O Decreto 314/1986, do 16 de outubro, polo que se regula o sistema público de museos da Comunidade Autónoma de Galicia establece a obriga de tódolos museos de Galicia de confecciona-lo inventario e o catálogo das pezas que posúan, como medio para documentalas cientificamente e así poder exerce-las funcións que a todo centro destas características lle corresponden.
Por outra banda, a Consellería de Cultura, Comunicación Social e Turismo ten atribuída, en aplicación das súas competencias en materia de museos e patrimonio moble, a facultade de velar pola conservación, coidado e adecuado coñecemento dos museos e do patrimonio moble de Galicia, así como a de fomenta-la formación do persoal técnico dos museos, colaborando, na medida das súas posibilidades orzamentarias, para o mellor cumprimento dos fins e obrigas que lle son propios.
É preciso poñer un límite no desfrute das bolsas, xa que se trata de bolsas de formación e colaboración que intentan da-la posibilidade de completar unha determinada formación académica ó maior número de persoas posibles.
Por todo isto,
DISPOÑO:
Artigo 1º
1. Convócanse 8 bolsas para inventario e catalogación dos fondos de museos e coleccións relevantes de interese galego, con cargo á aplicación orzamentaria 10.03.352B-481.0, dos orzamentos xerais da Comunidade Autónoma galega para 1999. O importe total das axudas en ningún caso excederá a cantidade 5.520.000 ptas.
2. Os bolseiros realizarán os seus traballos en diversos centros museísticos de Galicia e serán dirixidos polos servicios técnicos da Dirección Xeral de Patrimonio Cultural da Consellería de Cultura, Comunicación Social e Turismo, e polos coordinadores, designados para o efecto por aquela.
3. Os traballos terán unha duración de 6 meses a partir da data de incorporación que estableza a Dirección Xeral de Patrimonio Cultural da Consellería de Cultura, Comunicación Social e Turismo.
4. Os bolseiros seleccionados quedarán obrigados a:
-Asistir diariamente durante un mínimo de 5 horas ós centros onde resulten destinados. O horario será o establecido polos servicios técnicos da Dirección Xeral de Patrimionio Cultural de acordo co centro de destino.
-A segui-las indicacións técnicas dos coordinadores.
-A lles entregar ós coordinadores mensualmente informe dos traballos realizados, e ó finaliza-la bolsa, os inventarios/catálogos e a memoria explicativa resultado do seu traballo. Ó remata-la actividade os coordinadores dos bolseiros depositarán na Dirección Xeral de Patrimonio Cultural da Consellería de Cultura, Comunicación Social e Turismo os informes e os inventarios/catálogos, onde quedará depositada unha copia e os orixinais devolveranse ó centro onde se realizou o traballo.
Artigo 2º
1. Requisitos dos solicitantes:
-Licenciados universitarios con formación académica nalgunha das seguintes materias: arqueoloxía, etnografía, historia, historia da arte, física, química, medicina e cirurxía ou ciencias naturais e con coñecementos de museoloxía.
-Non ter desfrutado anteriormente, de 3 ou máis bolsas completas das convocadas por esta Dirección Xeral de Patrimonio Cultural, para catalogación de fondos de museos.
2. Os solicitantes deberán optar só por un dos seguintes campos:
-Campo da historia da arte.
-Campo da etnografía.
-Campo da arqueoloxía.
-Campo da historia natural.
-Campo da física e química.
-Campo da medicina.
3. Presentación das solicitudes:
As solicitudes presentaranse conforme o modelo oficial, que figura como anexo I desta orde, no rexistro xeral da Consellería de Cultura, Comunicación Social e Turismo ou nas súas delegacións provinciais. O prazo de presentación será de 15 días naturais, contados a partir do día seguinte ó da publicación da presente orde no Diario Oficial de Galicia.
Sen prexuízo do establecido no parágrafo anterior, as solicitudes poderán así mesmo presentarse de calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
4. Documentación que hai que presentar:
-Anexo I debidamente cuberto e fotocopia dos méritos alegados. Só contabilizarán aqueles méritos dos que se achegue proba documental.
-Fotocopia do DNI.
-Declaración responsable de non ter emprego remunerado nin desfrutar doutra bolsa ou axuda, calquera que fose esta, situacións que producen incompatibilidade co desfrute da bolsa que neste orde se convoca.
-Fotocopia compulsada do expediente académico.
5. Unha vez outorgadas as bolsas, a Dirección Xeral de Patrimonio Cultural poderá solicitar ós seleccionados a presentación do orixinal ou fotocopia compulsada dos méritos alegados, que deberán ser presentados nun prazo non superior a tres días, contados a partir do momento do seu requirimento público.
