Dentro do plan de actividades da Escola Galega de Administración Pública para 1998 e conforme as funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas xornadas sobre empresa agraria e Administración pública, que deberán desenvolverse conforme ás seguintes bases:

1. Obxectivos.

Reflexionar e debate-las cuestións derivadas da intervención dos órganos da Administración publica nas explotacións agrarias, tanto no seu réxime xurídico e empresarial como en materia de producción e comercialización de productos, analizando, así mesmo, o alcance e significado da Lei 19/1995, do 4 de xullo, de modernización das explotacións agrarias.

2. Contido.

Trataranse, entre outros, estes temas:

-Empresa agraria, producción e Administración pública.

-Contratación agraria en Galicia e intervención administrativa.

-Alcance e significado da Lei 19/1995, do 4 de xullo, de modernización das explotacións agrarias.

3. Destinatarios.

Persoal ó servicio de calquera das administracións públicas galegas e interesados en xeral.

4. Desenvolvemento.

-Horario: mañá e tarde.

-Lugar e datas: as xornadas convocadas terán lugar no salón de actos do edificio politécnico da Universidade de Ourense (campus universitario das Lagoas, da citada cidade), os días 21 e 22 de maio.

5. Inscrición.

-Prazo: remata o luns, día 18 de maio de 1998.

-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de

Madrid, 2-4-15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: (981) 54 63 37.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión, chamando, a partir do día 18 de maio, por teléfono de 10 a 14.45 horas, ós seguintes números: (981) 54 62 39 ou (981) 54 60 40.

6. Modificacións.

A EGAP reserva para si a facultade de interpretar e resolve-las incidencias que puidesen xurdir no desenvolvemento das xornadas, así como a de cancelalas se o escaso número de solicitudes non xustificase a súa realización.

7. Certificación de asistencia.

Entregaráselles ó remate destas xornadas a aqueles asistentes que concorresen asiduamente ás mesmas, cando a súa inasistencia non sexa igual ou superior ó 15% das horas lectivas programadas, e expresarase neste documento a natureza da actividade e as datas da súa realización.

Santiago de Compostela, 21 de abril de 1998.

Domingo Bello Janeiro

Director da Escola Galega de Administración Pública

3663