O apartado 4 da base 5ª das reguladoras das axudas do Igape ós programas de apoio á continuidade e mellora competitiva da PEME galega (DOG nº 142, do 23 de xullo de 2002), ten por obxecto os conceptos subvencionables, prevéndose no seu punto 1. b) I)

a adquisición de terreos, como gasto de investimento subvencionable.

Co fin de orienta-la instalación de empresas cara a parques empresariais de promoción pública, de promover unha adecuada ordenación industrial na nosa Comunidade Autónoma e co obxectivo de atender unha constante demanda de solo estímase conveniente que, aínda respetando os límites porcentuais xerais para o total da subvención, nos casos de ubicación da actividade en polígonos de promoción pública a subvención no concepto de terreos poida chegar ó 50%.

Na súa virtude e de conformidade coas facultades que teño conferidas

RESOLVO:

Único.-Publica-las seguintes modificacións das bases reguladoras das axudas do Igape para os programas de apoio á continuidade e mellora competitiva da PEME galega, acordadas polo Consello de Dirección do Instituto na súa reunión de data 29 de xullo de 2002:

1. Inclúese un novo punto II) na alínea b) do punto 4.1. da base 5ª coa seguinte redacción:

II) No caso de adquisición directamente ó organismo público promotor de terreos localizados en polígonos de promoción pública, concederase unha subvención do 50% do seu prezo. A contía máxima do terreo subvencionable non sobrepasará cinco veces a superficie en planta das edificacións subvencionables. O Consello de Dirección do Igape poderá acorda-la superación da porcentaxe do 50% do prezo de adquisición no caso de empresas de nova implantación na Comunidade Autónoma de Galicia, sempre que o interese estratéxico do proxecto así o aconselle.

Naqueles casos de adquisición de terreo por cambio de localización dentro da Comunidade Autónoma de Galicia, a base sobre a que se aplicará a subvención será a que resulte da diferencia entre o prezo de adquisición dos novos terreos e o valor dos da antiga localización, segundo informe de taxación subscrito por sociedade de taxación homologada.

Se dentro do prazo de vixencia establecido na resolución de concesión da subvención fosen alleados os terreos da antiga localización da empresa e o importe neto da venda resultase superior ó da taxación homologada tida en conta para os efectos da subvención, reaxustarase o importe da subvención concedida, salvo que o dito importe neto da venda fose destinado ben a amplia-lo capital da beneficiaria, ou ben a contribución patrimonial á actividade empresarial desta, no caso de autónomos.

2. O anterior punto II) da alínea b) do punto 4.1. da base 5ª pasa a ser punto III) e o punto III) pasa a se-lo punto IV).

A presente resolución entrará en vigor o día seguinte ó da súa publicación no Diario Oficial de Galicia e terá carácter retroactivo para aqueles expedientes

que se atopan en tramitación pendentes de resolver no Igape.

Santiago de Compostela, 1 de agosto de 2002.

Margarita Rodríguez Rama

Directora xeral do Instituto Galego de Promoción Económica