Por orde da Consellería de Medio Ambiente do 22 de marzo de 2000 (Diario Oficial de Galicia nº 63, do 30 de marzo) convocouse o concurso para o fomento da recollida de pilas usadas en Galicia, establecéndose no seu artigo 3, que o prazo de presentación dos traballos de sensibilización, difusión e de pintura remataba o 15 de xuño.
Tendo en conta que os premios están dirixidos principalmente ós escolares e que a data límite de presentación coincide co período vacacional, e co fin de garantir unha alta participación e óptima incidencia na poboación, esta consellería considera oportuno abrir un novo prazo de presentación de ideas e iniciativas destes premios.
En consecuencia, en uso das atribucións que me confire a Lei 1/1983, do 22 de febreiro, reguladora da Xunta e do seu presidente, e o Decreto 482/1997, do 26 de decembro, polo que se establece a estructura orgánica da Consellería de Medio Ambiente,
DISPOÑO:
Artigo único.
1. Ábrese un novo prazo para a presentación dos traballos de sensibilización, difusión e de pintura do concurso para o fomento da recollida de pilas usadas en Galicia convocado por orde da Consellería de Medio Ambiente do 22 de marzo de 2000, sen
prexuízo da validez dos presentados con anterioridade ó amparo da dita orde.
2. O prazo de presentación comezará o día seguinte ó da publicación da presente orde no Diario Oficial de Galicia e finalizará o 1 de novembro de 2000.
Santiago de Compostela, 19 de xuño de 2000.
Carlos del Álamo Jiménez
Conselleiro de Medio Ambiente