Mediante resolucións da Dirección Xeral de Calidade e Avaliación Ambiental, do 9 de febreiro de 1998 e do 25 de febreiro de 1998, e ó abeiro do previsto no artigo 2.4º do Decreto 327/1991, do 4 de outubro, de avaliación de efectos ambientais para Galicia, sometéronse respectivamente a información pública os proxectos da ecoplanta de Vilaboa e de canalización do río Tomeza.

A transcendencia social dos expedientes, a súa complexidade técnica e o desexo de obter unha efectiva participación dos sectores sociais implicados, unido á especial relevancia que o artigo 24.2º da Lei 1/1995, do 2 de xaneiro, de protección ambiental de Galicia, atribúe ó trámite de información pública facilitando a presentación de alegacións, suxestións e propostas alternativas, aconsellan que se abra un novo período de información pública polo prazo de vinte días previsto no artigo 86.2º da Lei 30/1992, do 26 de novembro, de réxime xurídico das administracións públicas e do procedemento administrativo común, co fin de que as observacións ata agora presentadas poidan unirse novas alegacións ós proxectos. Na súa virtude,

RESOLVO:

Primeiro.-Someter á información pública, durante o período de vinte días hábiles contados a partir da publicación da presente resolución, os estudios de efectos ambientais dos proxectos da ecoplanta de Vilaboa e de canalización do río Tomeza.

Segundo.-Un exemplar dos plans estará á disposición dos administrados, para os referidos efectos informativos, nas seguintes dependencias:

* Dirección Xeral de Calidade e Avaliación Ambiental; Rúa dos Feáns, 1-3, 15706-Santiago de Compostela.

* Delegación Provincial da Consellería de Medio Ambiente da provincia de Pontevedra; r/ Benito Corbal, 47-3º, 36071 Pontevedra.

* Casa do Concello de Vilaboa; r/ Toural, 36141-Vilaboa.

Terceiro.-Poderán formularse novas alegacións ós proxectos durante un período de 20 días.

Cuarto.-Unha vez rematado o mencionado prazo, remitiranse os expedientes coas correspondentes alegacións á Dirección Xeral de Calidade e Avaliación Ambiental.

Santiago de Compostela, 22 de abril de 1998.

Francisco Pan-Montojo González

Director xeral de Calidade e Avaliación Ambiental

3733