A Lei 11/1989, do 20 de xullo, de ordenación do sistema universitario de Galicia (DOG nº 156, do 16 de agosto), supuxo a realización dunha planificación xeral do sistema. Ó desenvolvemento desta planificación contribuíron diversos decretos.

Unha vez rematado o proceso de expansión do sistema universitario de Galicia, trabállase a prol da súa consolidación, atendendo expresamente os problemas derivados da definición específica de cada campus.

Actualmente, a denominación das escolas universitarias de graduados sociais creadas na Comunidade Autónoma non se axusta á denominación dos estudios que se imparten nelas, polo que é necesario modifica-la denominación destes centros.

Con este decreto dáselle cumprimento ó cambio de denominación das escolas universitarias de graduados sociais das universidades de Santiago de Compostela, A Coruña e Vigo, solicitados por estas universidades e ó cambio de denominación da Facultade de Humanidades do Campus de Vigo e da Escola Universitaria de Enxeñería Técnica de Industrias Forestais do Campus de Pontevedra, solicitados pola Universidade de Vigo, unha vez que teñen cumpridos xa tódolos requisitos previos ó acto formal da autorización do cambio de denominación por parte da Xunta de Galicia.

Por todo isto, en aplicación dos artigos 2.13º e 11.1º da Lei 5/1987, do 27 de maio (DOG do 2 de xuño), do Consello Social da Universidade e do Consello Universitario de Galicia, por instancia dos Consellos Sociais das Universidades de Santiago de Compostela, A Coruña e Vigo, co informe favorable do Consello Universitario de Galicia, por proposta do conselleiro de Educación e Ordenación Universitaria, e logo de deliberación do Consello da Xunta de Galicia na súa reunión do día quince de xullo de mil novecentos noventa e nove,

DISPOÑO:

Artigo 1º.-Universidade de Santiago de Compostela.

Concédese autorización para que a Escola Universitaria de Graduados Sociais do Campus de Santiago de Compostela, integrada polo Decreto 241/1991, do 4 de xullo, (DOG do 18 de xullo), pase a denominarse Escola Universitaria de Relacións Laborais, albergando os estudios xa autorizados e ratificados polo Decreto 247/1992, do 30

de xullo (DOG do 17 de agosto), conducentes ó título de diplomado en relacións laborais.

Artigo 2º.-Universidade da Coruña.

Concédese autorización para que as escolas universitarias de graduados sociais do Campus da Coruña e do Campus de Ferrol, adscritas polo Decreto 416/1990, do 31 de xullo (DOG do 10 de agosto), pasen a denominarse escolas universitarias de relacións laborais, albergando os estudios xa autorizados e ratificados polo Decreto 247/1992, do 30 de xullo, conducentes ó título de diplomado en relacións laborais.

Artigo 3º.-Universidade de Vigo.

1. Concédese autorización para que a Escola Universitaria de Graduados Sociais do Campus de Vigo, adscrita polo Decreto 274/1991, do 30 de xullo (DOG do 13 de agosto), pase a denominarse Escola Universitaria de Relacións Laborais, albergando os estudios xa autorizados e ratificados polo citado Decreto 247/1992, do 30 de xullo, conducentes ó título de diplomado en relacións laborais.

2. Concédese autorización para que a Facultade de Humanidades do Campus de Vigo, creada polo Decreto 505/1990, do 2 de novembro (DOG do 19 de novembro), pase a denominarse Facultade de Filoloxía e Traducción, albergando os estudios xa autorizados polos decretos 274/1991, do 30 de xullo, 192/1993, do 29 de xullo (DOG do 17 de agosto), e 248/1998, do 10 de setembro (DOG do 18 de setembro), conducentes ós títulos de licenciado en traducción e interpretación, licenciado en filoloxía hispánica, licenciado en filoloxía inglesa e licenciado en filoloxía galega.

3. Concédese autorización para que a Escola Universitaria de Enxeñería Técnica de Industrias Forestais do Campus de Pontevedra, creada polo Decreto 416/1990, do 31 de xullo, pase a denominarse Escola Universitaria de Enxeñería Técnica Forestal, albergando os estudios xa autorizados polo citado decreto, conducentes ó título de enxeñeiro técnico forestal, especialidade en industrias forestais.

Disposicións derradeiras

Primeira.-Autorízase o conselleiro de Educación e Ordenación Universitaria para que, no ámbito das súas competencias, dicte as disposicións necesarias para o desenvolvemento deste decreto.

Segunda.-Este decreto entrará en vigor o día seguinte ó da súa publicación no Diario Oficial de Galicia.

Santiago de Compostela, quince de xullo de mil novecentos noventa e nove.

Manuel Fraga Iribarne

Presidente

Celso Currás Fernández

Conselleiro de Educación e Ordenación Universitaria