Dentro do plan de actividades da Escola Galega de Administración Pública para o 2000 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase un Foro Internacional de Administración Pública sobre xestión e formación do persoal (Academia de verán 2000), convocatoria que se desenvolverá conforme as seguintes bases:

1. Presentación e obxectivos.

No marco das relacións de cooperación entre as escolas de Administración pública que forman parte do Foro Internacional de Administración Pública (FIAP), correspóndelle á EGAP a organización da Academia de verán 2000 que terá lugar en Santiago de Compostela os días 4 e 5 de setembro de 2000.

Integran este foro, ademais da EGAP, as seguintes institucións: Hogeschool Gent (Bélxica), Noordelijke Hogeschool. Thorbecke Academie (Países Baixos), Istituto Regionale Lombardo di Formazione per l'Amministrazione Pubblica (Italia), Universidade de Ciencias Económicas e Administrativas de Budapest (Hungría), Universidade Slaviani (Bulgaria), Fachhochschule Ludwigsburg (Alemaña) e Academia da Función Pública da Rexión Volga de Saratov (Rusia).

O obxectivo deste encontro é afondar no coñecemento sobre a materia na que se centra este foro (xestión e formación do persoal da Administración pública) e intercambiar experiencias neste eido entre os representantes das institucións europeas de formación que concorrerán a este acto.

2. Contido.

Trataranse estes temas:

-A xestión de persoal das administracións públicas nas rexións ou estados de Galicia, Italia, Bélxica,

Baden-Würtemberg, Holanda, Hungría, Bulgaria e Rusia.

-Os programas de formación en xestión de persoal das administracións públicas nas rexións ou estados de Baden-Würtemberg, Galicia, Italia, Holanda, Hungría, Bulgaria e Rusia.

3. Destinatarios.

Altos cargos políticos e administrativos da Xunta de Galicia, membros dos diversos órganos directivos da EGAP e representantes das escolas de formación.

4. Desenvolvemento.

-Horario: mañá e tarde.

-Lugar e datas: a academia convocada desenvolverase na aula número 2 da Escola Galega de Administración Pública (rúa de Madrid, 2-4, polígono das Fontiñas, Santiago de Compostela) os días 4 e 5 de setembro de 2000.

5. Inscrición.

-Prazo: remata o xoves, día 31 de agosto de 2000.

-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión, chamando por teléfono, o día 1 de setembro, das 10 ás 14.45 horas, ós seguintes números: 981 54 62 46 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento da academia, así como a de cancelala, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate desta academia, a aquelas persoas inscritas que concorresen asiduamente a ela, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 19 de xullo de 2000.

Domingo Bello Janeiro

Director da Escola Galega de Administración

Pública