Galego | Castellano

DOG - Xunta de Galicia -

Diario Oficial de Galicia
DOG Núm. 120 Xoves, 21 de xuño de 2001 Páx. 8.361

III. OUTRAS DISPOSICIÓNS

CONSELLERÍA DE XUSTIZA, INTERIOR E RELACIÓNS LABORAIS

RESOLUCIÓN do 8 de maio de 2001, da Delegación Provincial de Pontevedra, pola que se dispón o rexistro, o depósito e a publicación, no Diario Oficial de Galicia, do convenio colectivo do sector de empresas exportadoras de peixe fresco.

Visto o texto do convenio colectivo para o sector de empresas exportadoras de peixe fresco, con nº de código 3600615, que tivo entrada nesta delegación provincial o día 3-5-2001, subscrito en representación da parte económica pola Asociación de Comercialización de Pescado de Vigo, e da parte social, pola central sindical CC.OO., en data 28-3-2001. De conformidad co disposto no artigo 90.2º e 3º, do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo, esta delegación provincial

ACORDA:

Primeiro.-Ordena-la súa inscrición no libro de rexistro de convenios colectivos de traballo, exis

tente nesta delegación provincial, e a notificación ás representacións económica e social da comisión negociadora.

Segundo.-Ordena-lo seu depósito no Servicio de Relacións Laborais, Sección de Mediación, Arbitraxe y Conciliación.

Terceiro.-Dispoñe-la súa publicación no Diario Oficial de Galicia.

Vigo, 8 de maio de 2001.

Antonio Coello Bufill

Delegado provincial de Vigo

Convenio colectivo de traballo para as empresas exportadoras de peixe fresco da provincia de Pontevedra.

I. Condicións xerais.

Artigo 1º.-Ámbito de aplicación.

Nos seus aspectos territorial, funcional e persoal, o presente conveno colectivo afecta ás empresas que teñan como actividade o comercio por xunto de peixe fresco da provincia de Pontevedra. Afectará a todo o persoal que preste os seus servicios nas citadas empresas e nos seus distintos postos de traballo.

Artigo 2º.-Vixencia e duración.

Entrará en vigor ós 20 días da súa sinatura, independentemente da súa publicación no BOP.

A súa duración establécese para os anos 2001 e 2002, e os seus efectos económicos enténdense retrotraídos ó día 1 de xaneiro de 2001.

Artigo 3º.-Denuncia.

O convenio entenderase prorrogado tacitamente por un ano, salvo que sexa denunciado por algunha das partes nos tres últimos meses da súa duración.

Artigo 4º.-Condición máis beneficiosa.

Tódalas melloras obtidas neste convenio establécense con carácter de mínimas. Os pactos actualmente existentes en calquera empresa ou costume máis beneficioso sobre condicións de traballo serán respectados.

Artigo 5º.-Absorción e compensación.

Terán carácter de absorbibles aquelas melloras existentes pactadas ou que durante a vixencia do convenio, por disposicións legais, se puidesen establecer.

Artigo 6º.-Comisión mixta de vixilancia.

Para unha mellor interpretación e cumprimento do texto articulado do presente convenio constitúese a comisión mixta de vixilancia, composta por 3 vocais e igual número de suplentes, por cada unha das partes, que velará polo estricto cumprimento da lexislación laboral vixente; ámbalas partes, logo de acordo, designarán o presidente e secretario desta comisión mixta de vixilancia.

II. Condicións laborais.

Artigo 7º.-Xornada de traballo.

A xornada será de 36 horas semanais de traballo efectivo, de luns a sábado, ambos incluídos, e comezará á hora establecida para a poxa de peixe, actualmente fixada ás 7.30 horas.

Calquera modificación que haxa na hora da poxa implicará, de forma previa a calquera modificación no inicio da xornada, o seu debate na comisión mixta de vixilancia do convenio.

Por ser xornada continua, establécese un descanso de 30 minutos que desfrutarán os traballadores entre as 9 e as 12 horas, logo de acordo en cada caso coa respectiva empresa.

