Dentro do plan de actividades da Escola Galega de Administración Pública para o 2000 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase, en colaboración coa Consellería da Presidencia e Administración Pública, a través da Inspección Xeral de Servicios, unha Conferencia Internacional sobre Avaliación do Rendemento na Administración Pública, convocatoria que se desenvolverá conforme as seguintes bases:
1. Obxectivos.
No contexto da aparición durante os anos oitenta de numerosos proxectos de reforma e modernización, nos países occidentais, iniciouse no ámbito da Administración autonómica galega o máis ambicioso programa de modernización de tódolos emprendidos polas comunidades autónomas, baseado en dous obxectivos básicos: consecución dunha Administración máis eficaz (artigo 103.1º da Constitución española) e máis eficiente (artigo 32.1º da Constitución española) ó servicio do cidadán.
Unha das actuacións básicas en que se concretou o programa de reforma administrativa, logo de conseguida a informatización global da xestión administrativa, foi a implantación en toda a organización da avaliación do rendemento das unidades administrativas, en cumprimento do establecido no artigo 63.bis da Lei da función pública de Galicia.
O sistema de avaliación permite un coñecemento exhaustivo da actividade das unidades e da súa vinculación coa utilización de recursos humanos e materiais, e está sendo recoñecido como unha experiencia a imitar tanto en España coma no ámbito internacional.
O principal obxectivo deste simposio internacional é a análise comparativa da avaliación do rendemento, implantada na Administración autonómica da Xunta de Galicia cos diferentes sistemas, metodoloxías e procedementos de avaliación utilizados nas administracións de países europeos e americanos sobranceiros na modernización e reforma administrativa.
2. Contido.
Trataranse estes temas:
-Os procesos de reforma e modernización na Administración pública de países americanos.
-A avaliación do rendemento na Administración pública europea e americana.
-A avaliación do rendemento na Administración central do Estado español e na Xunta de Galicia.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as conferencias convocadas terán lugar no salón de actos da EGAP (polígono das Fontiñas, rúa de Madrid, 2-4, 15707 Santiago de Compostela), os días 22 e 23 de novembro de 2000.
5. Inscrición.
-Prazo: remata o luns, día 20 de novembro de 2000.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obte-la confirmación da súa posible admisión, chamando, o día 21 de novembro, por teléfono, de 10 a 14.45 horas, ós seguintes números: 981 54 54 67, 981 54 62 39 ou 981 54 62 44.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate deste simposio, a aquelas persoas inscritas que concorresen asiduamente a el, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
8. Retransmisión por Internet.
As persoas interesadas en segui-lo desenvolvemento destas xornadas por Internet poden facelo a través do seguinte enderezo: www.egap.xunta.es.
Santiago de Compostela, 17 de outubro de 2000.
Domingo Bello Janeiro
Director da Escola Galega de Administración Pública