Dentro do plan de actividades da Escola Galega de Administración Pública para o 2001 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración co Centro de Estudios Jurídicos Superiores (Cejus), unhas Xornadas sobre o novo regulamento da Lei de contratos das administracións públicas; convocatoria que se desenvolverá conforme as seguintes bases:

1. Obxectivos.

Mellora-la formación dos asistentes e abrir un debate sobre os aspectos máis salientables e as novidades do Real decreto 1098/2001, do 12 de outubro, polo que se aproba o Regulamento xeral da Lei de contratos das administracións públicas.

2. Contido.

Trataranse estes temas:

-O réxime xurídico da clasificación das empresas contratistas: criterios de clasificación e procedemen

to administrativo. O Rexistro Oficial de Empresas Clasificadas e o Rexistro Público de Contratos.

-As garantías esixibles nos contratos coas administracións públicas.

-Novidades introducidas nas actuacións relativas á contratación: pregos de cláusulas administrativas xerais, a formalización dos contratos, actuacións preparatorias e adxudicación de contratos.

-Novidades introducidas en materia de execución, modificación e extinción de contratos administrativos.

-Réxime xurídico do contrato de obras: novidades introducidas.

-Novidades introducidas no réxime xurídico do contrato de xestión de servicios públicos e de subministracións. Referencia ós contratos de consultoría e asistencia e ó de servicios.

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: as xornadas convocadas desenvolveranse no salón de actos da Escola Galega de Administración Pública (rúa de Madrid, 2-4, polígono das Fontiñas en Santiago de Compostela), os días 3 e 4 de decembro de 2001.

5. Inscrición.

-Prazo: remata o xoves, día 29 de novembro de 2001.

-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4 - 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión, chamando por teléfono, o día 30 de novembro, das 8.30 ás 14.30 horas, ós seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate destas xornadas, a aquelas persoas inscritas que concorresen asiduamente a ela, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e a data da súa realización.

8. Retransmisión por Internet.

As persoas interesadas en segui-lo desenvolvemento destas xornadas por Internet poden facelo a través do seguinte enderezo: www.egap.xunta.es.

Santiago de Compostela, 12 de novembro de 2001.

Domingo Bello Janeiro

Director da Escola Galega de Administración Pública