De conformidade co establecido no punto un da base décimo segunda da Orde do 29 de xuño de 1999, pola que se convoca concurso para a provisión de postos de traballo do corpo facultativo superior da Xunta de Galicia, pertencentes ós servicios veterinarios oficiais da Comunidade Autónoma, unha vez publicado no Diario Oficial de Galicia nº 35, correspondente ó día 21 de febreiro de 2000, a resolución definitiva da primeira fase do dito concurso, procede dictar resolución convocando os participantes na

segunda fase deste para o acto de elección de destino definitivo. Por todo isto, este centro directivo

ACORDA:

Primeiro.-Convócanse tódolos aspirantes que superaron o concurso-oposición convocado pola Orde do 1 de marzo de 1993 que na data 5 de novembro de 1998 se atopasen ocupando un posto de traballo pertencente ós servicios veterinarios oficiais da Comunidade Autónoma ou nalgunha das situacións previstas no punto 1 da base décimo segunda da Orde do 29 de xuño de 1999, para que, nun único chamamento e acto, elixan obrigatoriamente destino definitivo, pola orde de puntuación final do dito concurso-oposición, entre os postos de traballo que aparecen reflectidos no anexo da presente resolución.

Así mesmo convócanse os que, se é o caso, se atopen na situación de excedencia do artigo 55 da Lei 4/1988, do 26 de maio.

Segundo.-O dito acto celebrarase o vindeiro día 5 de abril de 2000, no salón de actos da Escola Galega de Administración Pública, sita no polígono das Fontiñas en Santiago de Compostela, sendo convocados ás 16.45 horas para o acto de petición de postos que terá lugar ás 17 horas.

Terceiro.-O devandito acto de elección de destino definitivo levarase a cabo de conformidade co establecido no punto un da base décimo segunda da Orde do 29 de xuño de 1999, de acordo coas seguintes regras:

a) A solicitude será vinculante e irrenunciable. Os aspirantes irán provistos do documento nacional de identidade ou doutro documento que acredite de modo fidedigno a personalidade no dito acto. Os aspirantes que non comparezan persoalmente poderán ser representados por terceiras persoas provistas de poder notarial suficiente.

b) Están exceptuados de participar obrigatoriamente nesta segunda fase do concurso aqueles funcionarios de novo ingreso que superaran o concurso-oposición convocado pola orde da Consellería de Sanidade do 1 de marzo de 1993, que se atopen na situación de excedencia voluntaria na data 22-6-1994.

c) Así mesmo, non estarán obrigados a elixir destino definitivo no citado único chamamento e acto os funcionarios de novo ingreso que se atopen desempeñando un posto de libre designación en convocatoria pública non pertencente ós servicios veterinarios oficiais da Comunidade Autónoma.

d) Aqueles participantes na segunda fase do concurso que soliciten postos de traballo nos que na relación de postos de traballo dos servicios veterinarios oficiais da Comunidade Autónoma, aprobada por acordo do Consello da Xunta de Galicia do 12 de novembro de 1992 (DOG nº 243, do 15 de decembro), modificada pola Orde do 3 de decembro de 1993 (DOG nº 4, do 7 de xaneiro de 1994), pertenzan á Consellería de Sanidade e Servicios Sociais e se

esixa para o seu desenvolvemento estar en posesión do curso de matadoiros, convocado ou homologado pola propia consellería, de conformidade co establecido na disposición adicional primeira do Decreto 200/1991, do 13 de xuño, deberán concorrer ó dito acto cunha fotocopia compulsada do documento que acredite ter realizado o dito curso, de xeito que, de non presenta-la documentación pertinente, non poderán solicitar un posto de traballo desas características.

Cuarto.-Contra a presente resolución, que non pon fin á vía administrativa, poderán os interesados formular recurso de alzada ante o conselleiro da Presidencia e Administración Pública, no prazo dun mes contado a partir do día seguinte ó da publicación desta resolución.

Santiago de Compostela, 20 de marzo de 2000.

Joaquín López-Rúa Soler

Director xeral da Función Pública

ANEXO