Dentro do Plan de actividades da Escola Galega de Administración Pública para o 2002 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Consellería de Medio Ambiente e coa Revista de Derecho Urbanístico y Medio Ambiente, unhas xornadas sobre o novo réxime xurídico das autorizacións ambientais, convocatoria que se desenvolverá conforme as seguintes bases:

Primeira.-Obxectivos.

Desde hai algunhas décadas, o ser humano está contemplando e estudiando o territorio no que vive dunha manera diferente. Tomou conciencia da importancia de coida-lo seu contorno e manter un mínimo de normas para non caer no esgotamento, tanto dos seus recursos como da propia vida existente. Nembargantes, a tarefa non é sinxela xa que hai que loitar con innumerables condicionantes, naturais uns, normativos outros, que ás veces voluntaria e outras involuntariamente e, nalgúns casos, de maneira forzada e delictuosa vulneran unha e outra vez os preceptos normativos existentes en proveito dun mal chamado progreso. De aí os esforzos, case nunca fáciles, para compaxinar uns e outros.

Estas xornadas pretenden dar unha visión ampla do panorama ambiental español, en xeral, e galego, en particular. Nelas estúdianse as máis recentes disposicións que veñen a enche-los ocos existentes, achegando novas visións xurídico-prácticas do modo e maneira de controla-los diferentes procesos, a fin de lograr un desenvolvemento controlado que facilite a súa práctica, pero que non dane nin vulnere os principios ambientais.

Segunda.-Contido.

Trataranse estes temas:

-O ordenamento ambiental: confluencia da normativa comunitaria, estatal, autonómica e local. As autorizacións ambientais: normativa reguladora. Lexislación ambiental e lexislación sectorial.

-A Lei 16/2002, do 1 de xullo, de control integrado da contaminación: a autorización ambiental única.

-Autorizacións en razón dos efectos ambientais na lexislación sectorial: augas, minas, solo, residuos.

-As autorizacións ambientais: réxime xurídico. Suxeición a normas xurídicas e técnicas. Homologacións e certificacións.

-As autorizacións ambientais en Galicia (I): a nova articulación competencial derivada da Lei 16/2002, de control integrado da contaminación.

-As autorizacións ambientais en Galicia (II): a integración das autorizacións sectoriais no marco dos instrumentos de protección ambiental galegos.

Terceira.-Destinatarios.

Persoal ó servicio da Xunta de Galicia e da Administración local galega e interesados en xeral.

Cuarta.-Desenvolvemento.

-Horario: mañá e tarde.

-Lugar e datas: as xornadas convocadas desenvolveranse no salón de actos da Delegación Provincial da Consellería da Presidencia, Relacións Institucionais e Administración Pública na Coruña (praza de Pontevedra, s/n, da citada cidade), os días 10 e 11 de decembro de 2002.

Quinta.-Inscrición.

-Prazo: remata o xoves, día 5 de decembro de 2002.

-Tramitación de solicitudes: as solicitudes irán dirixidas ó director da Escola Galega de Administración Pública, Polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión, chamando por teléfono, o día 9 de decembro, de 8.30 a 14.30 horas, ós seguintes números: 981 54 62 39/44 ou 981 54 60 40.

Sexta.-Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.

Sétima.-Certificación de asistencia.

Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 31 de outubro de 2002.

Domingo Bello Janeiro

Director da Escola Galega de Administración

Pública

CONSELLERÍA DA PRESIDENCIA, RELACIÓNS INSTITUCIONAIS

E ADMINISTRACIÓN PÚBLICA