Visto o texto da acta de acordo levantada pola comisión xeral de negociación do convenio colectivo para o persoal laboral ó servicio do Concello de Viana do Bolo (código de convenio 3200732, publicado no BOP nº 162, do 17-7-1999), con entrada nesta delegación provincial o día 24-4-2001, subscrito con data do 5-3-2001, polos membros da comisión xeral de negociación do citado convenio, en representación do concello e do seu persoal laboral, e de conformidade co disposto no artigo 90.2º e 3' do Estatuto dos traballadores, texto refundido aprobado polo Real decreto 1/1995, do 24 de marzo, Real decreto 1040/1981, do 22 de maio, sobre rexistro e depósito de convenios colectivos de traballo, e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo e demais normas aplicables de dereito común, esta delegación provincial

ACORDA:

Primeiro.-Ordena-la inscrición no libro de rexistro de convenios colectivos de traballo, existente nesta delegación provincial e notificación ás representacións económica e social da comisión negociadora.

Segundo.-Ordena-lo seu depósito no Servicio de Relacións Laborais, Unidade de Mediación, Arbitraxe e Conciliación.

Terceiro.-Dispoñe-la súa publicación no Diario Oficial de Galicia.

Ourense, 4 de maio de 2001.

José Lage Lage

Delegado provincial de Ourense

Acta da comisión xeral de negociación do convenio

colectivo para o persoal laboral ó servicio

do Concello de Viana do Bolo

Polo Concello de Viana do Bolo:

Sergio González Bruña, alcalde-presidente.

Dosindo Guerra García.

Polos traballadores/as:

Helena Fernández Fernández (CIG).

Francisco José Estévez García (CIG).

Juan Antonio Rodríguez Camba (CIG).

Asesores:

M. Anxo García Torres (CIG).

Miguel Diéguez Díaz (polo concello).

En Viana do Bolo, o 5 de marzo do ano 2001, nos locais do concello, reúnese a comisión xeral de negociación do convenio colectivo, logo das reunións mantidas os días 4 de xaneiro de 2001 e 9 de febreiro de 2001, coa seguinte orde do día:

-Réxime retributivo ano 2001 (en desenvolvemento do artigo 21 do convenio colectivo).

-Homologación salarial do Departamento de Asistencia Social.

-Proposta de mobilidade funcional de certas categorías.

-Publicación e posta en marcha do sistema de listas de contratación laboral temporal.

Acordos:

Réxime retributivo ano 2001.

As partes chegan ó acordo de imputar como incremento ós salarios do persoal laboral o 19,5% da

diferencia existente cos salarios dos funcionarios/as, consonte a táboa de equiparamento que se achega (anexo) e de acordo coa formula contida para o ano 2001 no artigo 21 do convenio colectivo vixente (BOP 17-7-199), con efectos retroactivos do 1 de xaneiro de 2001. Os atrasos derivados deste acordo serán aboados coa nómina do mes de marzo de 2001.

Homologación salarial do Departamento de Asistencia Social.

As partes chegan ó acordo de homologar salarialmente as dúas traballadoras do Departamento de Asistencia Social, cos salarios vixentes para o 2001, das categorías homólogas do convenio colectivo para o persoal laboral ó servicio da Xunta de Galicia, O sistema de homologación salarial, aproximación retributiva e treitos homologadores será definido na reunión que a comisión xeral de negociación do convenio colectivo manterá no mes de setembro de 2001. Os efectos salariais de tal homologación comezarán a producirse a partir do mes de setembro de 2001.

Proposta de mobilidade funcional de certas categorías. Publicación e posta en marcha do sistema de listas de contratación laboral temporal.

As partes chegan ó acordo de estudiar e tratar este asunto na próxima reunión da comisión xeral de negociación que teña lugar, conxuntamente coa posta en marcha e publicación do sistema de listas de contratación temporal.

E non tendo máis asuntos que tratar, asínase esta acta en Viana do Bolo, na data enriba indicada.

ANEXO

Táboa salarial 2001

Concello de Viana do Bolo