Vacantes na Administración de xustiza postos de traballo de nova creación dos corpos nacionais de oficiais, auxiliares e axentes da Administración de xustiza dotados orzamentariamente, procede a súa convocatoria en concurso de traslado, de conformidade co establecido nos artigos 455 e 494 da Lei orgánica 6/1985, do 1 de xullo, do poder xudicial, e o capítulo III do título IV do Regulamento orgánico do corpos de oficiais, auxiliares e axentes da Administración de xustiza aprobado polo Real decreto 249/1996, do 16 de febreiro.
Por todo iso, o Ministerio de Xustiza, coordinadamente coa Comunidade Autónoma de Galicia, dispón convocar concurso para a provisión dos postos que se relacionan no anexo I segundo as seguintes bases:
Primeira.-Postos que se poden solicitar:
1. Poderán tomar parte no presente concurso e solicita-las vacantes de postos de traballo de oficiais, auxiliares e axentes da Administración de xustiza os funcionarios pertencentes ós devanditos corpos, calquera que sexa a súa situación administrativa, agás os suspensos que non rematasen o período de suspensión, sempre que reúnan as condicións para concursar conforme o establecido no artigo 57 do Real decreto 249/1996, do 16 de febreiro.
2. Poderán solicitar calquera das prazas incluídas no anexo I desta convocatoria, sempre que reúnan os requisitos xerais esixidos na data de remate do prazo de presentación de solicitudes.
As devanditas vacantes identificaranse polo código do centro de destino, relación de postos de traballo e número de orde do posto de traballo.
3. Tamén se podarán solicita-los postos que queden vacantes nas relacións de postos de traballo da Administración de xustiza como consecuencia da resolución do presente concurso, que se incorporarán en concepto de resultas ás vacantes ofertadas, agás que se pretendan amortizar ante modificación do cadro de persoal orgánico ou reordenación de efectivos dun centro de traballo, ou que radiquen en xulgados e tribunais con sede no País Vasco, ó non convocar simultaneamente concurso de traslados esta Comunidade Autónoma.
Os postos de traballo teñen que se identificar polo código de centro de destino, relación de posto de traballo e número de orde de posto de traballo (nunca o número de orde de convocatoria), precisándose todo iso para identifica-lo posto solicitado. Coa soa solicitude dun posto de traballo dun órgano xudicial, enténdense pedidas tódalas vacantes do corpo existentes no dito órgano.
Co fin de que os posibles solicitantes poidan exerce-lo dereito que se lles recoñece de solicitaren as
resultas producidas pola resolución do concurso, desde a data de publicación desta resolución e durante o período de presentación de solicitudes, expoñeranse nos taboleiros de anuncios das xerencias territoriais do departamento, no Servicio de Información do Ministerio de Xustiza e nos departamentos competentes das consellerías das comunidades autónomas con transferencia de funcións en materia de provisión de medios persoais ó servicio da Administración de xustiza, a seguinte documentación que permita identificar e solicitar adecuadamente os postos:
Relación de postos de traballo da Administración de xustiza da mesma natureza cós convocados que se poidan solicitar con identificación do centro de destino, relación de postos e número de orde dos postos en cuestión.
Segunda.-Requisitos e condicións de participación:
1. Os funcionarios dos corpos de oficiais, auxiliares e axentes da Administración de xustiza só poderán participar se na data de remate do prazo de presentación de instancias transcorreu un ano desde a toma de posesión no seu actual posto de traballo definitivo (artigo 57 c) do Real decreto 249/1996).
2. Os funcionarios en servicio activo con destino provisional nos órganos que se oferten estarán obrigados a participar no presente concurso.
No caso de que non obtivesen destino en concurso, atribuiráselle-lo desempeño provisional dun posto correspondente ó seu corpo.
3. Os funcionarios que se atopen nas situacións de excedencia voluntaria establecidas no artigo 34 letras b) e c) do Real decreto 249/1996, (excedencias por agrupación familiar e por interese particular), só poderán participar no concurso se na data de remate do prazo de presentación de solicitudes transcorresen dous anos como mínimo desde que fosen declarados nesa situación.
4. Os funcionarios en situación de excedencia para o coidado de fillos ó abeiro do disposto no artigo 35 do Real decreto 249/1996 só poderán concursar se transcorreu un ano desde a toma de posesión do último destino definitivo.
