En cumprimento do establecido na Lei de Galicia 10/1996, do 5 de novembro, de actuación de entes e empresas nas que ten participación maioritaria a Xunta de Galicia, en materia de persoal e contratación, e de conformidade co acordo adoptado polo Padroado da Fundación para o Desenvolvemento da Comarca de Betanzos o día 23 de outubro de 2001, convócanse probas de selección para cubrir, baixo a modalidade de contratación indefinida, unha praza de xerente para facerse cargo da xestión de dita fundación.
As condicións específicas do contrato de traballo, así como as funcións que realizará o xerente da fundación, estarán á disposición dos interesados na sede da Sociedade para o Desenvolvemento Comarcal de Galicia, en diante SDC, sita na estrada Santiago-Noia km 3 - A Barcia (Santiago de Compostela). Teléfono: 981 54 26 08.
1. Requisitos xerais:
-Ter nacionalidade dun país membro da Unión Europea.
-Ser maior de 18 anos.
-Acreditar titulación universitaria de grao superior.
-Acreditar unha formación mínima de 350 horas e/ou experiencia profesional de 1 ano en planificación e desenvolvemento local-comarcal.
2. Coñecementos que se requiren:
a) Coñecementos específicos:
-Teoría e práctica do desenvolvemento comarcal: o Plan de Desenvolvemento Comarcal de Galicia.
-Teoría e metodoloxía da planificación estratéxica.
-Metodoloxía dos procesos de desenvolvemento.
-Dinámica do desenvolvemento e fases da planificación estratéxica.
-Modelos aplicados de desenvolvemento territorial: análise de casos.
-Teoría e práctica do desenvolvemento local.
-Recursos e axentes para o desenvolvemento local e comarcal.
-Programación e organización de actividades de formación, promoción e dinamización.
-Actividades de promoción e desenvolvemento comarcal.
-A animación sociocultural.Concepto.Técnicas.
-Organización de actos de promoción sectorial.
-Organización feiral en Galicia.
-A Rede de Centros Comarcais de Galicia.
-Técnicas de programación de itinerarios turísticos.
-Organización e estructura do turismo rural en Galicia.
-Estructura económica e social da comarca de Betanzos.
-Estructura e organización territorial de Galicia.
-As administracións locais. O municipio. A provincia. Outras entidades locais. Especial referencia á comarca e á parroquia.
-Formas de intervención da Unión Europea para o desenvolvemento rexional e local.
-Europa: estructura territorial e organización política e administrativa.
-As institucións europeas e o seu funcionamento.
-A Acta Única Europea. O Tratado da Unión Europea.
-As Comunidades Europeas. O ordenamento xurídico comunitario. As liberdades básicas do sistema comunitario.
-Xestión de programas e de iniciativas comunitarias.
-O asociacionismo. Concepto, características e normativa que o regula. Organización. Sistema de financiamento.
-As regulacións e normativas legais que afectan o modelo galego de desenvolvemento comarcal.
-Marco legal sobre fundacións de interese galego e de institucións sen finalidade de lucro.
-Lei de fundacións e de incentivos fiscais á participación privada en actividades de interese xeral.
-Lei de actuación de entes e empresas nas que ten participación maioritaria a Xunta de Galicia en materia de retribución de persoal e contratación.
-Normativa reguladora das organizacións non gobernamentais.
-Lei de orzamentos xerais da Comunidade Autónoma.
-O procedemento administrativo: concepto e natureza. Iniciación, ordenación, instrucción e terminación. O silencio administrativo.
-O contrato de traballo. Concepto. Natureza. Suxeitos. Capacidade para contratar. Forma. Documentación e proba.
-O Servicio Galego de Colocación (SGC).
-As medidas activas de emprego vixentes na Comunidade Autónoma.
-A planificación contable. Plan Xeral de Contabilidade. Ámbito e contido do plan. Obxectivos. Criterios de valoración. O euro: a súa reconversión e regras de redondeo.
-O Estatuto de autonomía de Galicia. Competencias da Comunidade Autónoma. A Xunta de Galicia e o seu presidente.
-O Consello da Xunta de Galicia. Organización e estructura das consellerías.
-O Parlamento de Galicia. O Valedor do Pobo. A Administración pública da Comunidade Autónoma.
-O Consello de Contas. O Consello Económico e Social.
