Dentro dos programas de actividades que a Academia Galega de Seguridade ten previsto realizar no ano 2000 de forma descentralizada, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a realización dun curso sobre a actividade de policía marítima en Galicia, que deberá desenvolverse conforme as seguintes bases:

Obxectivos.

O curso ten por obxectivo principal da-los coñecementos necesarios nesta materia para que os seus destinatarios poidan desenvolve-lo seu labor profesional con maior eficacia.

Destinatarios.

O curso vai dirixido ó persoal do servicio de inspección e vixilancia pesqueira, persoal da Consellería de Pesca e Medio Ambiente, policía local, membros da unidade do C.N.P. adscrita á Comunidade Autónoma de Galicia, Garda Civil do Mar, Servicio de Vixilancia Aduaneira e persoal da Administración periférica.

Inscrición.

A inscrición dos participantes será totalmente gratuíta.

Prazas.

O número de prazas que se ofertarán en cada curso será de 27.

Solicitudes.

1. O persoal que desexe participar nestes cursos deberá presentar cuberta á máquina ou con letra moi clara, a instancia que figura no anexo.

2. O prazo para a presentación de instancias rematará o día 8 de maio, ás 14 horas.

3. As instancias deberán vir asinadas polo xefe do cadro de persoal, ou polo concelleiro de Tráfico e seladas e será isto requisito indispensable para ser admitido no curso; o incumprimento deste requisito comportará á exclusión do devandito curso.

4. As instancias deberán enviarse á sede da Academia Galega de Seguridade: avenida da Cultura, s/n, 36680 A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Contido e duración.

O curso realizarase en sesións de tarde, de luns a venres, e nel trataranse os seguintes módulos: 1. O dominio público marítimo e os espacios marítimos. 2. O exercicio de competencias administrativas específicas sobre o dominio público marítimo e a actividade de policía marítima das administracións públicas. 3. O control xurisdiccional da actividade de policía marítima das administracións públicas.

Datas.

O curso realizarase do 22 de maio ó 2 de xuño.

O horario será de 16.30 a 20.30 horas do serán.

Relación de admitidos.

A relación de admitidos publicarase o día 15 de maio no taboleiro de anuncios da Academia Galega de Seguridade; tamén poden confirma-la súa asistencia chamando ó teléfono 986 59 00 21.

Lugar.

O curso desenvolverase na sede da Academia Galega de Seguridade, sita na avenida da Cultura, s/n, no concello da Estrada.

Certificado de asistencia.

Ó remate de cada curso entregaráselles un certificado de asistencia a aquelas persoas que acrediten a súa participación continuada.

Modificacións.

A Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.

A Estrada, 30 de marzo de 2000.

Juan José Fariñas-Ferro Rodríguez

Director xeral da Academia Galega de Seguridade