Dentro do plan de actividades da Escola Galega de Administración Pública para o 2000 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas Xornadas sobre a Lei de cooperativas de Galicia, convocatoria que se desenvolverá conforme as seguintes bases:

1. Obxectivos.

As xornadas pretenden ofrecerlles ós diferentes medios interesados (funcionarios, profesionais, xuristas, etc.) un foro que lles permita afondar no coñecemento das pezas claves do réxime xurídico que instaura a Lei galega 5/1998 para as sociedades cooperativas que quedan dentro do seu ámbito de aplicación, réxime ó que terán que axustarse tanto as cooperativas que se constitúan no futuro como as xa constituídas conforme a lexislación anterior.

2. Contido.

Trataranse estes temas:

-A nova Lei de cooperativas de Galicia dentro do marco da lexislación estatal e autonómica neste eido.

-Concepto e características das sociedades cooperativas.

-As cooperativas agrarias e de explotación comunitaria da terra.

-As cooperativas de crédito e de seguros.

-O réxime fiscal e tributario das sociedades cooperativas.

-A Administración pública e as cooperativas.

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: as xornadas convocadas desenvolveranse no salón de actos da Delegación na Coruña da Consellería da Presidencia e Administración

Pública (praza de Pontevedra, s/n, da citada cidade) os días 5 e 6 de abril de 2000.

5. Inscrición.

-Prazo: remata o luns, día 3 de abril de 2000.

-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obte-la confirmación da súa posible admisión chamando, o día 4 de abril,

por teléfono, das 10 ás 14.45 horas, ós seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 15 de marzo de 2000.

Domingo Bello Janeiro

Director da Escola Galega de Administración

Pública