Dentro do plan de actividades da Escola Galega de Administración Pública para 2001 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase unha Xornada sobre a Administración tributaria ante a fiscalidade dos negocios de dereito galego, convocatoria que se desenvolverá conforme as seguintes bases:
1. Obxectivos.
Profundar nas estratexias xurídicas que debe segui-la Administración autonómica galega, na xestión, comprobación e liquidación dos tributos cedidos ou propios que tomen como presuposto o feito impoñible, actos ou negocios xurídicos propios do ordenamento galego, en especial os regulados no dereito especial.
2. Contido.
Trataranse, entre outros, estes temas:
-Problemática fiscal das institucións de dereito civil especial.
-Os tributos cedidos e os negocios de dereito galego.
-A tributación das institucións de dereito en Aragón.
-Aspectos fiscais das institucións de dereito catalán.
-O réxime xurídico tributario do dereito foral navarro.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: a xornada convocada desenvolverase no salón de actos da Delegación do Ministerio de Facenda na Coruña (AEAT), (r/ Comandante Fontanes, 10, 3ª planta, da citada cidade) o día 3 de maio de 2001.
5. Inscrición.
-Prazo: remata o luns, día 30 de abril de 2001.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión chamando por teléfono, o día 2 de maio, de 10 a 14.45 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento da xornada, así como a de cancelala, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate desta xornada, a aquelas persoas inscritas que concorresen asiduamente a ela, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 16 de abril de 2001.
Domingo Bello Janeiro
Director da Escola Galega de Administración
Pública