5. Os excedentes forzosos, os suspensos definitivos que perdesen o seu posto de traballo e os excedentes voluntarios do artigo 34.a) do Regulamento orgánico aprobado polo Real decreto 249/1996, gozarán, por esta orde, a primeira vez que se anuncie a concurso vacante do corpo na mesma localidade onde servían cando se produciu o seu cesamento no servicio activo, de dereito preferente para ocupala. Para exercer este dereito haberán de solicitar tódalas vacantes que se ofertan na localidade para a que se exerce a preferencia.
6. Non poderá adxudicárselles ós funcionarios un posto de traballo correspondente ó mesmo centro onde estean destinados coa excepción prevista no artigo 52.c) do Real decreto 249/1996, do 16 de febreiro, ó regula-la reordenación de efectivos.
Terceira.-Baremos:
A valoración de méritos para a adxudicación dos postos de traballo farase de acordo co baremo establecido para valora-la antigüidade e o coñecemento da lingua oficial propia das comunidades autónomas e os coñecementos informáticos naquelas prazas para as que así se estableza.
1. Antigüidade.-Polos servicios efectivos no corpo outorgarase un punto por cada ano completo de servicios, computándose proporcionalmente os períodos inferiores (0,0027777 por día, establecéndose os meses como de 30 días).
2. Coñecemento oral e escrito da lingua oficial propia da Comunidade Autónoma. Nas prazas situadas na Comunidade Autónoma de Galicia, o coñecemento oral e escrito desta debidamente acreditado por medio de certificación oficial da Comunidade Autónoma, ou homologación do título achegado e do nivel ó que corresponda o título, supón o recoñecemento para estes efectos de ata 6 puntos segundo o nivel de coñecementos acreditado nos termos da disposición adicional segunda do Regulamento orgánico aprobado por Real decreto 249/1996, do 16 de febreiro, na forma seguinte:
Curso de iniciación e perfeccionamento ou curso básico de linguaxe xurídica galega: dous puntos.
Curso medio de linguaxe xurídica galega: catro puntos.
Cursos superior de linguaxe xurídica galega: seis puntos.
3. Coñecementos informáticos. Nas prazas que se van prover que comporten especiais coñecementos informáticos e que así se sinalen nas relacións de prazas que se vaian solicitar tanto do anexo como de resultas, a quen acredite mediante fotocopia compulsada de certificación oficial os ditos coñecementos, outorgaráselles para estes efectos ata 6 puntos ademais da antigüidade ou dos puntos obtidos polo coñecemento da lingua oficial propia da Comunidade Autónoma que corresponda, de conformidade co establecido no apartado 10 do artigo 54 do Real decreto 249/1996 de 16 de febreiro. Para tal efecto teranse en conta os seguintes criterios:
1º. Certificado oficial de asistencia e aproveitamento de cursos de informática expedido polo Ministerio de Educación e Cultura; Ministerio de Xustiza; Ministerio para as Administracións Públicas; Ministerio de Traballo e Asuntos Sociais; comunidades autónomas con competencia na materia e centros homologados, 0,50 puntos por curso, cun máximo de dous puntos.
2º. Títulos de formación profesional II ou III grado, especialidade informática, Diplomatura en informática, catro puntos.
3º. Licenciatura en informática, seis puntos.
Os devanditos criterios non terán carácter acumulativo. No caso de que o funcionario alegue coñecementos informáticos aplicables a dous ou máis criterios considerarase unicamente aquel que lle outorgue maior puntuación.
Cuarta.-Modelos e prazos de presentación de solicitudes:
1. Os funcionarios destinados definitivamente en postos das relacións de postos de traballo dos corpos de oficiais, auxiliares e axentes da Administración de xustiza, así como os que se atopen en situación de servicios especiais e excedentes por coidado de fillo que teñen reservado o seu posto de traballo, radicados no territorio nacional, sen competencias transferidas presentarán a súa solicitude axustada ó modelo V-I publicado como anexo II da resolución do Ministerio de Xustiza no prazo de 10 días naturais seguintes ó da publicación da convocatoria no BOE, dirixidas ó director xeral de Relación coa Administración de Xustiza, no Rexistro de Entrada da
Xerencia Territorial do Ministerio de Xustiza que corresponda ó tribunal ou xulgado no que estivesen destinados.
Os funcionarios destinados nos xulgados ou tribunais de Galicia interesados nas prazas que se ofertan neste concurso presentaranlle a súa solicitude ó director xeral de Xustiza e Administración Local da Comunidade Autónoma de Galicia, segundo o modelo e prazo referido no parágrafo anterior.