6. En caso de renunciar á bolsa os interesados deberán comunicalo por escrito á Dirección Xeral de Patrimonio Cultural, no prazo de tres días despois da notificación nos taboleiros de anuncios da Consellería de Cultura, Comunicación Social e Turismo e nas súas delegacións provinciais. De non presentarse a renuncia no prazo estipulado quedará sen efecto o seu nomeamento e será motivo de exclusión na próxima convocatoria.
A renuncia durante o desfrute da bolsa inhabilitará o seu adxudicatario/a para efectos de presentación na próxima convocatoria.
7. Serán causas de exclusión a demostración de falsidade documental, a non correspondencia cos orixinais ou incorrección na documentación presentada.
Artigo 3º
1. As bolsas serán adxudicadas prioritariamente para os museos e campos que se relacionan no anexo II.
Artigo 4º
O importe da bolsa non excederá da cantidade de 690.000 ptas. cada unha.
Artigo 5º
1. Os correspondentes servicios técnicos da Dirección Xeral de Patrimonio Cultural da Consellería de Cultura, Comunicación Social e Turismo poderán reclamarlles, se fose necesario, ós solicitantes que emenden os defectos administrativos apreciados na documentación esixida, de acordo co artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común, outorgándose un prazo de 10 días, desde a recepción do escrito de requirimento.
2. A avaliación dos méritos alegados, que corresponde á Dirección Xeral de Patrimonio Cultural da
Consellería de Cultura, Comunicación Social e Turismo, farase segundo o seguinte baremo:
a) Especialidades:
-Especialidade en historia da arte: 3 puntos.
-Especialidade en historia ou etnografía: 3 puntos.
-Especialidade en arqueoloxía: 3 puntos.
-Especialidade en museoloxía: 3 puntos.
-Especialidade en ciencias naturais: 3 puntos.
-Especialidade en física/química: 3 puntos.
-Especialidade en anestesioloxía e reanimación: 3 puntos.
b) Experiencia de traballo:
-Traballo remunerado en catalogación e inventario de fondos de museos. Por cada mes: 0,25 puntos. Ata un máximo de 4 puntos.
-Traballo non remunerado en museos. Por cada mes: 0,10 puntos. Ata un máximo de 1,20 puntos.
c) Cursos de museoloxía e monográficos de historia da arte, arqueoloxía, antropoloxía, etnografía, ciencias naturais, física, química, anestesioloxía, reanimación, cirurxía e historia da medicina:
-Por cursos de menos de 40 horas: 0,10 puntos. Ata un máximo de 1 punto.
-Por cursos con acreditación expresa de 40 ou máis horas: 0,25 puntos. Ata un máximo de 2 puntos.
-Por cursos con acreditación expresa de 100 ou máis horas: 0,60 puntos. Ata un máximo de 2,40 puntos.
-Por cursos con acreditación expresa de 250 ou máis horas: 1,25 puntos. Ata un máximo de 2,50 puntos.
d) Congresos:
-Asistencia a congresos: 0,10 puntos. Ata un máximo de 1 punto.
-Presentación de comunicacións en congresos: 0,25 puntos. Ata un máximo de 2 puntos.
-Presentación de relatorios en congresos: 0,50 puntos. Ata un máximo de 4 puntos.
e) Publicacións relacionadas en museoloxía, historia da arte, arqueoloxía, antropoloxía, etnografía, ciencias naturais, física, química, anestesioloxía, reanimación, cirurxía e historia da medicina impresas antes do remate do prazo de presentacións de solicitudes:
-Por cada libro publicado: 1 punto. Ata un máximo de 3 puntos.
-Pola publicación de inventarios ou catálogos: 0,5 puntos. Ata un máximo de 2 puntos.
-Por cada artigo en revista especializada: 0,25 puntos. Ata un máximo de 2 puntos.
O mesmo mérito só se valorará unha vez: como comunicación, publicación ou asistencia a congresos.
f) Doutoramento:
-Pola realización total dos cursos de doutoramento ou tese de licenciatura: 1,5 puntos.
-Pola realización da tese de doutoramento: 1,5 puntos.
g) Cursos de galego:
-Iniciación: 0,5 puntos.
-Iniciación e/ou perfeccionamento: 1 punto.
h) Cursos de informática:
-Informática en xeral: 0,10 puntos por curso ata un máximo de 1 punto.
-Informática aplicada ós museos: 0,25 puntos por curso ata un máximo de 1,50 puntos.
Elaborarase unha lista por cada un dos campos ou especialidades, tendo en conta que os méritos específicos alegados só se valorarán no campo ó que opte o solicitante.
