O artigo 3.1º g) da Lei 10/1989, do 10 de xullo, de modificación da Lei 4/1987, do 27 de maio, de creación da Escola Galega de Administración Pública, considera entre os fins da EGAP a investigación, a documentación, o estudio e a realización de traballos de divulgación no eido da Administración pública, promovendo a súa máxima difusión.
En execución do plan de actividades da EGAP para o ano 2002 e de conformidade coa referida lei, convócanse dúas bolsas de linguaxe administrativa galega, segundo as seguintes bases:
Primeira.-Obxecto.
A Escola Galega de Administración Pública convoca dúas bolsas de linguaxe administrativa galega para a realización na Escola Galega de Administración Pública, de estudios e prácticas sobre linguaxe administrativa galega.
Segunda.-Duración e dotación económica.
As tarefas relativas a estas bolsas iniciaranse a partir da incorporación dos bolseiros e rematarán o 31 de decembro de 2002. Poderán ser prorrogadas, en función do aproveitamento do adxudicatario, sempre que exista crédito adecuado e suficiente por un ano ou, se é o caso, ata que se resolva a convocatoria do ano 2003.
A dotación económica de cada bolsa será de 871 euros mensuais brutos coa retención fiscal que corresponda. Respecto ó pagamento, observarase o disposto no artigo 78 do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, e o artigo 40 da Lei 4/2000, do 27 de decembro, de orzamentos xerais da Comunidade Autónoma de Galicia para o ano 2001, acordando o pagamento parcial á conta da liquidación definitiva a medida que se xustifiquen os libramentos anteriores, ata a porcentaxe do 80% da subvención concedida. O importe citado será pagado mensualmente na conta bancaria indicada polo interesado, logo da certificación emitida polo xefe do Servicio de Estudios, Investigación e Publicacións da EGAP, acreditativa das tarefas executadas.
Os pagamentos serán efectuados pola EGAP con cargo á aplicación orzamentaria 04.50.122 A.480.00 dos orzamentos xerais da Comunidade Autónoma de Galicia para 2001, que se prorrogaron para o exercicio de 2002 polo Decreto 401/2001, do 28 de decembro e pola orde de desenvolvemento do 29 de decembro de 2001.
Antes de proceder ó último pagamento, os beneficiarios deberán efectuar unha declaración xurada ou responsable conforme non desfrutaron doutra bolsa que a adxudicada en virtude desta convocatoria.
Terceira.-Natureza xurídica da relación.
A condición de bolseiro non xerará unha relación laboral nin administrativa coa Xunta de Galicia, nin a súa inclusión na Seguridade Social. Será incompatible co destrute doutras bolsas.
Cuarta.-Requisitos dos participantes.
Poderán optar ás bolsas as persoas que reúnan os seguintes requisitos:
a) Ser licenciado/a en filoloxía galega.
b) Acreditar formación e/ou experiencia en materias relacionadas co obxecto da convocatoria.
c) Acreditar formación e/ou experiencia en informática.
Quinta.-Solicitudes.
As persoas interesadas presentarán no rexistro da Escola Galega de Administración Pública, dentro dos quince días naturais seguintes ó da publicación desta convocatoria, a seguinte documentación:
a) Unha instancia de admisión para participar nas probas de selección, segundo o modelo anexo.
b) Certificación académica na que se detallen as cualificacións obtidas na licenciatura.
c) Documentos que acrediten a formación e/ou experiencia esixida nos puntos 4.b e 4.c.
d) Memoria descritiva, en tres folios como mínimo e cinco como máximo, das tarefas de colaboración dun bolseiro en materia de linguaxe administrativa galega nun centro de formación de funcionarios públicos.
e) Declaración xurada ou responsable comprometéndose a renunciar se fose seleccionado para outra bolsa.
Sexta.-Tribunal.
Presidente: o secretario xeral da Escola Galega de Administración Pública.
Vocal: un profesor colaborador da EGAP en materia de linguaxe administrativa galega.
Secretario: o xefe do Servicio de Estudios, Investigación e Publicacións da EGAP.
Sétima.-Criterios para a selección dos bolseiros.