2. Os funcionarios destinados en postos das relacións de posto de traballo doutros corpos da Administración de xustiza ou doutras administracións que se atopen en excedencia do artigo 34 letra a) do Real decreto 249/1996, do 16 de febreiro, nos corpos de oficiais, auxiliares e axentes, que desexen solicitar prazas ofertadas no presente concurso na súa calidade de oficial ou auxiliar, utilizarán o modelo V-2 publicado como anexo II da resolución do Ministerio de Xustiza no prazo de 10 días naturais seguintes ó da publicación da resolución no BOE dirixida ó director xeral de Relacións coa Administración de Xustiza debendo ter entrada no rexistro xeral do Ministerio de Xustiza, rúa San Bernardo, 21 (28071 Madrid).
3. Os restantes solicitantes que desexen participar no presente concurso, como os excedentes forzosos aínda que tiveren un destino provisional, os suspensos definitivos que perdesen o seu posto de traballo, os participantes con destino provisional por teren reingresado no servicio activo, así como os restantes excedentes voluntarios por agrupación familiar ou por interese particular, utilizarán o modelo V-3 publicado como anexo II da resolución do Ministerio de Xustiza no prazo de 10 días naturais seguintes ó da publicación da resolución no BOE dirixida ó director xeral de Relacións coa Administración de Xustiza, debendo ter entrada no rexistro xeral do Ministerio de Xustiza, r/ San Bernardo, 21 (28071-Madrid).
4. As solicitude poderán remitirse tamén na forma prevista no artigo 38 da Lei de réxime xurídico das administracións públicas e do procedemento administrativo común.
As que se presenten nas oficinas de correos enviaranse en calquera das dúas modalidades seguintes:
a) Por correo ordinario; neste caso deberá ter entrada no rexistro xeral do Ministerio de Xustiza, Xerencias Territorias ou Consellería de Xustiza da Comunidade Autónoma de Galicia (Dirección Xeral de Xustiza e Administracción Local. Praza de Europa, 5 A- 4º As Fontiñas. 15703 Santiago de Compostela), para os funcionarios destinados nos xulgados e tribunais de Galicia, en todo caso antes da data de remate do prazo de presentación de instancias.
b) Por correo certificado; neste suposto presentaranse nas oficinas de correos en sobre aberto para ser datadas e seladas polo funcionario de correos antes de seren remitidas. Os participantes no concurso deberán envia-la instancia que teña o selo da oficina de correos, sen que poida admitirse pasado o prazo de presentación de instancias aquela que non cumpra este requisito, aínda que posteriormente se puidese acreditar tal extremo.
5. Os excedentes voluntarios por interese particular engadirán a súa solicitude declaración de non ter sido separado de calquera das administracións públicas.
6. A solicitude para tomar parte neste concurso será única para cada funcionario participante. Do mesmo modo mediante unha única instancia deberán optar por participar desde o corpo no que o funcionario se atope en activo, ou reingresar ó servicio activo noutro corpo do que formen parte como excedentes.
Ó resultar irrenunciables os destinos obtidos a instancia do funcionario no caso de obter destino o reingresado ó servicio mediante concurso de traslado, quedará automaticamente en excedencia no corpo no que se atopase en activo polo que o seu destino se ofrecerá como praza vacante en concepto de resultas.
7. A solicitude formulada será vinculante para o peticionario unha vez transcorrido o período de presentación de instancias.
Quinta.-Peticións condicionadas:
No caso de estaren interesados nas vacantes que se anuncian para unha mesma provincia dous funcionarios pertencentes ós corpos de oficiais, auxiliares e axentes poderán condiciona-la súa petición ó feito de que ámbolos dous obteñan destino na mesma provincia, entendéndose no caso contrario anuladas as peticións condicionadas efectuadas por ámbolos dous. Os funcionarios que se acollan a esta petición condicional deberán concretalo na súa instancia e engadir fotocopia da petición doutro funcionario. No caso de que non se engadise a fotocopia da instancia do segundo concursante, entenderase anulada a petición condicionada efectuada por ámbolos dous.
Os funcionarios que se acollan a esta base deberán agrupa-los postos que condicionan nos primeiros números de orde de preferencia de solicitude, poñendo o resto dos non condicionados a continuación.
Sexta.-Tramitación:
As unidades de persoal das xerencias territoriais do Ministerio de Xustiza onde tivesen entrada as solicitudes de participación no presente concurso, a Dirección Xeral de Relación coa Administración de Xustiza e a Comunidade Autónoma galega, efectuarán a gravación no proceso informático.
Rematado o dito proceso, efectuarase a baremación consonte os datos que figuran no anexo III da resolución do Ministerio de Xustiza.
