Visto o texto do convenio colectivo de ámbito autonómico da empresa Corporación Voz de Galicia, S.L.U., antes Multimedia Gallega de Comunicación, S.L. (código de convenio nº 8200622), que se subscribiu coa data do 10 de xuño de 2002, entre a representación da empresa e os representantes dos traballadores, e de conformidade co disposto no artigo 90.2º e 3º do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, e no Real decreto 1040/1981, do 22 de maio, sobre rexistro e depósito de convenios colectivos de traballo.

A Dirección Xeral de Relacións Laborais

ACORDA:

Primeiro.-Ordena-la inscrición do devandito convenio colectivo no rexistro xeral de convenios desta dirección xeral.

Segundo.-Remiti-lo texto orixinal ó correspondente servicio deste centro directivo.

Terceiro.-Dispoñe-la súa publicación no Diario Oficial de Galicia.

Santiago de Compostela, 11 de xullo de 2002.

José Vázquez Portomeñe

Director xeral de Relacións Laborais

Convenio colectivo da empresa

Corporación Voz de Galicia, S.L.U.

Artigo 1º.-Ámbito territorial.

O presente convenio é de aplicación nos centros de traballo da empresa Corporación Voz de Galicia, S.L.U. existentes na actualidade, e ós que durante a vixencia deste convenio puideran establecerse.

Artigo 2º.-Ámbito funcional.

As normas contidas neste convenio colectivo son de aplicación a tódalas actividades da empresa Corporación Voz de Galicia, S.L.U.

Artigo 3º.-Ámbito persoal.

O convenio é de aplicación á totalidade do persoal que preste os seus servicios na empresa e o faga en virtude dunha relación laboral ordinaria, salvo os supostos de pacto individual en contrario concertado entre empresa e persoal directivo, entendendo por este o que teña a categoría funcional de director ou subdirector.

Artigo 4º.-Ámbito temporal: vixencia e denuncia.

O presente convenio páctase por unha duración de dous anos e entrará en vigor o 1 de xaneiro de 2002, con independencia da data da súa publicación, rematando a súa vixencia o 31 de decembro do 2003.

O convenio poderá ser denunciado por calquera das partes cunha antelación de polo menos dous meses da data de finalización da súa vixencia.

Caso de non ser denunciado en tempo e forma entenderase prorrogado por anualidades ata a conclusión da negociación dun novo convenio.

Unha vez producida a denuncia, manterá a súa vixencia o contido íntegro do vixente convenio ata a sinatura dun novo.

Artigo 5º.-Respecto de dereitos. Compensación e absorción.

Respectaranse as condicións salariais, pactadas a título persoal ou derivadas dunha decisión unilateral do empresario, que estean vixentes ó entrar en vigor o convenio e que, con carácter global, o excedan en cómputo anual.

As retribucións establecidas neste convenio compensarán e absorberán tódalas existentes na súa entrada en vigor, calquera que sexa a súa natureza ou orixe, na forma que o propio convenio establece e en todo caso segundo establecido no artigo 26.5º do Estatuto dos traballadores.

Artigo 6º.-Comisión paritaria.

Constitúese unha comisión paritaria como órgano de conciliación e interpretación do pactado neste convenio, formada por tres representantes dos tra

balladores e de tres da dirección da empresa, preferentemente que interviñesen na negociación.

Tamén poderán intervir, con voz pero sen voto, os asesores correspondentes a ambas partes.

A dita comisión dotarase dun regulamento de funcionamento.

O domicilio da comisión paritaria será o do centro de traballo de Sabón.

Os acordos da comisión paritaria requirirán, para a súa validez, a conformidade da maioría simple de membros de cada unha das representacións.

Son funcións desta comisión:

-Interpretación da aplicación de tódalas cláusulas do presente convenio.

-Mediación e conciliación de tódalas cuestións que as partes sometan á súa consideración e que se deriven da aplicación do convenio.

-Vixilancia do cumprimento do pactado no convenio.

No caso de que a comisión paritaria non poida chegar a acordos nos asuntos que lle sexan sometidos, calquera das partes, con carácter previo á vía xudicial, poderá acudir ós mecanismos de composición establecidos no Acordo galego de solución extraxudicial de conflictos, AGA, se é dentro da Comunidade Autónoma de Galicia, ou o ASEC se é noutro ámbito.

TÍTULO II

Persoal e condicións de traballo

Capítulo I

Estructura profesional

Artigo 7º.-Clasificación profesional.

