A regulación do procedemento para a implantación da xornada lectiva única nos centros de educación infantil, primaria e xeral básica, no ámbito da Comunidade Autónoma de Galicia, vén establecida na Orde do 13 de abril de 1993, DOG do 23 de abril, da Consellería de Educación e Ordenación Universitaria.
Aprobada a implantación dos centros públicos integrados dentro da organización educativa desta comunidade, mediante decreto do Consello da Xunta de Galicia do 7 de xaneiro de 1999, como aqueles centros docentes nos que se impartan dúas ou máis ensinanzas non universiarias, e tendo en conta que estes centros no momento da súa posta en funcionamento escolarizan, fundamentalmente, alumnos dos niveis educativos de infantil, primaria e secundaria obrigatoria, estímase oportuno e conveniente que, provisoriamente, e en tanto non se remata a implantación do ensino secundario obrigatorio, a regulación do procedemento para autoriza-la xornada lectiva única dos centros públicos integrados sexa a establecida na citada Orde do 13 de abril de 1993.
En consecuencia, esta consellería, en virtude do previsto no artigo 1 do Decreto 213/1998, do 10 de xullo, polo que se establece a estructura órganica da Consellería de Educación e Ordenación Universitaria,
DISPÓN:
Artigo único.
Amplíase o contido da Orde do 13 de abril de 1993, pola que se establece o procedemento para a implantación da xornada lectiva en sesión única de mañá nos centros de educación infantil, educación primaria e educación xeral básica, na seguinte forma:
1. Introdúceselle unha disposición adicional primeira, do teor seguinte: o disposto nesta orde seralles de aplicación ós centros públicos integrados.
2. Engádeselle unha disposición transitoria terceira, co seguinte texto: os centros que actualmente veñan desenvolvendo a súa actividade docente en réxime de xornada única e esgoten as prórrogas previstas nesta orde, poderán solicitar unha prórroga máis.
Disposición derradeira única
A presente orde entrará en vigor o mesmo día da súa publicación no Diario Oficial de Galicia.
Santiago de Compostela, 25 de xaneiro de 1999.
P.D. (Orde 21-6-1996)
Máximo García Serrano
Secretario xeral da Consellería de Educación
e Ordenación Universitaria