Aprobadas pola Comisión de Goberno as bases qeu rexerán na oposición libre para a provisión, en propiedade, de catro prazas de axentes da Policía Local do Concello de Cambados, incluídas na oferta de emprego público de 2001, faise público un extracto delas, publicándose o seu texto íntegro no BOP de Pontevedra.
Obxecto da convocatoria.-A provisión, en propiedade, mediante oposición libre, de catro prazas de axentes da policía local, encadradas no grupo D, nivel 16 e dotadas coas retribucións que figuran no cadro correspondente do orzamento municipal.
Condicións dos aspirantes.-Ser español. Ter cumpridos 18 anos e non supera-los 30. Atoparse en posesión do título de graduado escolar, FP1, ou equivalente. Non estar inhabilitado para o exercicio das funcións públicas, nin separado do servicio das administracións públicas. Ser titular do permiso de conducir das clases A ou A e B máis B.T.P. Posuír unha estatura mínima de 1,70 m para homes e 1,65 m para mulleres. Comprometerse a portar armas e, se é o caso, chegar a utilizalas. Acredita-la aptitude física mediante a presentación de certificado médico. Non ter antecedentes penais. Todos estes requisitos deberán ser referidos á data na que remate o prazo de presentación de instancias.
Solicitudes e admisión.-As instancias solicitando tomar parte na oposición ás que os aspirantes engadirán fotocopia do DNI e os xustificantes esixidos nas alineas e), g) e h) da base 2 dirixiranse ó alcalde-presidente, durante o prazo de vinte (20) días naturais, contados do seguinte ó da publicación do extracto do anuncio da convocatoria no DOG. Os dereitos de exame fíxanse na cantidade de 12,02 A. A lista provisional de aspirantes admitidos e excluídos farase pública no BOP de Pontevedra.
Tribunal cualificador.-O tribunal cualificador estará composto do seguinte xeito: presidente, alcalde ou membro da corporación en quen delegue. Secretario, o da corporación ou funcionario en quen delegue. Vocais, un representante da Xunta de Galicia; un funcionario de carreira e un representante dos sindicatos máis representativos no concello. A composición do tribunal farase pública no BOP.
Probas da oposición.-Con carácter previo ó comezo das probas, realizarase a práctica de control de estatura e demais medidas antropométricas e un exame psicotécnico.
Probas de capacitación física.-Consistirán en: proba de resistencia; proba de velocidade; proba de lanzamento; forza flexora, salto de lonxitude e salto de altura.
Exercicio teórico.-Consistirá en desenvolver por escrito, durante o prazo máximo de dúas horas, dous temas dos incluídos no programa anexo ás bases da convocatoria.
Exercicio práctico.-Consistirá en desenvolver un suposto práctico proposto polo tribunal, durante un prazo máximo de dúas horas.
Curso selectivo de formación.-Para o ingreso definitivo, será requisito indispensable a superación dun curso selectivo na Academia Galega de Seguridade.
Obtención das bases íntegras.-As bases íntegras, co programa correspondente (ademais da súa publicación no BOP), poderán conseguirse nas oficinas municipais.
Cambados, 4 de febreiro de 2002.
José M. Cores Tourís
Alcalde