Antecedentes

-O Concello da Coruña remitiu á Delegación Provincial da Consellería de Política Territorial, Obras Públicas e Vivenda na Coruña expediente de expropiación forzosa polo procedemento de taxación conxunta dos bens e dereitos afectados polo plan especial para o desenvolvemento do sistema xeral de equipamentos no monte de San Pedro, de conformidade co artigo 145 da Lei 1/1997, do 24 de marzo, do solo de Galicia (LSG).

Fundamentos xurídicos

Primeiro.-O proxecto de expropiación forzosa tramitouse polo procedemento de taxación conxunta de conformidade co disposto no artigo 145 da LSG.

Segundo.-O proxecto de expropiación forzosa aprobouse inicialmente o 28 de abril de 1999 pola concellería de Urbanismo en virtude das competencias delegadas por providencia da alcaldía do 20 de xuño de 1995 e foi sometido a información pública polo prazo dun mes anunciándose no DOG nº 84, do 4 de maio de 1999, no BOP nº 100, do 5 de maio de 1999, e nos xornais La Voz de Galicia e Ideal Gallego, do 3 de maio de 1999.

Terceiro.-As taxacións foron notificadas individualmente ós que aparecían como titulares de bens e dereitos no expediente, mediante traslado literal da correspondente folla de aprecio e da proposta de fixación dos criterios de valoración, para que formularan alegacións no prazo dun mes, contado a partir da data de notificación, tal e como sinala o artigo 145.4º da LSG.

Cuarto.-Por acordo da Comisión de Goberno, do 29 de novembro de 1999 acordouse aproba-lo informe relativo ás alegacións feitas polos interesados e remiti-lo proxecto de expropiación á Delegación Provincial da Consellería de Política Territorial, Obras Públicas e Vivenda na Coruña para a súa aprobación definitiva tal como sinala o artigo 145.6º da LSG.

Quinto.-No Concello da Coruña está vixente o Plan Xeral de Ordenación Municipal aprobado o 19 de outubro de 1998 (PXOM).

Os terreos que se pretenden expropiar están clasificados segundo o planeamento vixente como sistema xeral de equipamentos incluídos no ámbito do solo urbanizable. O pleno municipal do Concello da Coruña, con data 18 de outubro de 1999, aprobou definitivamente o plan especial de adecuación dos terreos da antiga batería de costa do monte de San Pedro publicándose no BOP nº 264, do 17 de novembro de 1999. Segundo o artigo 2.1º «o desenvolvemento dos obxectivos urbanísticos establecidos no presente plan especial require a obtención previa dos solos de titularidade privada para o uso e dominio público. Como modo de obtención, establécese o sistema de expropiación».

En consecuencia, de acordo cos artigos 54, 119.5º e 153 da LSG en relación co artigo 33 da Lei 6/1998, do 13 de abril, sobre réxime do solo e valoracións (LRSV) resulta acreditada a declaración de utilidade pública e a necesidade de ocupación dos bens afectados.

Sexto.-Os criterios de valoración fixados no proxecto de expropiación axústanse ó contido do artigo 16.2º, 26 e 27 da Lei 6/1998, do 13 de abril, da LRSV.

Sétimo.-O artigo 1.3º da Orde do 19 de agosto de 1997 (DOG nº 166, do 29 de agosto), delega nos delegados provinciais a competencia para a aprobación dos expedientes de expropiación forzosa nos supostos de procedemento de taxación conxunta.

Á vista de canto antecede

RESOLVO:

Primeiro.-Aprobar definitivamente o proxecto de expropiación forzosa polo procedemento de taxación conxunta dos bens e dereitos afectados polo plan especial para o desenvolvemento do sistema xeral de equipamentos no monte de San Pedro no Concello da Coruña, facendo constar que a aprobación definitiva do expediente de taxación conxunta implicará a declaración de urxencia da ocupación dos bens e dereitos afectados polo proxecto de expropiación de conformidade co establecido no artigo 146 punto 1º da LSG.

En consecuencia, o pagamento ou depósito do importe da valoración establecida producirá os efectos previstos nos números 6º, 7º e 8º do artigo 52 da Lei de expropiación forzosa, sen prexuízo de que continúe a tramitación do procedemento para a definitiva fixación de prezo xusto (artigo 146 punto 2º da LSG).

Segundo.-Notifica-la resolución aprobatoria do expediente a tódolos interesados titulares dos bens e dereitos que figuran nel, conferíndolles un termo de vinte días durante o cal poderán manifestar por escrito ante esta delegación provincial a súa desconformidade coa valoración establecida no expe

diente aprobado, conforme dispón o artigo 145 punto 7º da LSG, advertíndolles que, transcorrido o citado prazo de vinte días sen que se formule oposición á valoración, entenderase aceptada a que se fixou no acto aprobatorio do expediente, entendéndose determinado o prezo xusto definitivamente e de conformidade (artigo 145 punto 8º da LSG).

Terceiro.-Publica-la presente resolución así como a relación dos seguintes bens e dereitos afectados polo proxecto de expropiación, no Diario Oficial de Galicia e no taboleiro de edictos do concello:

Así mesmo, a publicación e exposición no taboleiro de edictos do concello servirá de notificación ós propietarios descoñecidos, a aqueles dos que se ignore o lugar de notificación, ou ben cando, tramitada a notificación, non se puidese realizar. Todo isto de acordo co disposto no artigo 59.4º da Lei 30/1992, do 26 de novembro, de réxime xurídico das administracións públicas e do procedemento administrativo común (BOE do 27 de novembro).

Contra esta resolución, que pon fin á vía administrativa, poderase interpoñer recurso potestativo de reposición ante o conselleiro de Política Territorial, Obras Públicas e Vivenda, no prazo dun mes contado a partir do día seguinte ó da notificación desta resolución (artigos 116, 117 e 48 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro) ou recurso contencioso-administrativo perante a Sala do Contencioso-Administrativo do Tribunal Superior de Xustiza de Galicia, no prazo de dous meses contados desde o día seguinte ó da notificación (artigo 46.1º da Lei 29/1998, do 13 de xullo, da xurisdicción contencioso-administrativa).

Para o caso de que se interpoña o recurso potestativo de reposición, ata que sexa resolto expresamente ou se producira a desestimación presunta, non se poderá interpoñe-lo recurso contencioso-administrativo (artigo 116 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro).

A Coruña, 7 de xaneiro de 2000.

Jesús Almuiña Loeda

Delegado provincial da Coruña