O Consello de Dirección do Igape, na súa reunión do 13 de xullo de 2001 aprobou as bases reguladoras das axudas do Igape para os programas de apoio á continuidade e mellora competitiva da PEME galega, publicadas mediante Resolución do 13 de xullo de 2001 (DOG nº 142, do 23 de xullo).
Co fin de procurar un acercamento gradual ó proceso de elaboración dos diagnósticos empresariais, estímase conveniente a habilitación dun período transitorio para os anos 2002 e 2003, nos que a presentación dun diagnóstico previo non sexa un requisito imprescindible para acomete-los proxectos de mellora competitiva para as Pemes, incentivando non obstante a súa elaboración a través da axeitada graduación da axuda.
Na súa virtude e de conformidade coas facultades que teño conferidas,
RESOLVO:
Único.- Publica-la modificación das bases reguladoras das axudas do Igape para os programas de apoio á continuidade e mellora competitiva da PEME galega, acordada polo Consello de Dirección do instituto na súa reunión do 5 de marzo de 2002, engadindo nas ditas bases a seguinte disposición:
Disposición transitoria
Coa intención de que as Pemes galegas poidan face-lo esforzo de diagnose e planificación estratéxica progresivamente, habilítase un período transitorio ata final de 2003, no que o diagnóstico empresarial esixido para acceder ás axudas á implantación de melloras competitivas non será obrigatorio. Durante este período, o diagnóstico empresarial formará parte dos criterios preferentes de concesión e, polo tanto, a súa presentación como fundamento das propostas de acción incrementará significativamente a intensidade da axuda que se conceda ós proxectos aprobados.
A presente resolución entrará en vigor o día seguinte ó da súa publicación no Diario Oficial de Galicia.
Santiago de Compostela, 25 de marzo de 2002.
Margarita Rodríguez Rama
Directora xeral do Instituto Galego
de Promoción Económica