Dentro do Plan de actividades da Escola Galega de Administración Pública para o 2001 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase unha Xornada sobre as leis de orzamentos xerais do Estado e da Comunidade Autónoma de Galicia, y das súas respectivas leis de acompañamento, do ano 2001, convocatoria que se desenvolverá conforme as seguintes bases:

1. Obxectivos.

Afondar no coñecemento, desde unha vertente analítica e do subseguinte debate que pechará cada

unha das relatorias que se expoñan, do contido das normas lexislativas que encadran estas xornadas; disposicións que constitúen pezas esenciais da xestión administrativa.

2. Contido.

Trataranse estes temas:

-Os orzamentos xerais do Estado de 2001 e o seu encadramento nun contexto de estabilidade orzamentaria.

-Contido da Lei de orzamentos xerais do Estado e da Lei de medidas fiscais, administrativas e da orde social de 2001.

-O proxecto de Lei xeral de estabilidade orzamentaria: aspectos económicos e normativos.

-A evolución dos orzamentos da Comunidade Autónoma de Galicia, con especial referencia ós orzamentos xerais de 2001.

-As leis de acompañamento dos orzamentos xerais da Comunidade Autónoma de Galicia. A Lei 5/2000, de medidas fiscais e de réxime orzamentario e administrativo.

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: a xornada convocada desenvolverase no salón de actos da EGAP, (polígono das Fontiñas, rúa de Madrid, 2-4, Santiago de Compostela) o día 14 de febreiro de 2001.

5. Inscrición.

-Prazo: remata o luns, día 12 de febreiro de 2001.

-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, Rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión chamando por teléfono, o día 13 de febreiro, de 10 a 14.45 horas, ós seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento da xornada, así como a de cancelala, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate desta xornada, a aquelas persoas inscritas que concorresen asiduamente a ela, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

8. Retransmisión por Internet.

As persoas interesadas en segui-lo desenvolvemento desta xornada por Internet, poden facelo a través do seguinte enderezo: www.egap.xunta.es.

Santiago de Compostela, 26 de xaneiro de 2001.

Domingo Bello Janeiro

Director da Escola Galega de Administración

Pública