O Consello da Xerencia Municipal de Urbanismo, en sesión do 28 de xuño de 2001, adoptou, entre outros, o seguinte acordo:

Primeiro.-Emitir informe no sentido recollido na parte expositiva do presente acordo sobre a documentación presentada pola xunta de compensación da U.E. I-03 Metalúrxica para a expropiación da parcela de 1.129 m de superficie incluída no devandito polígono, inscrita no Rexistro da Propiedade a favor de Renfe, considerando a falta de incorporación desta á xunta de compensación do polígono.

Segundo.-Sométese o proxecto de expropiación (expediente 129/413) ó trámite de información pública polo prazo dun mes, mediante publicación de anuncios no Diario Oficial de Galicia e nun xornal dos de maior circulación da provincia, así como a notificación individual con traslado literal da correspondente folla de aprecio e da proposta de fixación dos criterios de valoración á entidade expropiada Renfe.

Procédese ó trámite de información pública do citado proxecto significando que o prazo de exposición se entenderá aberto desde a primeira publicación ata o remate do mes contado desde o derradeiro anuncio. A documentación atópase na Oficina de Información da Xerencia Municipal de Urbanismo ó dispor do público.

O presente anuncio servirá de notificación nos termos do artigo 59 da Lei de réxime xurídico das administracións públicas e do procedemento administrativo común para tódolos propietarios e interesados directamente afectados que, por resultaren descoñecidos ou ignorándose o seu enderezo non poidan ser notificados persoalmente.

Vigo, 13 de xullo de 2001.

Lois Pérez Castrillo

Alcalde-presidente da Xerencia

Municipal de Urbanismo