De acordo co disposto no Decreto 327/1991, do 4 de outubro, de avaliación de efectos ambientais para Galicia, na Lei 34/1998, do 7 de outubro, do sector de hidrocarburos, Regulamento xeral do servicio público de gases combustibles, aprobado polo Decreto 2913/1973, do 26 de outubro, artigos 17 da Lei de expropiación forzosa e 56 do seu regulamento, Lei 1/1997, do 24 de marzo, do solo de Galicia e demais normativa específica de aplicación, e para os efectos previstos no acordo do Consello da Xunta de Galicia do 6 de maio de 1993, polo que se designa a Consellería de Industria e Comercio como órgano competente por razón da materia para a tramitación da unidade de expediente e resolución única do procedemento, sométese a información pública o proxecto de execución e o estudio ambiental do ramal para a subministración de gas natural a Pontedeume (A Coruña), declarado de utilidade pública polo artigo 103 da citada Lei 34/1998.

Peticionario: Gas Directo, S.A., con domicilio en Capitán Haya, 53 (C.P. 28020), Madrid, titular da autorización administrativa outorgada por resolución da Dirección Xeral de Industria do 11 de decembro de 2000 para a distribución de gas natural no termo municipal de Pontedeume (A Coruña).

Obxecto da petición: estudio ambiental e aprobación do proxecto de instalacións do ramal para a subministración de gas natural a Pontedeume (A Coruña).

A autorización de instalacións que se solicita comportará, de acordo co que establecen os artigos 103 e 105 da Lei 34/1998, do 7 de outubro, os beneficios da declaración de utilidade pública e a necesidade de ocupación urxente para o efecto de expropiación forzosa dos bens e dereitos afectados necesarios para o establecemento destas instalacións e da imposición e o exercicio da servidume de paso e doutras limitacións de dominio.

Características das instalacións:

O ramal principal terá a súa orixe na conexión á estación de regulación e medida que se situará na posición I-014.2 do ramal a Ferrol (Enagás) no termo municipal de Pontedeume. Finalizará nun armario de regulación, do que partirá a futura rede de distribución.

Desde a posición de conexión, situada nas proximidades da pequena localidade de Vilamoure, ó leste de Pontedeume, o trazado do ramal toma dirección SW para baixa-lo Alto da Gandariña polo Amenedo. Discorrendo en paralelismo coa liña de máxima pendente, para así garanti-la estabilidade e seguridade da canalización, o trazado cruza a estrada AC-144, á altura da localidade de Cabria Nova.

O paso do trazado a través de zona abrupta finaliza ó atravesa-las localidades de Cabria Novoa e A Mediña de Riba. Unha vez superada a última localidade, o relevo suavízase e o trazado busca axustarse ó máximo ós camiños existentes e estremas das leiras, co fin de reduci-la afección a particulares. É nesta zona onde se situará a conexión para a subministración industrial a Pontedeume (p.k. 3.134).

De tal xeito, chégase á zona das Pantellas onde, tras cruza-la estrada que comunica Pontedeume coa Cruz do Cabildo (AC-144), finaliza o trazado do ramal no armario de regulación que se instalará nas proximidades de Pontedeume.

A presión máxima de servicio do ramal será de 16 bar relativos.

A lonxitude do ramal de subministración é de 3.287 m.

Termos municipais afectados:

Pontedeume.

Orzamento: o orzamento ascende a cincuenta millóns setecentas corenta e tres mil trescentas setenta pesetas (50.743.370 ptas.) (304.973,8 A).

Afección a predios particulares.

A afección a predios de propiedade privada derivada da construcción do ramal e as súas conexións, concrétase na seguinte forma:

Un: expropiación forzosa dos terreos sobre os que se construirán os elementos de instalación fixa en superficie.

Dous: para as canalizacións:

a) Imposición de servidume permanente de paso ó longo do trazado da conducción, cunha largura de dous (2) metros, un (1) a cada lado do eixe, por onde discorrerá soterrada a canalización ou canalizacións que se requiran para a conducción do gas. Esta servidume que se establece estará suxeita ás seguintes limitacións de dominio:

1. Prohibición de efectuar traballos de arada ou similares a unha profundidade superior a cincuenta (50) centímetros, así como de plantar árbores ou arbustos a unha distancia inferior a dous (2) metros, contados do eixe da canalización.