Todo o persoal en activo á data de entrada en vigor do convenio, e o que entre no futuro no seu ámbito funcional, será inmediatamente encadrado no grupo profesional correspondente definido neste convenio atendendo ós factores de encadramento do artigo 8º e ás tarefas efectivas que veñan desenvolvendo.

Artigo 8º.-Factores de encadramento.

O encadramento dos traballadores incluídos no ámbito de aplicación do presente convenio dentro da estructura profesional pactada será o resultado da ponderación global dos seguintes factores: coñecementos, iniciativa, autonomía, responsabilidade, mando e complexidade. Estes factores responden á seguinte definición:

1. Coñecementos.

Factor para a valoración do cal se terá en conta, ademais da formación básica necesaria para poder cumprir correctamente o cometido, o grao de coñecemento e experiencia adquiridos.

Este factor pódese dividir en dous subfactores:

a) Formación: considerarase o nivel inicial mínimo de coñecementos teóricos que debe posuír unha per

soa de capacidade media para chegar a desempeñar satisfactoriamente as funcións do posto de traballo despois dun período de formación práctica. Este factor tamén deberá considera-las esixencias de coñecementos especializados, idiomas, informática, etc.

b) Experiencia: este subfactor determina o período de tempo requirido para que unha persoa de capacidade media, e posuíndo a información especificada anteriormente, adquira a habilidade e práctica necesarias para desempeña-lo traballo do seu posto, obtendo un rendemento suficiente en cantidade e calidade.

2. Iniciativa e autonomía.

Factor no que se ten en conta a maior ou menor dependencia a directrices ou normas e a maior ou menor subordinación no desenvolvemento da función que corresponda. Este factor comprende tanto a necesidade de detectar problemas como a de improvisar solucións a estes.

Débese ter en conta:

a) Marco de referencia: valoración das limitacións que puidesen existir no posto respecto a: acceso a persoas con superior responsabilidade no organigrama da empresa, a existencia de normas escritas ou manuais de procedemento para a sección que corresponda.

b) Elaboración da decisión: entendendo como tal a obriga dimanante do posto de determina-las posibles solucións e elixir aquela que se considere máis apropiada.

3. Complexidade.

Factor que se avalía en función do maior ou menor número, así como do maior ou menor grao de integración dos restantes factores enumerados na tarefa ou posto encomendado. Terase en conta ademais:

a) Dificultade no traballo: considerarase a complexidade da tarefa que se vai desenvolver e a frecuencia das posibles incidencias.

b) Habilidades especiais: este subfactor determina as habilidades que se requiren para determinados traballos, como poidan ser esforzo físico, destreza manual, etc., e a súa frecuencia durante a xornada laboral.

c) Ambiente de traballo: apreciaranse as circunstancias baixo as que se debe efectua-lo traballo e o grao en que estas condicións fan o traballo desagradable.

4. Responsabilidade.

Terase en conta o grao de autonomía de acción do titular da función e grao de influencia sobre os resultados e importancia das consecuencias da xestión.

a) Responsabilidade sobre a xestión e resultados: considerarase a responsabilidade asumida polo ocu

pante do posto sobre os erros que se puidesen dar. Avalíanse non só as consecuencias directas, senón tamén a súa posible repercusión na marcha da empresa. Para avaliar correctamente é necesario ter en conta o grao en que o traballo é supervisado ou comprobado posteriormente.

b) Capacidade de interrelación: este subfactor aprecia a responsabilidade asumida polo ocupante do posto sobre contactos oficiais con outras persoas de dentro ou de fóra da empresa. Considerarase a personalidade e habilidade necesaria para consegui-los resultados desexados e a forma e frecuencia dos contactos.

5. Mando.

É o conxunto das tarefas de planificación, organización, control e dirección das actividades doutros, asignadas pola dirección da empresa, que requiren dos coñecementos necesarios para comprender, motivar e desenvolver as persoas que dependen xerarquicamente do posto. Para a súa valoración deberase ter en conta a capacidade de ordenación de tarefas, a natureza do colectivo e o número de persoas sobre as que se exerce o mando.

Artigo 9º.-Grupos profesionais.

1. Grupo profesional I.

Criterios xerais: tarefas consistentes na execución de operacións que, realizadas baixo instruccións precisas, requiran adecuados coñecementos profesionais e aptitudes prácticas e que teñen a responsabilidade limitada por unha supervisión directa e sistemática.

