O marco de colaboración existente entre a Consellería de Sanidade e Servicios Sociais e o Servicio Galego de Saúde (Sergas), por unha banda, e a Fundación Pública Escola Galega de Administración Sanitaria (Fegas), pola outra, ten por obxecto o deseño conxunto e a execución pola Fegas do plan de formación e reciclaxe profesional sanitaria de tódolos traballadores, tanto da Consellería de Sanidade e Servicios Sociais como do Sergas.
Entre as distintas actividades que se van conveniar para o ano 2001 entre ámbalas dúas partes, atópase o curso de diplomado en enfermería de empresa promovido polo Hospital do Meixoeiro de Vigo, a través da súa Escola Universitaria de Enfermería adscrita á Universidade de Vigo, que se imparte coa finalidade de satisface-la forte demanda de formación existente ó respecto entre o colectivo profesional dos ATS/DUE en Galicia.
O curso conta coa autorización expresa da Escola Nacional de Medicina do Traballo, por adaptarse os seus contidos ás súas directrices; os diplomas acreditativos que lles serán expedidos ós participantes por ela teñen validez en todo o territorio nacional, e rexerase conforme as seguintes bases:
Primeira.
1. O curso de diplomado en enfermería de empresa, organizado pola Fegas e polo Hospital do Meixoeiro de Vigo a través da súa Escola Universitaria de Enfermería, impartirase na cidade de Vigo nas súas dependencias, terá un número máximo de 40 participantes e unha duración de 300 horas, 200 teóricas e 100 prácticas para realizar en empresas.
2. O custo dos dereitos de inscrición no curso ascenderá á cantidade de 250.000 pesetas por participante, que deberán ingresarse a favor da Escola Galega de Administración Sanitaria na forma e prazo que se lles comunique individualmente ós aspirantes admitidos.
Segunda.-Os requisitos para participar no curso serán os seguintes:
1. Será requisito común para tódolos aspirantes posuí-lo título de ATS/DUE, que se acreditará mediante a presentación de fotocopia compulsada do correspondente título ou certificado de depósito de que satisfixeron os dereitos.
2. Os aspirantes ás prazas deberán posuí-la nacionalidade da Unión Europea, o que se acreditará coa presentación da fotocopia do documento nacional de identidade do país comunitario que corresponda.
3. Os dous requisitos anteriores deberán cumprilos aspirantes no momento de remata-lo prazo de presentación de instancias.
Terceira.
1. O prazo de presentación de solicitudes será dun mes contado a partir do día seguinte ó da publicación deste anuncio no DOG.
2. Os interesados en seren admitidos dirixirán a solicitude á Fegas, utilizando o modelo de instancia que se poderá recoller na sede da propia Fegas, sita no polígono das Fontiñas, rúa de Madrid 2-4, 2ª planta, CP 15707, Santiago de Compostela (A Coruña), ou na Escola Universitaria de Enfermería do Hospital do Meixoeiro de Vigo, sita nas dependencias do propio hospital.
3. As ditas solicitudes poderán presentarse a través de calquera dos seguintes xeitos:
a) Mediante a súa entrega na sede da Fegas.
b) Mediante correo certificado dirixido á Fegas nun sobre pechado, sempre que na solicitude conste a data de envío debidamente cuberta pola correspondente oficina de correos.
4. O criterio de admisión dos aspirantes será único e consistirá na rigorosa orde de recepción das solicitudes de participación.
Cuarta.
1. A selección dos aspirantes ó curso faraa unha comisión de selección paritaria formada por representantes da Fegas e da Escola Universitaria de Enfermería do Hospital do Meixoeiro.
2. A dita comisión de selección publicará a lista provisional de admitidos e excluídos ó curso. A dita publicación farase nos taboleiros de anuncios da Fegas e da Escola Universitaria de Enfermería do Hospital do Meixoeiro, podendo reclamar contra el os interesados a partir do día seguinte ó da súa publicación ou exposición ó público nos taboleiros mencionados no prazo de 5 días hábiles, mediante escrito dirixido á propia comisión.
Transcorrido o dito prazo e resoltas as reclamacións presentadas, a dirección da Fegas acordará a lista definitiva de profesionais admitidos e excluídos, que se publicará nos lugares descritos no parágrafo anterior.
3. Se algún dos aspirantes inicialmente seleccionados non satisfai no prazo que se lle indique os dereitos de inscrición, a comisión de selección, de xeito automático, ofertará a participación no curso ós aspirantes non seleccionados, utilizando para iso o criterio sinalado na base 3.4º deste acordo.
Santiago de Compostela, 10 de maio de 2001.
Javier Bouzada Romero
Director da Escola Galega de Administración Sanitaria