Sen prexuízo da xornada exposta, páctase a flexibilidade no sentido de que, unha vez finalizadas as tarefas, se entenderá igualmente finalizada a xornada, contándose as horas non traballadas unicamente para os efectos do cómputo que proceda para horas extraordinarias.

Artigo 8º.-Vacacións.

O descanso anual retribuído do persoal comprendido no presente convenio é de 30 días naturais, establecéndose a data para o seu desfrute desde o 15 de xuño ó 15 de setembro, sempre que fose posible. Con tal fin confeccionarase unha lista de vacacións, que deberá estar exposta nas empresas antes do 31 de marzo e fixarase no primeiro trimestre do ano, por orde de antigüidade e orde rotativa nos sucesivos anos. Se non hai acordo, o empresario sinalará quince días e o traballador outros quince.

Artigo 9º.-Licencias con soldo.

Todo traballador terá dereito a licencia retribuída polas circunstancias e días naturais que se indican:

a) Por matrimonio: 20 días

b) Por falecemento de cónxuxe: ascendentes, descendentes, irmáns, sogros e cuñados: 5 días. Por falecemento de avós políticos: 1 día.

c) Por enfermidade grave dos familiares anteriormente citados, a excepción do avó político, así como por nacemento de fillo: de 2 a 5 días, dependendo das circunstancias e especialmente do desprazamento a que o tal feito dea lugar.

d) Por cambio de domicilio: 1 día.

Artigo 10º.-Incorporación ó servicio militar.

Durante o tempo que o traballador permaneza incorporado ó servicio militar, reservaráselle a praza que viña desempeñando ata dous meses despois do seu licenciamento. Contarase o tempo que permaneza no servicio militar para efectos de antigüidade, e durante a súa permanencia nel aboaránselle as pagas extraordinarias que se estipulen no presente convenio.

Artigo 11º.-Compensación por vestiario.

Co obxecto de que todo o persoal adquira e use a roupa, luvas e calzado adecuados ó traballo que

realice, aboarase en nómina, calquera que sexa a súa xornada laboral e baixo o epígrafe de vestiario a cantidade de 2.924 pesetas mensuais. Para o ano 2002, esta cantidade será de 3.041 pesetas mensuais. Este importe poderase incrementar sempre que esteamos en presencia das circunstancias que se establecen no artigo 13º revisión salarial.

O dito complemento non se percibirá en vacacións, enfermidade, accidentes de traballo e pagas extraordinarias, tendo carácter extrasalarial para tódolos efectos.

Artigo 12º.-Día da patroa.

Establécese como día festivo non recuperable o día 16 de xullo, día da Virxe do Carme, sempre e cando se chegue ó acordo e descansen os traballadores da colla.

III. Condicións económicas.

Artigo 13º.-Retribucións.

O persoal afectado por este convenio percibirá, segundo a súa categoría laboral, o salario base que se especifica na táboa salarial anexa.

O pagamento dos atrasos correspondentes por aplicación da dita táboa desde primeiros de ano serán aboados no mes de maio de 2001. Para o ano 2002, a táboa salarial anexa incrementarase no 4 % desde o primeiro de xaneiro, porcentaxe que se aplicará sobre a táboa salarial do exercicio 2001.

Revisión salarial: no caso de que o IPC real establecido polo INE rexistrase un incremento desde o 1 de xaneiro ó 31 de decembro de 2002 superior ó 4%; efectuarase unha revisión salarial consistente en lles aboar ós traballadores a diferencia que, se é o caso, se producise entre a suba do IPC real e o 4% que xa se lles aboara en 2002.

Esta diferencia, en caso de se producir, aboarase durante o mes de febreiro de 2003.

Para levar a cabo tal revisión tomaranse como referencia os salarios ou táboas utilizados para realiza-los aumentos pactados para o ano 2002.

Artigo 14º.-Gratificacións extraordinarias.

O persoal afectado polo presente convenio percibirá tres pagas extraordinarias, baixo a denominación de xullo, Nadal e beneficios, consistentes en 30 días de salario máis antigüidade e que se farán efectivas os días 15 de xullo, 20 de decembro e 31 de marzo, respectivamente.

