Dentro do Plan de actividades da Escola Galega de Administración Pública para 2002 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas Xornadas sobre o municipio desde a perspectiva do século XXI, convocatoria que se desenvolverá conforme as seguintes bases:
1. Obxectivos.
Realizar unha análise exhaustiva da realidade municipal desde diferentes perspectivas (xurídica, política, sociolóxica, económica ...) coa finalidade de coñece-los retos e desafíos que deben afronta-los entes locais no inaugurado século XXI.
2. Contido.
Trataranse estes temas:
-A autonomía local na Constitución española. Proxección administrativa e financeira deste principio constitucional.
-A articulación do ordenamento europeo, estatal e autonómico na configuración do réxime xurídico do municipio.
-As competencias municipais: delimitación legal e realidade práctica.
-A xestión dos servicios locais: novos retos.
-A cooperación provincial na prestación de servicios de competencia municipal: situación actual e perspectivas de futuro.
-A función pública local: situación actual e perspectivas de futuro.
-O financiamento municipal e a suficiencia financeira das facendas locais.
-Estratexias para o desenvolvemento comarcal en Galicia.
-Os pactos locais autonómicos: particularidades da Comunidade Autónoma de Galicia.
-Propostas e iniciativas municipais para o futuro inmediato.
-Relacións das entidades locais co Estado e as comunidades autónomas. Consecuencias para os municipios e as provincias da integración na Unión Europea.
-A situación económico-financeira das entidades locais a través das súas contas. Incidencia da Lei de estabilidade orzamentaria nas entidades locais.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas desenvolveranse no salón de actos da Delegación Provincial da Consellería da Presidencia, Relacións Institucionais e Administración Pública na Coruña (praza de Pontevedra, s/n, da citada cidade) os días 9 e 10 de abril de 2002.
5. Inscrición.
-Prazo: remata o venres, día 5 de abril de 2002.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 8 de abril, de 8.30 a 14:30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 11 de marzo de 2002.
Domingo Bello Janeiro
Director da Escola Galega de Administración Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA