Dentro do Plan de actividades da Escola Galega de Administración Pública para o 2001 e de acordo

coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Escola Oficial de Idiomas da Coruña, unhas xornadas sobre fundacións, convocatoria que se desenvolverá conforme as seguintes bases:

1. Obxectivos.

No desenvolvemento da actividade fundacional adquiren relevancia distintas cuestións: a forma e o tempo en que debe realizarse a actividade fundacional e a posibilidade de que a fundación leve a cabo actividades económicas esencialmente rendibles, a pesar de ser unha entidade sen finalidade de lucro, e, á inversa, que a empresa se implique en actividades de interese xeral a través do mecenado e o patrocinio. Todo isto no contexto da crecente puxanza do terceiro sector na asunción de actividades de interese xeral ata agora reservadas á Administración pública.

Así mesmo, é importante preve-lo destino do patrimonio da fundación, unha vez cumpridos os obxectivos fundacionais. Debe establecerse se sobre o devandito patrimonio e as doazóns inicialmente achegadas existe ou non un dereito de reversión en favor da persoa física ou xurídica que as realizou, de modo que poida recuperalas ó extinguirse a fundación.

Todas estas cuestións presentan novos retos no futuro das fundacións que é necesario afrontar e resolver para obter definitivamente unha clara e contundente seguridade xurídica. Coa finalidade de esclarecer e determina-lo ámbito das devanditas cuestións lévanse a cabo estas xornadas, centradas nestes temas de grande interese e actualidade.

2. Contido.

Trataranse estes temas:

-A dotación da fundación.

-O réxime do patrimonio fundacional.

-Mecenado e réxime fiscal das fundacións.

-O exercicio de actividades económicas por parte da fundación.

-As fundacións no sistema das persoas xurídicas.

-A actividade de fomento e control do protectorado da fundación en relación ós seus aspectos económicos.

-A propósito da reversión do patrimonio fundacional á familia do fundador.

-A dotación da fundación no dereito italiano.

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: as xornadas convocadas desenvolveranse no salón de actos da Escola Oficial de Idiomas da Coruña (r/ Pepín Rivero, s/n, da citada cidade) os días 18 e 19 de xuño de 2001.

5. Inscrición.

-Prazo: remata o xoves, día 14 de xuño de 2001.

-Tramitación de solicitudes: as solicitudes irán dirixidas ó director da Escola Galega de Administración Pública, polígono de As Fontiñas, rúa de Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión chamando por teléfono, o día 15 de xuño, das 10 ás 14.45 horas, ós seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 22 de maio de 2001.

Domingo Bello Janeiro

Director da Escola Galega de Administración Pública