Artigo 15º.-Antigüidade.

En concepto de antigüidade aboaranse cuadrienios, que se acumularán a todo productor ata a súa xubilación. O valor de cada cuadrienio fíxase nun 6 % sobre a remuneración que corresponde a cada categoría.

Artigo 16º.-Horas extraordinarias.

Consideraranse horas extraordinarias aquelas que superen as 36 horas de traballo efectivo no seu cómputo semanal, téndose en conta, por tanto, o pactado

ó respecto sobre flexibilidade de xornada, sen que isto significque variación ou deterioración do disposto legalmente de considerarse hora extraordinaria aquela que supere as 9 horas de traballo efectivo diario.

Fíxase un incremento do 100% para as dúas primeiras horas extraordinarias e do 200% para as restantes.

Artigo 17º.-Axudas de custo.

Cando por necesidade do traballo o traballador teña que comer ou cear fóra do domicilio, a empresa estará obrigada a lle aboa-lo importe de 2.226 ptas. por cada unha delas. Para o exercicio 2002 esta cantidade será de 2.315 pesetas. Este importe poderase incrementar sempre que esteamos en presencia das circunstancias que se establecen no artigo 13º revisión salarial.

Artigo 18º.-Prima en especie.

Respectarase, onde exista, o costume de lles facilitar peixe ós traballadores para o seu consumo propio.

Artigo 19º.-Complemento de transporte.

Os traballadores afectados polo presente convenio percibirán por tal concepto, calquera que sexa a súa xornada laboral, a cantidade de 14.629 pesetas. Para o ano 2002 esta cantidade será de 15.214 pesetas mensuais. Este importe poderase incrementar sempre que esteamos en presencia das circunstancias que se establecen no artigo 13º revisión salarial.

Artigo 20º.-Complementos, prestacións, Seguridade Social.

As empresas aboaranlles ós seus traballadores en situación de incapacidade laboral transitoria (ILT) a diferencia entre as prestacións económicas da Seguridade Social que lle correspondan e o seu salario máis antigüidade.

Para evita-lo absentismo fraudulento ou reiterado, a comisión mixta constituirase en comisión de vixilancia, actuando por denuncia do empresario, e quedando facultada para anularlle este beneficio ó traballador en cada caso concreto.

Artigo 21º.-Negociación colectiva.

O texto do convenio colectivo de ámbito provincial para as empresas que teñan como actividade a do comercio de exportación por xunto de peixe fresco da provincia de Pontevedra é subscrito pola Asociación de Comercializadores de Peixe de Vigo, ACOPEVI, e Comisións Obreiras , CC.OO., de conformidade co disposto no artigo 85, alínea a da Lei do 10 de marzo, do Estatuto dos traballadores.

Artigo 22º.-Recoñecementos médicos.

Tódalas empresas vinculadas polo presente convenio colectivo estarán obrigadas a facilita-la realización dun recoñecemento médico con carácter

anual, que se efectuará nas respectivas entidades aseguradoras de cada empresa. O tempo empregado en cada recoñecemento será contado como tempo de traballo.

Artigo 23º.-Formación profesional.

Establecerase unha comisión paritaria de formación, con funcións de planificación, negociación e xestión dos cursos de formación; e aprobarase un plan de formación do sector, pactado cos representantes dos traballadores.

Disposicións derradeiras

Primeira.-En todo o non previsto neste convenio aplicarase o que dispón o Estatuto dos traballadores e normas complementarias.

Segunda.-No caso de que, por incremento do salario mínimo interprofesional garantido se modificasen os correspondentes a algunha ou algunhas categorías laborais, manteranse as diferencias absolutas existentes no momento da súa entrada en vigor entre as categorías laborais.

Táboa salarial ano 2001 e 2002

Categoría profesional01-xaneiro/31-decembro 200101-xaneiro/31-decembro 2002

Xefe administrativo107.923112.240

Oficial administrativo100.129104.134

Auxiliar administrativo88.57492.117

Comprador/a107.826112.139

Encargado/a107.826112.139

Conductor/a103.976108.136

Mozo/a101.034105.075

Empacador/a100.530104.551