-O protocolo e a normativa legal que o regula. Organización e coordinación de actos.
-A Lei do patrimonio cultural de Galicia.
-A Lei do Estatuto dos traballadores.
b) Coñecementos complementarios:
-Acredita-lo coñecemento da lingua galega.
-Posuír e acredita-lo coñecemento de informática a nivel usuario.
3. Documentación que hai que presentar:
-Fotocopia DNI.
-Currículum vitae xunto coa documentación orixinal ou fotocopia compulsada que acredite a titulación requirida, os coñecementos, os méritos e experiencia profesional.
-Solicitude dirixida ó presidente da fundación, segundo o modelo do anexo I.
4. Lugar e prazo de presentación.
-As solicitudes presentaranse nas dependencias da Sociedade Anónima para o Desenvolvemento Comarcal de Galicia, situada na estrada Santiago-Noia, km 3 - A Barcia. 15896 Santiago de Compostela.
-O prazo de presentación será de 20 días naturais contados a partir do día seguinte ó da publicación destas bases no Diario Oficial de Galicia.
5. Comisión de selección:
A comisión de selección estará formada polos seguintes membros:
Presidente: titular: Andrés Precedo Ledo, presidente do padroado da fundación.
Suplente: José Antonio Sangil Noya, delegado provincial da Consellería da Presidencia, Relacións Institucionais e Administración Pública na Coruña.
Secretario: titular: Manuel Brañas Abad, vicepresidente do padroado da fundación.
Vocais: José Mª Soriano Villalba, xefe de Asuntos Económicos da SDC.
José Figueroa Dávila, xefe Acción Comarcal da SDC.
Rosario Álvarez Cao, xefa de Planificación da SDC.
6. Proceso de selección:
1. Expirado o prazo de presentación de solicitudes, a comisión de selección publicará as listas previas de admitidos e excluídos, co motivo da exclusión, se é o caso, establecéndose un prazo de dez días hábiles para que, a petición do interesado, se poida reparar calquera erro que sexa emendable. Esgotado este prazo, publicaranse as listas definitivas de admitidos e excluídos e fixaranse o lugar e a data de celebración da proba de coñecementos. Os candidatos deberán asistir provistos do DNI. Estas listas publicaranse no taboleiro de anuncios da Sociedade Anónima para o Desenvolvemento Comarcal de Galicia.
2. As probas de selección consistirán en:
a) Proba escrita teórico-práctica de coñecementos (punto II.a). A puntuación máxima que se poderá acadar nesta proba é de 10 puntos. Os candidatos que non acaden a puntuación de 5 puntos nesta proba quedarán automaticamente eliminados. Os cinco candidatos que obteñan a maior puntuación na proba escrita, serán convocados á proba oral.
b) Proba oral sobre experiencia profesional en desenvolvemento territorial/local e sobre coñecementos con base na temática que se recolle nos puntos II.a) e II.b) destas bases. Os candidatos convocados deberán responder, durante un máximo de 30 minutos, ás preguntas que, sobre os citados contidos, lle sexan formuladas polos membros da comisión de selección. A puntuación máxima que se poderá acadar nesta proba é de 5 puntos, sendo necesario acadar unha puntuación mínima de 2,5 puntos para superar esta proba.
Unha vez valoradas as probas anteriores, a comisión de selección publicará no taboleiro de anuncios da Sociedade para o Desenvolvemento Comarcal de Galicia os resultados definitivos, con indicación expresa do candidato seleccionado.
Betanzos, 24 de xullo de 2002.
Andrés Precedo Ledo
Presidente do Padroado da Fundación para o
Desenvolvemento da Comarca de Betanzos
ANEXO I
D/Dna...., con DNI...., en virtude da convocatoria da praza de xerente da Fundación para o Desenvolvemento da Comarca de Betanzos,
SOLICITA:
Participar no proceso selectivo para cubrir unha praza de xerente convocada pola Fundación para o Desenvolvemento da Comarca de Betanzos mediante anuncio público desta fundación no DOG nº.... con data.... Para tal fin, xúntase documentación conforme o recollido nas bases da citada convocatoria.
Betanzos, .... de.... de 2002.
Asdo.: .....
Presidente do Padroado da Fundación para o Desenvolvemento da Comarca de Betanzos.
