O Pleno da Corporación, en sesión do 24-11-2001, adoptou o seguinte acordo:

«Primeiro.-Suspende-lo outorgamento das licencias municipais para o establecemento ou instalación dos usos das infraestructuras precisas para o desen

volvemento do servicio de telefonía móbil en xeral e estacións bases e antenas en concreto, fundamentada na conveniencia de estudia-la reforma do planeamento de ordenación municipal en vigor, aprobado por Orde do 18-12-1989, e sen prexuízo da posible redacción dun plan especial de ordenación desas infraestructuras.

Facer constar que esta alcanza a todo o termo municipal, con independencia das clasificacións de solo deste, e terá unha duración máxima dun ano, a contar desde o momento da publicación deste acordo de suspensión, agás que con anterioridade a esa data o Pleno da Corporación adoptase o acordo de aprobación inicial, entendéndose entón transcorrido un ano desde a adopción dese acordo.

Segundo.-Dispoñe-la constitución dunha comisión pluridisciplinar para o seguimento do estudio da modificación ou reforma do Plan Xeral de Ordenación Urbana en canto á regulación desta cuestión, na que poidan estar representadas as administracións públicas, escolas ou facultades universitarias especializadas na cuestión, operadores de telefonía, asociacións de veciños que se considere procedente, para a mellor representación dos intereses afectados nesta cuestión.

Terceiro.-Dirixirse ó Ministerio de Ciencia e Tecnoloxía, co fin de que se remitan a este concello os informes e recomendacións que estime oportunos para a regulación desta cuestión no instrumento municipal de ordenación».

O que se fai público para a súa executividade, significándose que contra este acto, que pon fin á vía administrativa, poderá interpoñerse ben o recurso potestativo de reposición perante o mesmo órgano que a dictou e no prazo dun mes contado desde o día seguinte ó da súa notificación, consonte o establecido no artigo 116.1º da Lei 30/1992, do 26 de novembro, na redacción dada pola Lei 4/1999, pola que se modifica a primeira, ou ben directamente o recurso contencioso-administrativo perante a Sala do Contencioso-Administrativo do Tribunal Superior de Xustiza de Galicia no prazo de dous meses, contados a partir do día seguinte ó da súa notificación, consonte o disposto nos artigos 8.1º e 46.1º da Lei 29/1998, do 13 de xullo, da xurisdicción contencioso-administrativa.

De interpoñerse o recurso potestativo de reposición, este deberá ser resolto e notificado no prazo dun mes, segundo se establece no artigo 117.2º da citada Lei 30/1992, modificada pola Lei 4/1999, entendéndose desestimado polo transcurso do mencionado prazo sen resolución expresa, de conformidade co establecido no artigo 43.2º desta Lei 30/1992, podendo entón interpoñerse recurso contencioso-administrativo dentro do prazo de seis meses contado desde o día seguinte daquel no que deba entenderse presuntamente desestimado o recurso de reposición interposto, consonte o establecido no artigo 46.1º e 4º da Lei 29/1998.

Non obstante, tamén se poderá interpoñer calquera outro recurso que os interesados estimen procedentes conforme a dereito.

Pontevedra, 13 de decembro de 2001.

Adolfo Castro Pérez

Secretario accidental

P.D.

Xosé Cesáreo Mosquera Lorenzo

Teniente alcalde delegado da Área de Urbanismo e Medio Ambiente