Formación: titulación ou coñecementos adquiridos no desenvolvemento da súa profesión equivalentes a EXB ou FPI, complementada cunha formación específica no posto de traballo.

Exemplos: auxiliar, telefonista sen coñecemento de idiomas, mozo, conserxe, ordenanza, operacións de limpeza ...

2. Grupo profesional II.

Criterios xerais: funcións que supoñen a integración, coordinación e supervisión de tarefas homoxéneas, realizadas por un conxunto de colaboradores, en un estadio organizativo menor. Tarefas que, non supoñendo corresponsabilidade de mando, teñen un contido medio de actividade intelectual e de interrelación humana, nun marco de instruccións precisas de complexidade técnica media con autonomia dentro do proceso establecido.

Formación: titulación ou coñecementos adquiridos no desenvolvemento da profesión equivalentes ó BUP ou FP II, complementada cunha experiencia dilatada no posto de traballo.

Exemplos: oficiais de 2ª, secretarias, oficiais de mantemento, chofer, vixilante, telefonista con coñecemento de idiomas ...

3. Grupo profesional III.

Criterios xerais: funcións que supoñen a integración, coordinación e supervisión de tarefas diversas, realizadas por un conxunto de colaboradores. Tarefas complexas pero homoxéneas que, sen implicar responsabilidade de mando, teñen un alto contido intelectual ou de interrelación humana, nun marco de instruccións xerais de alta complexidade técnica.

Formación: titulación ou coñecementos adquiridos no desenvolvemento da profesión equivalentes a estudios universitarios de grao medio complementada cunha experiencia dilatada no posto de traballo.

Exemplos: oficiais de 1ª, xefes de negociado, secretarias de dirección, maquetadores, redactores, deseñadores gráficos, ilustradores ...

4. Grupo profesional IV.

Criterios xerais: funcións que supoñen a realización de tarefas técnicas complexas e heteroxéneas, con obxectivos globais definidos e alto grao de esixencia en autonomía, iniciativa e responsabilidade. Funcións que supoñen a integración, coordinación e supervisión de funcións, realizadas por un conxunto de colaboradores en unha mesma unidade funcional.

Inclúense tamén neste grupo profesional funcións que supoñen responsabilidade completa pola xestión dunha ou varias áreas funcionais da empresa, a partir de directrices xerais moi amplas directamente emanadas do persoal directivo ou da propia dirección, ós que deben dar conta da súa xestión.

Funcións que supoñen a realización de tarefas técnicas da máis alta complexidade e incluso a participación na definición dos obxectivos concretos que se deben alcanzar no seu campo, cun moi alto grao de autonomía, iniciativa e responsabilidade no dito cargo de especialidade técnica.

Formación: titulación ou coñecementos adquiridos no desenvolvemento da profesión equivalentes a estudios universitarios de grao medio, complementada cunha experiencia dilatada no seu sector profesional, ou a estudios universitarios de grao superior, completada cunha formación específica no posto de traballo.

Exemplos: técnicos de aplicacións e de sistemas, redactores de I+D, xefes de sección, titulados superiores ...

Artigo 10º.-Mobilidade funcional.

1. A mobilidade funcional desenvolverase, en función das necesidades operativas da empresa, dentro dos límites que marca o ET.

2. A realización de funcións do grupo profesional superior ó que teña un traballador, por un período de máis de catro meses durante un ano ou seis meses durante dous anos, consolidará a clasificación profesional superior que lle corresponde. Non obstante, mentres dure a situación, percibirá o nivel salarial superior.

3. Se por necesidade perentoria ou imprevisible da actividade productiva, a empresa tivera que destinar un traballador a tarefas correspondentes a un grupo inferior, porque o dito traballo non puidera realizalo outro traballador dese grupo inferior, só poderá facelo con carácter excepcional, polo tempo imprescindible, e nunca superior a catro meses, mantendo a retribución e demais dereitos derivados do seu grupo profesional, e comunicándollelo ós representantes dos traballadores.

4. Poderase levar a cabo unha mobilidade funcional no interior dos grupos profesionais cando isto non implique traslado de localidade. Exercerán de límite para esta os requisitos de idoneidade e aptitude necesarios para o desenvolvemento das tarefas que se lle encomenden ó devandito traballador.