Este anexo III de cada participante farase chegar ós solicitantes mediante envío á sede do órgano de destino actual do funcionario ou ó seu enderezo se se atopase en excedencia por interese particular, por coidado de fillos ou por agrupación familiar, de xeito que haberá de facer constar na solicitude o enderezo de modificación.
Os funcionarios interesados expresarán no prazo de 10 días a súa conformidade cos datos que constan do anexo III ou a súa desconformidade con algún deles, solicitando a súa corrección para o que deberán achegar no dito prazo a proba documental oportuna e fotocopia selada da instancia que presentaron no seu día, todo iso de acordo co establecido no artigo 71.1 da Lei de réxime xurídico das administracións públicas e do procedemento administrativo común. Unha vez asinado o apartado correspondente, será devolto ás unidades de persoal que procederon á gravación informática como proba de conformidade ou non cos datos que constan no citado anexo III.
A non devolución do dito anexo III no prazo establecido entenderase como mostra de conformidade e aceptación dos datos contidos nel.
Sétima.-Adxudicacións:
1. O orde de prioridade para a adxudicación dos postos de traballo virá dada pola puntuación total obtida segundo os baremos da base terceira.
2. No caso de empate na puntuación total, acudirase para dirimilo á orde escalafonal do funcionario.
Oitava.-Carácter dos destinos adxudicados:
1. Os traslados que se deriven da resolución do presente concurso terán a consideración de voluntarios para os efectos previstos no Real decreto 236/1988, do 4 de marzo, sobre indemnizacións por razóns de servicio.
2. Os destinos adxudicados serán irrenunciables.
Novena.-Resolución e prazo posesorio:
1. A presente convocatoria resolverase por resolución do director xeral de Relacións coa Administración de Xustiza por delegación do secretario de Estado de Xustiza de forma coordinada cos órganos competentes da Comunidade Autónoma de Galicia de forma que se publiquen simultaneamente no BOE e no Diario Oficial de Galicia. No suposto de que a dita simultaneidade non fose posible, os prazos contaranse a partir do día seguinte ó da publicación no BOE.
2. A resolución expresará o posto de orixe dos interesados ós que se lles adxudique destino e a súa localidade, así como a súa situación administrativa se esta é distinta á de activo e o posto adxudicado a cada funcionario con referencia ó centro de traballo e localidade.
3. O prazo para tomar posesión do novo destino obtido atoparase dentro do establecido no artigo 55 do regulamento orgánico aprobado polo Real decreto 249/1996, do 16 de febreiro, pero cando teña lugar dentro da mesma poboación, deberá efectuarse nos oito días naturais seguintes ó do cesamento.
4. O prazo para a toma de posesión comezará a contarse a partir do día seguinte ó do cesamento que deberá efectuarse dentro dos tres días hábiles seguintes ó da publicación da resolución no BOE.
5. Se a resolución comporta reingreso no servicio activo, o prazo de toma de posesión deberá comezar a contar desde a dita publicación.
6. Se non se lograse a simultaneidade de publicación da resolución co Diario Oficial de Galicia, os prazos computarán desde o día seguinte ó da publicación no BOE.
7. O cómputo dos prazos posesorios iniciarase cando rematen os permisos ou licencias que estean desfrutando os funcionarios, non sendo que por circunstancias excepcionais debidamente motivadas se suspenda ou revogue o desfrute deles.
Décima.-Recursos:
Contra a presente convocatoria poderase interpoñer recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia no prazo de dous meses desde o día seguinte ó da súa publicación no BOE, logo de comunicación a este centro de acordo co establecido no artigo 110.3 da Lei 30/1992, do 26 de novembro, de réxime xurídico das administracións
públicas e do procedemento administrativo común (BOE do 20 de agosto de 1993).
Santiago de Compostela, 26 de xaneiro de 1998.
José-Antonio Álvarez Vidal
Director xeral de Xustiza e Administración Local
ANEXO I
Descrición do posto de traballo:
Comunidade Autónoma de Galicia: Servicio Común de Notificacións e Embargos de Vigo (Pontevedra).
Código: 9252021236560.
RTP: 35.
Nº orde: Ofi.: 1. Aux.: 2. Axe.:-.
Oficiais: 6.
Dotación: auxiliares: 3. Axentes:-.
Preferencias: idioma: si. Informática: non.
Descrición do posto de traballo:
Comunidade Autónoma de Galicia: Adscrición Fiscalía de Monforte de Lemos (Lugo).
Código: 9251360127300.
RTP: 35.
Nº orde: Ofi.:-. Aux.: 4. Axe.:-.
Oficiais:-.
Dotación: auxiliares: 1. Axentes:-.
Preferencias: idioma: si. Informática: non.
