familia e Promoción do Emprego, Muller e Xuventude.

Na súa virtude, segundo o establecido no artigo 38 da Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro,

DISPOÑO:

Artigo 1º.-Obxecto.

Esta orde ten por obxecto proporcionar un apoio institucional ás actividades e actos de carácter for

mativo que no ámbito dos servicios sociais se desenvolvan na Comunidade Autónoma de Galicia, mediante o seu recoñecemento como actos de interese no eido dos servicios sociais.

Artigo 2º.-Contido.

Poderán solicita-lo recoñecemento como actividade ou acto de interese as persoas físicas ou xurídicas de natureza pública ou privada que acrediten estar legalmente constituídas e que pretendan organizar:

a) Cursos ou ciclos, cunha duración mínima de corenta horas coa finalidade de promove-lo estudio, difusión, formación ou especialización nas materias de atención ás persoas maiores e persoas con discapacidade, servicios comunitarios, voluntariado social, inclusión social, sector sociosanitario e aqueloutras materias que sexan competencia da consellería.

b) Xornadas e congresos, calquera que sexa a súa duración e co mesmo contido sinalado no punto anterior.

Artigo 3º.-Solicitudes.

As solicitudes asinadas polo organizador ou polo seu representante legal formalizaranse mediante instancia segundo o modelo oficial que se xunta como anexo desta orde, dirixida ó secretario xeral da Consellería de Asuntos Sociais por calquera das canles previstas no artigo 38 da Lei 30/1992, do 26 de novembro, modificada pola Lei 4/1999, do 13 de xaneiro, alomenos con dous meses de antelación ó comezo da actividade ou acto.

Artigo 4º.-Documentación.

A solicitude deberá vir acompañada da seguinte documentación:

a) Acreditación da personalidade e representación do solicitante.

b) Actos científicos, divulgativos ou educativos que celebraron nos últimos dous anos e os anteriores que se consideren convenientes.

c) Memoria-resumo da actividade que se vai desenvolver e obxectivos que se perseguen.

d) Persoas ás que se dirixe a actividade e número previsto de participantes.

e) Programa con mención do profesorado ou conferenciantes, materias concretas que vai desenvolver cada un deles e, se é o caso, breve currículo.

f) Orzamento económico e, se é o caso, con expresión da cota establecida para os asistentes e medios de financiamento da actividade ou acto.

Artigo 5º.-Comisión de valoración.

1. As solicitudes, xunto coa documentación presentada, serán avaliadas por un comisión de valoración constituída para o efecto que terá a función de propoñe-la aprobación ou denegación da declaración de interese.

2. A comisión estará composta por:

-Un representante da Secretaría Xeral da Consellería de Asuntos Sociais.

-Un representante da Dirección Xeral do Maior e de Persoas con Discapacidade.

-Un representante da Dirección Xeral de Servicios Comunitarios e Inclusión Social.

3. A comisión poderá contar cos asesores que se consideren convenientes a criterio do secretario xeral da consellería.

Artigo 6º.-Resolución.

1. Á vista da proposta da comisión de valoración, o secretario xeral dictará a resolución que corresponda sobre o recoñecemento da actividade como de interese no ámbito dos servicios sociais.

2. O recoñecemento terá como consecuencia a posibilidade de utilización da declaración na difusión e documentación do acto.

Artigo 7º.-Obrigas dos promotores

Os organizadores ou promotores remitirán as conclusións, acordos ou documentación obxecto da actividade á Secretaría Xeral da Consellería de Asuntos Sociais no prazo de dous meses desde a súa finalización.

Artigo 8º.-Rexistro.

A consellería elaborará e manterá un rexistro de cursos, ciclos, xornadas e congresos ós que se lles concedeu o recoñecemento de interese no ámbito dos servicios sociais.

Disposicións derradeiras

Primeira.-Facúltase o secretario xeral da Consellería de Asuntos Socias para adopta-las medidas necesarias para o desenvolvemento e execución do establecido nesta orde.

Segunda.-Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 19 de novembro de 2002.

Corina Porro Martínez

Conselleira de Asuntos Sociais

CONSELLERÍA DA PRESIDENCIA, RELACIÓNS INSTITUCIONAIS

E ADMINISTRACIÓN PÚBLICA