5. Para os efectos deste artigo entenderase que existe a idoneidade requirida cando a capacidade para o desenvolvemento da nova tarefa se desprenda da anteriormente realizada ou o traballador teña o nivel de formación ou experiencia requirida. De non se produciren os anteriores requisitos, deberá a empresa dota-lo traballador da formación antes referida.

6. A representación dos traballadores poderá reclamar información acerca das decisións adoptadas pola dirección da empresa en materia de mobilidade funcional, así como da xustificación e causa destas, véndose obrigada a empresa a facilitárllela.

Artigo 11º.-Mobilidade xeográfica.

Distínguense dúas modalidades: traslados e desprazamentos temporais.

Traslado: enténdese traslado cando supón un cambio de domicilio, ou de centro de traballo en localidade distinta do traballador.

En tódolos supostos de traslado recollidos neste punto, o traballador terá dereito a unha licencia retribuída de 5 días naturais ininterrompidos. Igualmente terá dereito ó aboamento dos gastos de transporte das persoas coas que conviva e útiles, entre a localidade de orixe e a de destino.

O traslado poderá realizarse:

1. Por instancia do traballador. Neste caso a petición formularase por escrito, entregando copia á dirección e ó comité de empresa.

2. Por mutuo acordo de empresa e traballador. Aplicarase o convido entre ámbalas dúas partes.

3. Por decisión da dirección da empresa. Poderase efectuar nos supostos do establecido no artigo 40 do ET ou disposición legal que o substitúa.

Será sempre razón organizativa suficiente por decisión da dirección da empresa, que exista vacante no centro de traballo de destino, e que o traballador obxecto de traslado vaia ocupar un posto de igual ou superior categoría, conservando o traballador tódolos seus dereitos no concernente a salario e calquera outro aspecto da remuneración.

Unicamente poderán ser trasladados, no caso ó que se refire o punto 3 do presente artigo, os traballadores que teñan menos de 52 anos e que leven na empresa menos de 20 anos.

Desprazamentos temporais.

A empresa poderá desprazar temporalmente o seu persoal fixo a localidade distinta, nos supostos establecidos no artigo 40.4º do ET ou disposición legal que o substitúa.

Artigo 12º.-Horas extraordinarias.

As partes acordan a supresión das horas extraordinarias habituais.

Serán consideradas horas extraordinarias as que excedan da xornada anual pactada, que non poderán exceder en ningún caso do límite establecido no artigo 35.2º do Estatuto dos traballadores.

As horas extraordinarias compensaranse preferentemente en descanso, sempre e cando non perturbe o normal proceso productivo. A compensación por descanso, ou a retribución das horas extraordinarias, será a que se acorde entre empresa e traballador.

O sistema de compensación das horas extraordinarias será de 1 hora e 30 minutos por cada hora extraordinaria realizada, ou ben mediante a retribución das ditas horas ó prezo da hora habitual de traballo incrementada nun 50%, calculada da seguinte maneira:

Salario bruto anual x 1,5

Valor hora extraordinaria =

Xornada anual de traballo

Enténdese por salario bruto anual o que percibe o traballador por conceptos fixos, non entrando nos cálculos os de carácter variable.

Para efectos do cómputo de horas extraordinarias e da súa compensación en descanso aplicarase o disposto no artigo 35.2º do Estatuto dos traballadores.

Capítulo II

Promoción dos traballadores

Artigo 13º.- Promoción profesional.

Principios xerais.

1. A cobertura de postos de traballo efectuarase, de conformidade coas necesidades da empresa, por libre designación ou promoción interna, horizontal ou vertical, de acordo cos criterios establecidos neste convenio.

2. Os postos de traballo que comporten funcións de responsabilidade, de especial confianza ou de especial cualificación profesional ou técnica, en calquera nivel da estructura organizativa da empresa, cubriranse mediante o sistema de libre designación.

3. O sistema de promoción interna para o resto dos postos de traballo efectuarase mediante concurso interno, a través de criterios obxectivos de adecuación do posto de traballo.

A promoción, dentro dun grupo profesional, dun nivel ó superior realizarase igualmente atendendo a criterios obxectivos derivados de variacións nos factores de encadramento que no seu día determinaron a adscrición do traballador ó grupo de orixe.

Créase unha comisión técnica de carácter paritario, formada por seis persoas designadas a partes iguais pola empresa e pola representación dos traballadores co obxectivo de establece-los parámetros obxectivos que hai que aplicar nos supostos de promoción interna a postos de traballo que non impliquen responsabilidade.