2. Prohibición de realizar calquera tipo de obras, construcción, edificación ou efectuar calquera acto que puidese danar ou perturba-lo bo funcionamento das instalacións, a unha distancia inferior a cinco (5) metros do eixe do trazado, a un e outro lado del. Esta distancia poderá reducirse sempre que se solicite expresamente e se cumpran as condicións que, en cada caso, fixe o órgano competente da Administración.

3. Libre acceso do persoal e equipamentos necesarios para poder manter, reparar ou renova-las instalacións, con pagamento, se é o caso, dos danos que se ocasionen.

4. Posibilidade de instala-los fitos de sinalización ou delimitación e os tubos de ventilación, así como de realiza-las obras superficiais ou subterráneas que sexan necesarias para a execución ou funcionamento das instalacións.

b) Ocupación temporal dos terreos necesarios para a execución das obras, da franxa que se reflicte para cada predio nos planos parcelarios de expropiación. Nesta zona farase desaparecer, temporalmente, todo obstáculo e realizaranse as obras necesarias para o tendido e instalación da canalización e elementos anexos, executando os traballos ou operacións precisas para os ditos fins.

Tres: para o paso de cables de conexión e elementos dispersores de protección catódica:

a) Imposición de servidume permanente de paso nunha franxa de terreo dun (1) metro de largo, por onde discorrerán soterrados os cables de conexión. Para os leitos dispersores de protección catódica, a franxa de terreo, onde se establece a imposición de servidume permanente de paso, terá como largura a correspondente á da instalación máis un (1) metro a cada lado.

Esta franxa estará suxeita ás seguintes limitacións:

1. Prohibición de efectuar traballos de arada ou similares a unha profundidade superior a cincuenta (50) centímetros, a plantar árbores ou arbustos e realizar todo tipo de obras, construcción ou edificación a unha distancia inferior a un metro e medio (1,5), a cada lado do cable de conexión ou do límite da instalación soterrada dos leitos dispersores, podendo exerce-lo dereito a cortar ou arrinca-las árbores ou arbustos que houber a distancia inferior á indicada.

2. Libre acceso do persoal e elementos necesarios para poder vixiar, manter, reparar ou renova-las instalacións, con pagamento, se é o caso, dos danos que se ocasionen.

b) Ocupación temporal, como necesidade derivada da execución das obras, da zona que se reflicte para cada predio nos planos parcelarios de expropiación

e na que se poderá facer desaparecer todo obstáculo, así como realiza-las obras necesarias para o tendido e montaxe das instalacións e elementos anexos, executando as obras ou operacións precisas para os ditos fins.

O proxecto inclúe planos parcelarios e a relación concreta e individualizada de bens e dereitos afectados.

O que se fai público para coñecemento xeral e especialmente dos propietarios de terreos e demais titulares afectados polo dito proxecto; a dita relación insírese ó final deste anuncio, para que poidan examinala na Dirección Xeral de Industria, Enerxía e Minas da Consellería de Industria e Comercio, Edificio administrativo San Caetano, s/n, Santiago de Compostela, e na Delegación Provincial da Consellería de Industria e Comercio da Coruña, praza Luis Seoane 2-edificio administrativo Monelos, e presentar por triplicado nos ditos centros as alegacións que consideren oportunas no prazo de vinte días a partir do seguinte á publicación deste anuncio.

Así mesmo, o estudio ambiental correspondente ás instalacións poderá examinarse nas dependencias da Dirección Xeral de Industria, Enerxía e Minas, Dirección Xeral de Calidade e Avaliación Ambiental, Delegación Provincial da Consellería de Industria e Comercio da Coruña, Delegación Provincial da Consellería de Medio Ambiente da Coruña e Concello de Pontedeume, podendo presentarse cantas alegacións se consideren pertinentes dentro do mesmo prazo sinalado no parágrafo anterior.

Santiago de Compostela, 18 de abril de 2002.

Ramón Ordás Badía

Director xeral de Industria, Enerxía e Minas

Relación concreta e individualizada de bens e dereitos afectados

Proxecto: distribución de gas en Pontedeume Provincia da Coruña Concello: Pontedeume

Abreviaturas utilizadas: SE: expropiación en dominio SP: servidume de paso OT: ocupación temporal POL: polígono PAR: parcela