Dentro do Plan de Actividades da Escola Galega de Administración Pública para o 2001 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase, en colaboración co Concello de Sada, un curso de verán sobre a propiedade intelectual na sociedade dixital convocatoria que se desenvolverá conforme as seguintes bases:
1. Obxectivos.
A propiedade intelectual, tan antiga como o propio enxeño do home, tivo unha evolución na que recibiu o impacto dos avances científicos e tecnolóxicos nun proceso de aceleración imparable na nosa época. Desde a pedra ó papiro e logo ó papel, desde o cicel á imprenta, desde a notación musical ó disco, os medios de pór á disposición do espectador ou do lector as obras do enxeño de reproducilas e de divulgalas e polo tanto, de obter un beneficio económico se desenvolveron exponencialmente. No século XX a cinematografía, a radiodifusión, a televisión, o gramófono e o disco, a posibilidade de gravar, primeiro o sonido e logo a imaxe, a irrupción da informática e a súa expansión inverosímil, a aparición da Internet, a Rede, ofrecen unhas expectativas case infinitas e propoñen á vez un cúmulo de incógnitas con non poucos problemas.
Sobre estas e outras cuestións tratará de dar resposta este curso.
2. Contido.
Trataranse estes temas:
-O traballo do actor de cine.
-Cultura e Internet; unha nova revolución. Problemática dos contidos.
-O dereito de autor na Unión Europea: normas vixentes e proxecto de directiva.
-O concepto de obra audiovisual e os seus problemas: o dereito de cita, o plaxio de formatos en TV, os cortes publicitarios, os remate de películas e outros.
-As obras multimedia.
-Os contratos electrónicos.
-Sobre a protección dos programas de ordenador.
-Os videoxogos.
-O dereito penal da propiedade intelectual. O plaxio. Os delictos cometidos a través da Internet.
-Filmación de espectáculos deportivos e dereitos de cadea.
-O dereito de autor como dereito fundamental.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: o curso convocado desenvolverase no auditorio da Casa da Cultura de Sada (A Coruña), sita na avda. do Porto, s/n, da citada localidade, os días 29 e 30 de xullo de 2002.
5. Inscrición.
-Prazo: remata o xoves, día 24 de xullo de 2002.
-Tramitación de solicitudes: as solicitudes irán dirixidas ó director da Escola Galega de Administración Pública, Polígono das Fontiñas, rúa de Madrid, 2-4 - 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 26 de xullo, de 8.30 a 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento do curso, así como o de cancelalo, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate deste curso, a aquelas persoas inscritas que concorresen asiduamente a él, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 26 de xuño de 2002.
Domingo Bello Janeiro
Director da Escola Galega de Administración
Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA