Dentro do Plan de actividades da Escola Galega de Administración Pública para o 2000 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas Xornadas sobre Internet desde a perspectiva administrativa e xurídica, en colaboración coa Revista del Derecho de las Telecomunicaciones e Infraestructuras en Red (Redeti) e co Ilustre Colexio Notarial da Coruña, convocatoria que se desenvolverá conforme as seguintes bases:

1. Obxectivos.

Internet é sen dúbida o fenómeno do noso tempo, pero é un fenómeno cunha introducción que hai que impulsar nas administracións e organismos públicos. Tanto a Comisión Europea coma o Goberno español comparten a idea de que as administracións públicas deben representa-lo papel de avanzada da aplicación das técnicas telemáticas, e a Comunidade Autónoma galega é unha das mellores mostras de que isto é posible. Pero sempre pode facerse máis; o enriquecemento dos funcionarios na cultura Internet contribuirá a mellora-la aplicación dos sistemas xa existentes, a crear outros novos, e a articular mellor uns e outros.

Dos múltiples modos posibles de enfocar Internet, a perspectiva xurídico-administrativa parece especialmente adecuada para unha escola de formación de funcionarios, tanto pola formación de base dos destinatarios das xornadas, canto por ser unha das menos tratadas nos traballos e publicacións que se ocupan de Internet.

Nestes intres, en que estamos a finaliza-lo derradeiro ano do século XX, parece necesario mirar cara adiante, cara ó século XXI; calquera que así o faga, tropezará necesariamente con Internet. A crise bolsista das empresas tecnolóxicas xunto co drástico encarecemento do prezo do petróleo conforman unhas circunstancias económicas que nos fan pensar nas telecomunicacións e no seu novo paradigma, Internet. A rede de redes faise cada vez máis útil pero, entón, ¿por que a crise bolsista? As administracións comezaron a renovarse con métodos tecnolóxicos, pero as dúbidas acumúlanse: ¿é suficiente cunha notificación por correo electrónico? ¿como garanti-la intimidade dos datos en medios electrónicos, etc...

Mais esta visión non se pecha ou limita ó campo meramente administrativo, senón que se estenderá a outros eidos, de índole xurídico xeral, no que o fenómeno de Internet, e da informática nun sentido mais amplo, está a xogar un moi importante papel nos nosos días.

Reflexionar e abrir un debate sobre as cuestións expostas constitúen os principais obxectivos destas xornadas.

2. Contido.

Trataranse, entre outros, estes temas:

-As telecomunicacións na era de Internet.

-Problemas e equilibrios de Internet desde a perspectiva xurídico-administrativa.

-Cuestións legais sobre Internet.

-Internet e as tecnoloxías telemáticas na Administración.

-O conflicto entre os nomes de dominio en Internet e as marcas.

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: as xornadas convocadas terán lugar no salón de actos do Ilustre Colexio Notarial da Coruña (sito na rúa Arcebispo Lago, 12, da citada cidade), os días 13 e 14 de decembro de 2000.

5. Inscrición.

-Prazo: remata o luns, día 11 de decembro de 2000.

-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obte-la confirmación da súa posible admisión, chamando, o día 12 de decembro, por teléfono, de 10 a 14.45 horas, ós seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 23 de novembro de 2000.

Domingo Bello Janeiro

Director da Escola Galega de Administración Pública