3. As listas provisionais de bolseiros faranse públicos nos taboleiros de anuncios da Consellería de Cultura, Comunicación Social e Turismo e nos das súas delegacións provinciais. O prazo de exposición das listas será de 10 días naturais contados a partir do día seguinte ó da súa publicación, e durante os cales se poderán face-las alegacións pertinentes.
4. A resolución da convocatoria correspóndelle ó conselleiro de Cultura, Comunicación Social e Turismo por proposta do director xeral de Patrimonio Cultural. O acordo farase público, para efectos de notificación ós interesados nos taboleiros de anuncios da Consellería de Cultura, Comunicación Social e Turismo e nos das súas delegacións provinciais.
Calquera notificación ou requirimento ós interesados farase a través dos taboleiros de anuncios da Consellería de Cultura, Comunicación Social e Turismo e nos das súas delegacións provinciais.
5. A resolución de adxudicación pon fin á vía administrativa, de acordo co artigo 109 da Lei 30/1992, do 26 de novembro, e contra ela cabe interpoñer recurso contencioso administrativo perante o Tribunal Superior de Xustiza de Galicia no prazo de dous meses contados a partir da data de notificación da mesma ós interesados.
6. Unha vez rematado o período de desfrute da bolsa, as persoas non seleccionadas poderán solicita-la devolución da documentación presentada.
Transcorrido o prazo dun ano procederase á eliminación da documentación non recollida.
Artigo 6º
O pagamento da bolsa axustarase á normativa orzamentaria de aplicación.
Ós adxudicatarios das bolsas poderáselles requiri-la documentación necesaria para proceder ó pagamento da dita bolsa.
Artigo 7º
1. No caso de que os beneficiarios das bolsas incumprisen algunha das condicións ou obrigas estipuladas na presente orde, a Consellería de Cultura, Comunicación Social e Turismo instruirá expediente sancionador conforme o previsto na Lei 30/1992, do 26 de novembro, de réxime xurídico das administracións públicas e do procedemento administrativo común e poderá, mesmo, anula-los beneficios concedidos e solicita-la devolución das cantidades percibidas, se as houbese, nos prazos que establece o Regulamento xeral da recadación.
2. Os coordinadores que dirixan ós bolseiros poderá propoñerlle á Dirección Xeral de Patrimonio Cultural da Consellería de Cultura, Comunicación Social e Turismo a extinción da bolsa por falta de dedicación ou incumprimento das condicións sinaladas.
3. A Dirección Xeral de Patrimionio Cultural da Consellería de Cultura, Comunicación Social e Turismo expedirá, logo do informe favorable dos coordinadores, ó remata-los traballos, certificación acreditativa da prestación dos servicios.
4. As bolsas non implican relación funcionarial nin laboral coa Consellería de Cultura, Comunicación Social e Turismo, nin compromiso que se estenda máis alá do seu ámbito de duración.
Artigo 8º
A Consellería de Cultura, Comunicación Social e Turismo poderá facer pública unha nova convocatoria en iguais ou diferentes termos, no caso de que as adxudicacións acordadas non cubrisen a totalidade do crédito asignado.
Disposicións derradeiras
Primeira.-Autorízase o director xeral de Patrimonio Cultural para dictar, no ámbito das súas competencias, as resolucións precisas para o desenvolvemento desta orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 9 de febreiro de 1999.
Jesús Pérez Varela
Conselleiro de Cultura, Comunicación Social
e Turismo
ANEXO II
No campo da historia da arte:
-Museo Municipal Quiñones de León (1 bolsa).
-Casa-museo Emilia Pardo Bazán / Fundación Otero Pedrayo / Museo Municipal Ramón María Aller (1 bolsa).
-Museo do Pobo Galego (1 bolsa).
No campo da arqueoloxía:
-Museo Arqueolóxico e Histórico da Coruña (1 bolsa).
-Museo Municipal Quiñones de León (1 bolsa).
No campo da etnografía:
-Colección etnográfica do Colexio Público Mosteiro de Caaveiro / Colección etnográfica e de historia de San Paio de Narla (1 bolsa).
No campo da historia natural, campo de física e química e campo de historia da medicina (*):
-Coleccións de ciencia e técnica do Seminario e do Colexio Franciscano de Lugo/ Colección de ciencia e técnica do colexio dos Escolapios de Monforte (1 bolsa).
-Colección de Anestesioloxía e Reanimación (1 bolsa).
(*) Os solicitantes destes tres campos terán tódolos destinos recollidos neste último grupo, por seren coleccións mixtas.