A selección realizarase mediante a valoración dos méritos acreditados conforme o seguinte baremo:
a) Expediente académico: ata catro puntos.
b) Formación ou experiencia en temas relacionados co obxecto desta bolsa: ata catro puntos.
c) Coñecementos de informática: ata dous puntos.
d) Memoria: ata cinco puntos.
O tribunal non valorará aqueles méritos dos candidatos que non estean acreditados documentalmente.
O tribunal poderá realizar unha entrevista cos aspirantes. Á vista da valoración dos méritos dos candidatos, o tribunal determinará a puntuación mínima para acceder á entrevista A entrevista versará sobre os seus méritos curriculares e a memoria, e terá unha duración máxima de quince minutos. A puntuación máxima pola entrevista non superará o 25% da que corresponda pola aplicación do baremo.
Finalmente, o tribunal fará pública no taboleiro de anuncios da EGAP a relación de candidatos por orde de puntuación.
Oitava.-Réxime de colaboración.
Os aspirantes seleccionados incorporaranse, logo da aceptación da bolsa, no prazo de tres días naturais seguintes ó da notificación do outorgamento.
Os bolseiros prestarán a súa colaboración, baixo as indicacións do xefe do Servicio de Estudios, Investigación e Publicacións, en horario de mañá e/ou tarde, de luns a venres na Escola Galega da Administración Pública. Os traballos realizados quedarán en propiedade da EGAP.
Os bolseiros presentarán ó remate da bolsa un informe sobre os traballos realizados.
Así mesmo, deberán asistir ás actividades que a EGAP considere convenientes para a súa formación. Os gastos ocasionados con motivo destas actividades serán pagados pola EGAP, logo de que o xefe do Servicio de Estudios, Investigación e Publicacións certifique os gastos producidos; os gastos de desprazamento, aloxamento e mantenza non poderán supera-la contía establecida para o grupo II do Decreto 144/2001, do 7 de xuño, sobre as indemnizacións por razón do servicio ó persoal con destino na Administración autonómica de Galicia.
No caso de que un adxudicatario por calquera motivo non poida presta-la súa colaboración, será substituído polo candidato seguinte por orde de puntuación. En caso de renuncia á bolsa, non se enten
derá que existe incumprimento das condicións establecidas para a súa concesión, sempre e cando o órgano xestor certifique o correcto desempeño por parte do bolseiro das tarefas inherentes á bolsa, garantindo a continuidade delas coa substitución por outro bolseiro. Cando a data da renuncia non coincida co derradeiro día de cada mes, aboarase a parte proporcional correspondente ó desfrute da bolsa.
Novena.-Anulación da bolsa.
No caso de incumprimento das tarefas de colaboración a EGAP poderá, por proposta do xefe de Servicio de Estudios, Investigación e Publicacións, e logo de escoita-la persoa afectada, anula-la bolsa.
A solicitude das bolsas implica o coñecemento e a aceptación destas bases.
Décima.-Resolución e recursos.
A resolución administrativa relativa á concesión ou denegación da bolsa seralles notificada ós interesados no prazo de seis meses, contados a partir da publicación desta resolución no Diario Oficial de Galicia. Esgotado o dito prazo sen resolución expresa, deberá entenderse desestimada a petición por silencio administrativo.
As resolucións expresas ou presuntas que se dicten esgotarán a vía administrativa e poderá interpoñerse, chegado o caso, recurso potestativo de reposición perante o director da Escola Galega de Administración Pública no prazo dun mes, contado a partir do día seguinte ó da súa notificación, se fose expresa, ou no prazo de tres meses, contados desde o día seguinte a aquel no que se producise o acto presunto, se non o fose. Tamén se poderá optar por interpor directamente recurso contencioso-administrativo no prazo de dous meses, contados desde o día seguinte á súa notificación, se o acto fose expreso, e, se non o fose, o prazo para interpolo será de seis meses, contados desde o día seguinte a aquel no que se produza o acto presunto, sen prexuízo de que os interesados poidan interpor calquera outro que consideren oportuno.
Santiago de Compostela, 28 de xaneiro de 2002.
Domingo Bello Janeiro
Director da Escola Galega de Administración
Pública
