Vistos o escrito e a documentación presentados pola empresa Unión Eléctrica Fenosa, S.A., con enderezo para efectos de notificación na Coruña, r/ Severo Ochoa, 2, esta dirección xeral ten en conta os seguintes feitos:
Primeiro.- O día 20 de marzo de 1997 a citada empresa solicitou a autorización administrativa das instalacións descritas no proxecto de execución: ampliación dun módulo de liña a 132 kV na subestación de Intasa e a aprobación do citado proxecto.
Xúntanlle á dita solicitude o preceptivo proxecto de instalacións a que fan referencia os artigos 8 e 12 do Decreto 2617/1966, do 20 de outubro, sobre
autorización de instalacións eléctricas, de aplicación ó presente expediente segundo o disposto na disposición transitoria primeira da Lei 40/1994, do 30 de decembro, do sistema eléctrico nacional.
As características técnicas básicas da instalación son as seguintes:
Ampliación da subestación eléctrica de Intasa, en San Sadurniño, propiedade de Unión Eléctrica-Fenosa, S.A. dotándoa dun novo módulo de liña a 132 kV, consistente en:
-Pórtico constituído por perfís de aceiro, para sustentación do embarrado semiflexible de aluminio con alma de aceiro, tipo cóndor de 402,23 mm de sección de aluminio e 52,15 mm de sección do aceiro.
-Interruptor trifásico, seccionadores de liña e de barras para 145 kV, trafos de intensidade e tensión.
-Aparamenta de mando, control, sinalización e medida.
Segundo.- O citado proxecto de instalación someteuse a información pública, por resolución da delegación provincial da Consellería de Industria e Comercio da Coruña do 22-4-1997, publicándose no Diario oficial de Galicia. do 29-5-1997 e no BOP da Coruña do 2-6-1997.
Durante o período legalmente establecido non se recibiron alegacións.
Terceiro.- A solicitude obxecto deste expediente está informada favorablemente pola delegación provincial da Coruña.
Fundamentos de dereito:
Primeiro.- A Dirección Xeral de Industria é a competente para resolver este expediente con base no Estatuto de autonomía de Galicia, no Real decreto 2563/1982, do 24 de xullo, no Decreto 132/1982, do 4 de novembro, no Decreto 209/1990, do 15 de
marzo, polo que se establece a estructura orgánica da Consellería de Industria e Comercio, modificado polos decretos 140/1991, do 2 de maio, 292/1995, do 3 de novembro e 187/1997, do 3 de xullo, en relación co Decreto 2617/1966, do 20 de outubro, sobre autorización de instalacións eléctricas, aplicable a este expediente en virtude do establecido na disposición transitoria primeira da Lei 54/1997, do 27 de novembro, do sector eléctrico.
Segundo.- O proxecto cumpre o disposto no Decreto 3151/68, do 28 de novembro, polo que se aproba o Regulamento de liñas eléctricas de alta tensión e, en concreto, nos seus Art. 5 e 6.
Terceiro.- No expediente instruído para o efecto cumpríronse os trámites regulamentarios.
Esta dirección xeral, de acordo con todo o que antecede e no exercicio das competencias que ten atribuídas,
RESOLVE:
1º- Autoriza-la ampliación dun módulo de liña a 132 kV na subestación de Intasa, en San Sadurniño (A Coruña).
2º- Aproba-lo proxecto de execución da citada instalación.
Contra esta resolución, que non é definitiva en vía administrativa, poderase interpor recurso ordinario, perante o conselleiro de Industria e Comercio da Xunta de Galicia, no prazo dun mes contado desde a súa publicación no Diario Oficial de Galicia, de acordo co disposto no artigo 114 da Lei 30/1992, do 26 de novembro, de réxime xurídico das administracións públicas e do procedemento administrativo común.
Santiago de Compostela, 21 de xaneiro de 1998.
Joaquín del Moral Crespo
Director xeral de Industria
2700