I. O Pleno da Corporación Municipal de Santiago de Compostela, en sesión celebrada o día 3 de xullo de 1998, adoptou o acordo de aprobación definitiva do Plan Parcial de Ordenación do Sector de Solo Urbanizable Non Programado nº 15 (SUNP-15) en Ponte Pereda-Conxo (BOP do 18-11-1998 e Diario Oficial de Galicia do 27-11-1998).

II. O dito plan parcial contén a delimitación dun único polígono que comprende a totalidade do seu ámbito, determinándose como sistema de actuación o de expropiación, que realizará este Instituto Galego da Vivenda e Solo de conformidade cos acordos subscritos co concello e o establecido no dito plan parcial, que a súa aprobación implica a declaración de utilidade pública das obras e a necesidade de ocupación dos terreos e edificios correspondentes ós fins de expropiación de conformidade co establecido no artigo 33 da Lei 6/1998, do 13 de abril, sobre réxime do solo e valoracións e no artigo 54 da Lei 1/1997, do 24 de marzo, do solo de Galicia.

III. De conformidade co artigo 199 do Regulamento de xestión urbanística aprobado polo Real decreto 3288/1978, do 25 de agosto, por resolución desta Dirección Xeral do Instituto Galego da Vivenda e Solo do 19 de xuño de 1997 formulouse e aprobouse inicialmente a relación de propietarios, bens e dereitos afectados incluídos no devandito polígono, que foi sometida a información pública e notificada ós interesados.

IV. No dito trámite foron presentadas as alegacións que constan no expediente, sendo obxecto de exame con proposta de estimación ou desestimación e modificación, se é o caso, da indicada relación.

V. En virtude dos ditos artigos e de conformidade así mesmo co establecido nos artigos 15 e seguintes da Lei de expropiación forzosa do 16 de decembro de 1954 e 15 e seguintes do seu regulamento, artigo 144 da Lei 1/1997, do solo de Galicia e artigo 201 do Regulamento de xestión urbanística, e nos arti

gos 4.1º e 2º da Lei 3/1988, do 27 de abril, de creación do Instituto Galego da Vivenda e Solo,

RESOLVO:

Primero.-Estimar e desestimar respectivamente as alegacións presentadas con base nas razóns e no sentido de que para cada unha delas se contén na proposta referida no punto IV anterior, e en consecuencia modifica-la relación de propietarios, bens e dereitos no que resulta afectado pola estimación das ditas alegacións.

Segundo.-Aprobar definitivamente, coas indicadas modificacións, a relación de propietarios, bens e dereitos afectados incluídos no polígono único delimitado no Plan Parcial do Sector de Solo Urbanizable Non Programado nº 15 (SUNP-15) en Ponte Pereda-Conxo, que foi aprobado definitivamente por acordo do Pleno do Concello de Santiago de Compostela en sesión do 3 de xullo de 1998, e declara-la necesidade de ocupación destes para a súa execución por expropiación.

Terceiro.-Segui-la expropiación polo procedemento de taxación conxunta, para o que se formará o oportuno expediente, sen prexuízo de formula-las ofertas de adquisición de mutuo acordo.

Cuarto.-Publica-la presente resolución no Diario Oficial de Galicia, no BOP e nun dos diarios de maior circulación da provincia, xunto coa relación definitiva de propietarios, bens e dereitos afectados, e notificala persoalmente ós interesados que constan no expediente, conxuntamente coa proposta de resolución das alegacións presentadas, e con expresión dos recursos que procedan.

Relación de propietarios, bens e dereitos do SUNP-15 (Ponte Pereda-Conxo):

* Os especificados para cada un dos predios nas correspondentes fichas do expediente.

De conformidade co artigo 59.4º da Lei 30/1992, do 26 de novembro, de réxime xurídico das administracións públicas e do procedemento administrativo común, a publicación nos xornais oficiais e exposición do taboleiro de edictos do concello desta resolución servirá de notificación ós propietarios descoñecidos, ós que se ignore o lugar de notificación

ou respecto ós que intentada a notificación non se puidera practicar.

Contra a presente resolución poderá interpoñer recurso de alzada no prazo dun mes desde a súa notificación ou derradeira publicación perante o conselleiro de Política Territorial, Obras Públicas e Vivenda da Xunta de Galicia, podendo presenta-lo dito recurso ben perante o dito órgano ou perante a Dirección Xeral do Instituto Galego da Vivenda e Solo. Transcorridos 3 meses desde a interposición do dito recurso sen que recaia resolución poderase entender desestimado para os efectos da interposición do recurso contencioso-administrativo; todo iso de conformidade co establecido no artigo 16 da Lei 3/1988, do 27 de abril, de creación do Instituto Galego da Vivenda e Solo, e nos artigos 107 e 114 da Lei 30/1992, do 26 de novembro, de réxime xurídico das administracións públicas e do procedemento administrativo común.

Santiago de Compostela, 2 de febreiro de 1999.

José Antonio Redondo López

Director xeral do Instituto Galego da Vivenda

e Solo