Capítulo III

Xornada de traballo e vacacións

Artigo 14º.-Xornada e horario de traballo.

A xornada normal de traballo, para todo o persoal comprendido neste convenio, será de 1760 horas anuais de traballo efectivo. Se como consecuencia dalgunha norma de carácter xeral e de rango superior fose decretada a reducción da xornada, reducirase nos termos que estableza a dita norma, a xornada establecida no presente convenio.

Establécese como norma xeral unha xornada de 40 horas nos meses do inverno e de 35 horas desde o 1 de xullo ó 31 de agosto. Durante este período, aqueles traballadores que viñeran traballando habitualmente en xornada partida pasarán a facelo en xornada intensiva.

Non obstante, a empresa, en función das súas necesidades e previo acordo cos representantes do persoal ou cos propios traballadores cando non existan aqueles, respectando o número de horas anuais de traballo convidas, así como os períodos mínimos de descanso diario ou semanal, poderá realizar en cada centro unha distribución irregular da xornada.

En calquera caso respectaranse as condicións máis beneficiosas para o persoal que á data de entrada en vigor deste convenio viñera desfrutando dunha xornada diferente.

Artigo 15º.-Calendario laboral e horarios.

A dirección e o comité de empresa establecerán anualmente os calendarios laborais de aplicación nos distintos departamentos, coa vixencia temporal que se pacte.

Artigo 16º.-Vacacións.

-O persoal rexido polo presente convenio colectivo terá dereito ó desfrute anual de 22 días laborables de vacacións retribuídas, distribuídas en dous períodos como máximo.

-Para os efectos deste artigo serán considerados como non laborables tódolos sábados do ano.

-A empresa non poderá requirir a un traballador para realizar tarefas nun día festivo que estivera comprendido entre dous días de vacacións.

-Non poderán compensarse en metálico, en todo ou en parte, as vacacións anuais.

-Anualmente establecerase unha programación de vacacións en cada departamento e fixaranse os criterios de gozo destas. As colisións nun período de desfrute das vacacións que poidan producirse entre dous ou máis empregados, resolveranse de acordo coas normas que respecto disto estableza a dirección da empresa coa participación da representación legal dos traballadores e que deberán estar baseadas no principio de fixar unha orde rotativa de preferencia no desfrute.

Artigo 17º.-Permisos retribuídos.

O traballador, logo de aviso e xustificación, poderá ausentarse do traballo con dereito a remuneración polos motivos e tempo dos supostos do artigo 37.3º do Estatuto dos traballadores ou disposición legal que o substitúa. Estes supostos veranse ampliados cos seguintes:

a) Por nacemento de fillos: 3 días naturais.

b) Por casamento de familiares en primeiro grao de consanguinidade: un día natural, que terá que coincidir coa data de celebración daquel.

c) Por enfermidade grave de familiar en primeiro grao de consanguinidade ou afinidade: ata dous días naturais. Se é familiar en segundo grao: un día natural.

d) Por falecemento de cónxuxe ou parella coa que conviva, pais, fillos, irmáns, avós, cuñados, xenros, noras e pais políticos: tres días naturais.

e) Por permiso para a lactación dun fillo menor de nove meses, as traballadoras terán dereito a unha hora de reducción da súa xornada diaria que poderán usar tamén de forma fraccionada ou acumulada para o seu desfrute semanal ou mensual. Así mesmo, poderase optar por acumular o total de horas de permiso por lactación e desfrutalas de forma ininterrompida a continuación da baixa por maternidade. O permiso de lactación aumentará proporcionalmente en caso de parto múltiple.

Capítulo IV

Estructura salarial

Artigo 18º.-Estructura salarial.

1. A estructura salarial de cada grupo comprende un salario base de grupo ou salario de contratación, como retribución fixa por unidade de tempo ou de obra e, de se-lo caso, complementos salariais.

2. O salario base de grupo remunera tanto a xornada como os períodos de descanso nos termos nos que estes se encontren establecidos no presente convenio colectivo.

3. A estructura salarial do persoal afectado polo convenio recóllese no anexo I.

Artigo 19º.-Complementos salariais.

Consideraranse complementos salariais aqueles de carácter persoal ou outros non vinculados exclusivamente ás condicións persoais do traballador ou á realización do traballo en cantidade e calidade.

A título enunciativo serán as seguintes:

-Complemento ad personam.

-Retribución voluntaria.

-Complemento de dispoñibilidade.

