Dentro do plan de actividades da Escola Galega de Administración Pública para o 2001 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración co Concello de Sada (A Coruña), unhas Xornadas sobre violencia doméstica; convocatoria que se desenvolverá conforme as seguintes bases:

1. Obxectivos.

A sociedade española foi tomando consciencia paulatinamente non só da violencia doméstica como mal social xeneralizado, na que a súa víctima propiciatoria máis frecuente é a muller, senón tamén da auténtica gravidade que este problema comporta. Na actualidade, as agresións á muller superaron as fronteiras do fogar e pasaron a ser consideradas como un atentado cara á propia sociedade e un ataque ó corazón da democracia.

Por isto, faise necesario insistir na sensibilización da sociedade fronte a este fenómeno, que non é novo, pero que empeza a coñecerse mellor, porque funcionan mellor os mecanismos de alerta e cambiou o talante das mulleres maltratadas que saíron do silencio e denuncian os maltratos sen reservas nin medo, sen a tradicional resignación a seguir sendo golpeadas unha e outra vez.

O Goberno, consciente desta necesidade, elaborou, en colaboración coas comunidades autónomas e a Federación de Municipios e Provincias, o Plan de Acción contra a Violencia Doméstica 1998-2000, onde recolle os obxectivos e medidas que no ámbito das súas competencias considera necesario que se vaian poñendo en marcha para erradicala e facer posible a resposta social adecuada que sirva para palia-los efectos prexudiciais padecidos polas víctimas destas agresións.

A análise deste fenómeno social para procura-la súa solución e se fora posible, previr que xurda, é aquí e agora o tema destas xornadas, nas cales se convocaron para pensar xuntos non só xuristas, avogados, fiscais, xuíces, senón sociólogos e psicólogos polo carácter pluridisciplinar do problema.

2. Contido.

Trataranse estes temas:

-A violencia familiar como fenómeno criminolóxico. Factores sociais e xurídicos.

-A violencia familiar no ámbito do dereito civil.

-O delicto de acoso sexual: entre os límites da necesidade e o desconcerto.

-A violencia doméstica na súa dimensión penal.

-A organización xudicial fronte ó reto da violencia doméstica. A posición do Ministerio Fiscal.

-A análise sociolóxica da violencia no ámbito familiar.

-Propostas para unha reforma legal integral en materia de violencia doméstica.

-O acoso sexual na súa perspectiva constitucional.

-A violencia intrafamiliar.

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: as xornadas convocadas desenvolveranse no salón de actos da Casa da Cultura de Sada (A Coruña), (avda. do Porto, s/n, da citada localidade) os días 23 e 24 de xullo de 2001.

5. Inscrición.

-Prazo: remata ás 10.30 horas do mesmo día de comezo destas xornadas.

-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

Os peticionarios poderán obter confirmación da súa admisión, chamando por teléfono, ata o mesmo día do comezo das xornadas, de 8.30 a 14.30 horas, ós seguintes números: 981 54 62 39/44 ou 981 54 60 40, ou no mostrador de recollida da documentación na sede desta actividade.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 11 de xullo de 2001.

Domingo Bello Janeiro

Director da Escola Galega de Administración Pública