Artigo 20º.-Pagas extraordinarias.

Os traballadores terán dereito á percepción das seguintes pagas extraordinarias, que se devengarán anualmente:

a) Paga de marzo: percibirase o 15 de marzo de cada ano e o seu importe estará constituído polo salario ordinario e fixo que o traballador teña recoñecido no mes inmediatamente anterior á súa percepción.

b) Paga de xuño: percibirase o 15 de xuño de cada ano e o seu importe estará constituído polos mesmos conceptos que a paga que antecede.

c) Paga de setembro: percibirase o 15 de setembro de cada ano e o seu importe estará constituído polos mesmos conceptos que as pagas que anteceden.

d) Paga de Nadal: percibirase o 15 de decembro de cada ano e o seu importe estará constituído polos mesmos conceptos que as pagas que anteceden.

Estas pagas poderán ser rateadas en doce mensualidades, por petición expresa do traballador.

Artigo 21º.-Complemento de dispoñibilidade.

Establécese un complemento de disposición na contía de 74,44 A brutos mensuais. Percibirá este complemento o traballador que, logo de pacto coa empresa, ademais do contido específico que teña asignado, está á disposición da dirección en todo momento para cubrir necesidades de carácter eventual. Esta dispoñibilidade non suporá en ningún caso o aumento da xornada, senón a súa distinta distribución.

O devengo do dito complemento producirase por meses naturais mentres a empresa manteña o traballador en réxime de dispoñibilidade.

Artigo 22º.-Festivos.

Tódolos traballadores terán dereito a desfrutar por cada día festivo traballado, un día e medio de descanso, coa opción de que poderán solicitar que o dito día sexa compensado economicamente a razón de 74,44 A brutos por festivo traballado.

No suposto de solicita-lo descanso compensatorio, a data para o seu desfrute fixarase de común acordo coa empresa.

Artigo 23º.-Complemento de traballo dominical.

Tódolos traballadores que desenvolvan a súa xornada en domingo percibirán, en concepto de complemento dominical, a cantidade de 74,44 A brutos por domingo efectivamente traballado.

A percepción deste complemento non anula o dereito ó descanso semanal compensatorio de día e medio.

Artigo 24º.-Nocturnidade.

Enténdese por nocturnidade o complemento que perciben os traballadores que realizan a súa xornada ordinaria coincidindo en todo ou en parte entre as 22 e as 6 horas.

O xefe de cada sección comunicará á dirección da empresa a distribución das horas nocturnas de cada traballador ó seu cargo. A distribución destas horas deberá favorece-lo sistema de turnos, se ben se considerará en todo momento que cada traballador fará un número fixo de horas en horario nocturno en cómputo mensual. En cada caso remunerarase a hora nocturna a razón de 0,93 A/hora.

Artigo 25.-Axudas de custo e quilometraxe.

-Naqueles supostos en que o traballador teña que realizar desprazamentos fóra do seu centro habitual de traballo por orde ou disposición da empresa, devengará gastos de locomoción e/ou aloxamento logo de presentación de xustificante de gastos.

-A empresa aboará gastos por quilometraxe a razón de 0,18 A por quilómetro.

Artigo 26º.-Cláusula de revisión salarial.

Tódolos conceptos económicos aquí enunciados sufrirán unha suba salarial nos seguintes termos:

-Ano 2002: IPC máis un punto e medio máximo segundo táboa de beneficios anexo II ó convenio.

-Ano 2003: IPC máis un punto e medio máximo segundo táboa de beneficios anexo II ó convenio.

-Compensación da desviación que poida sufri-lo IPC real a final de ano respecto ó IPC previsto a principios de ano.

Capítulo V

Melloras sociais

Artigo 27º.-Complemento en IT.

Os traballadores en situación de incapacidade temporal (IT) percibirán un complemento ó subsidio da Seguridade Social ata completa-lo seu salario real. Na dita retribución, non se incluirán os conceptos expresamente exceptuados no presente convenio colectivo.

Artigo 28º.-Comedor de empresa.

-A empresa facilitará ó persoal que realice a prestación dos seus servicios en réxime de xornada partida no centro de traballo de Sabón, o uso do comedor da empresa.

-Pola utilización deste servicio, o traballador aboará a cantidade de 1,95 A por comida, que lle serán descontadas no seu recibo oficial de salarios mensualmente. A dita cantidade poderá ser revisada anualmente en función do incremento que experimenten os custos do servicio logo de acordo entre a representación legal dos traballadores e a empresa.

-A empresa habilitará nas instalacións do comedor un buzón de suxestións que debe estar debidamente indicado, á vista e debe ser de fácil acceso para os usuarios.

-A empresa e o comité manterán trimestralmente unha reunión para avalia-la calidade do servicio e as suxestións ou queixas que poidan existir.

Artigo 29º.-Póliza de seguros.

A empresa manterá unha póliza colectiva de seguro de vida, para garantir un capital para caso de morte ou invalidez permanente absoluta, total ou gran invalidez (segundo a clasificación da Seguridade Social recollida no Real decreto lexislativo 1/1994, do 20 de xuño) a cada un dos compoñentes do colectivo asegurado, sempre que pertenzan ó cadro de persoal fixo na empresa, en activo, e os riscos sexan aceptados, en cada caso, pola compañía aseguradora.

Capitais asegurados:

-15.025,30 A no caso de falecemento, calquera que sexa a causa que o produza e o lugar no que ocorra.

-30.050,60 A no suposto de que o asegurado resulte afectado por unha invalidez permanente absoluta, total ou gran invalidez.

No suposto de que o falecemento do asegurado se producise como consecuencia dun accidente, entendido este por toda lesión corporal debida á acción directa dun acontecemento exterior, súpeto e violento, alleo á vontade do asegurado, os habentescausa do falecido recibirán un capital adicional igual ó que se asegura para o caso de morte natural.

Artigo 30º.-Outras prestacións sociais.

1. Anualmente, con cargo á empresa, o persoal que traballe en xornada nocturna ou postos de traballo que requiran a atención ou manipulación de aparatos dotados de pantalla, poderá acudir a revisión ocular no centro médico que a empresa para tal efecto sinale.

2. Establécese un premio de natalidade na contía de 181 A (30.116 pesetas) por cada fillo, debendo acreditarse tal circunstancia documentalmente ante a empresa. No suposto de que pai e nai do nacido traballen os dous nesta empresa, só un deles terá dereito á axuda.

3. Durante a vixencia do presente convenio, os traballadores que contraian matrimonio percibirán por este concepto a cantidade de 301 A (50.082 pesetas), logo de xustificación documentada.

4. Co fin de axudar á formación e recuperación das persoas con capacidade mental ou física diminuída, a empresa concede, sempre en defecto da Seguridade Social, unha subvención de 601 A (99.998 pesetas) anuais. Terán dereito a esta subvención os familiares dos traballadores do cadro de persoal, recoñecidos pola Seguridade Social, que convivan con el e ás súas expensas. É requisito indispensable que se xustifique a formación ou recuperación realizada e que se teñan solicitado as axudas oportunas, tanto da Seguridade Social como dos demais organismos oficiais.

Artigo 31º.-Notas necrolóxicas e xornais.

-A empresa publicará gratuitamente unha necrolóxica de defunción do tamaño 2,5 c por 70 mm do empregado ou parentes consanguíneos ou afíns ata o segundo grao, no caso de falecemento.

-Todo traballador adquirirá gratuitamente a condición de subscritor de fin de semana do xornal La Voz de Galicia, a empresa porá á disposición dos traballadores/as un exemplar do diario no seu centro de traballo durante o resto da semana.

-Non obstante o anterior, todos aqueles traballadores que á data de entrada en vigor deste convenio viñeran recibindo gratuitamente o xornal La Voz de Galicia tódolos días verán consolidado este dereito.

ANEXO I

Estructura salarial (ano 2002)

Grupos profesionaisIIIIIIIV

Salario base anual 9.61712.32115.92719.834

(16 pagas)

ANEXO II

Táboa para o ano 2002-2003

Beneficios consolidados da

corporación para os exercicios 2002-2003% de incremento

(antes de impostos)

Ata 2.103.5000,25%

Desde 2.103.501 ata 4.207.0800,50%

Desde 4.207.081 ata 6.010.1200,75%

Desde 6.010.121 ata 7.512.6501,00%

Desde 7.512.651 ata 9.015.1801,25%

Máis de 9.015.1801,50%

Estas procentaxes aplicaranse sobre os conceptos salariais recollidos no convenio colectivo, incluíndose ademais os conceptos que perciba actualmente o traballador.

CONSELLERÍA DA PRESIDENCIA, RELACIÓNS INSTITUCIONAIS

E ADMINISTRACIÓN PÚBLICA