As pragas e enfermidades dos cultivos ocasionan anualmente importantes diminucións de producción, coa conseguinte reducción da renda do agricultor se este non utiliza os medios de loita adecuados.
O uso incorrecto dos productos químicos contra eses organismos nocivos incidirá negativamente no ecosistema, e poderá afectar ás plantas, ós animais e incluso ó home.
No aspecto da economía da explotación agraria, o incremento das doses, por riba das recomendadas, ocasiona un aumento dos gastos da explotación.
A defensa sanitaria dos cultivos esixe un coñecemento adecuado dos patóxenos e o emprego de labores culturais, medios de loita biolóxica e medios de loita química idóneos en cada momento.
O agricultor individual, en xeral, ten dificultades para facer un seguimento da evolución das poboacións de patóxenos e de organismos beneficiosos, buscando o momento óptimo do emprego dos medios de loita. Tamén carece, con frecuencia, da maquinaria adecuada para a realización de tratamentos fitosanitarios, e a economía da súa explotación, moitas veces, non lle permite a contratación dun técnico capacitado que o asesore nos aspectos fitosanitarios.
As cooperativas, sociedades agrarias de transformación e as agrupacións de agricultores, especialmente as de tratamentos integrados na agricultura (ATRIAs), poden desenvolver un papel decisivo no establecemento, execución e seguimento de programas de defensa sanitaria dos cultivos, poñendo a disposición dos agricultores os medios necesarios para a loita, de forma que se mellore a renda das explotacións agrarias e se respecte o medio ambiente.
En consecuencia, de acordo co disposto no artigo 30.1º.3 do Estatuto de autonomía de Galicia e en uso das competencias que me confire a Lei 1/1983, reguladora da Xunta de Galicia e do seu presidente,
DISPOÑO:
Artigo 1º
Establécese un sistema de axudas para potencia-lo control fitopatolóxico dos cultivos agrícolas, a través de agrupacións de carácter agrario formalmente constituídas, mediante programas técnicos ben definidos, coas seguintes condicións:
1. Prioridade no uso de métodos de control de loita biolóxica.
2. Emprego racional de productos químicos, usándoos só naqueles casos que sexa a única forma eficaz de erradicar ou mante-los axentes nocivos dentro dos límites tolerables, empregando métodos de control integrado de pragas.
Artigo 2º
Terán prioridade para a concesión de axudas para os programas de actuación de control fitosanitario aquelas agrupacións que cumpran as seguintes condicións:
1. Que estean constituídas como agrupacións de tratamentos integrados en agricultura (ATRIAs).
2. Que conten cos servicios dun técnico contratado en exclusiva para o control fitosanitario.
3. Aquelas agrupacións que presenten un programa que se realice nun área xeográfica no que as súas características técnicas favorezan a aplicación coherente del.
Artigo 3º
Nas actuacións recollidas no programa deberán participar, como mínimo, o 80% dos socios afectados por este e que pertenzan á entidade solicitante.
Se un socio pertence a máis dunha entidade, non poderá beneficiarse máis que dun programa. Nese caso, a Consellería de Agricultura, Gandería e Montes solicitará ás entidades implicadas que presenten a conformidade, por escrito, do dito socio a participar no programa previsto. Se o socio dá a conformidade por escrito a máis dunha entidade excluirase de tódolos programas deste tipo.
Na proposta de aprobación da subvención terase en conta o grao de cumprimento dos programas realizados pola agrupación en anos anteriores.
Artigo 4º
Poderán ser obxecto de axuda as seguintes actuacións:
1. Contratación de servicios encamiñados á redacción e seguimento dun programa fitopatolóxico.
A contía da subvención poderá chegar ata 1.000.000 de pesetas para ámbolos servicios, dependendo das características técnicas do programa, duración, dificultades para o seu seguimento e grao de cumprimento del.
2. Fomento dos medios culturais e biolóxicos de control dos organismos nocivos dos cultivos que se especifican no anexo I consistentes en:
2.1. Adquisición de trampas e feromonas para o seguimento e confección de curvas de voos de insectos que permitan preve-lo posible grao de ataque e o momento óptimo de control con productos fitosanitarios, se son necesarios.
Nos programas deberán indicarse os lugares de instalación das trampas para o seguimento por parte dos técnicos da Administración. Rematadas as actuacións, a agrupación presentará no Servicio Provincial de Axudas Estructurais, un informe completo dos resultados obtidos.
2.2. Análises fitopatolóxicas en laboratorios cualificados e recoñecidos para tal fin.
2.3. Adquisición de equipamento para a mellora de técnicas que favorezan a prevención de propagación dos axentes nocivos. No caso de maquinaria de aplicación de tratamentos, só será subvencionable
cando vaia ser utilizada en común pola agrupación e supoña unha innovación tecnolóxica.
2.4. Adquisición de equipamento de protección humana para a realización de tratamentos fitosanitarios.
2.5. Adquisición de organismos vivos, dos seus subproductos e productos biorracionais para a aplicación de técnicas de control biolóxico.
As actuacións reflectidas nos apartados 2.1 e 2.2 poderán subvencionarse ata o 70% do investimento.
As actuacións reflectidas nos apartados 2.3, 2.4 y 2.5, poderán subvencionarse ata o 75% do investimento feito, agás para a maquinaria de tratamentos do apartado 2.3 que non superará o 40% do seu custo. Estas subvencións limitaranse ó 35% do investimento nos programas desenvolvidos en zonas non desfavorecidas no sentido da Directiva 75/268/CEE.
3. Desenvolvemento de programas fitosanitarios experimentais de investigación en interese xeral do sector, para combate-las pragas que se relacionan no anexo I desta orde. Os resultados remitiranse á Consellería de Agricultura, Gandería e Montes para poñelos a disposición dos operadores do sector.
Só se utilizaran os productos de categoría toxicolóxica nociva e nos casos nos que sexan a única forma eficaz de controla-los patóxenos.
Admitirase a utilización de productos tóxicos ou moi tóxicos soamente nos casos reflectidos no anexo I desta orde e sempre baixo a supervisión e seguimento da Consellería de Agricultura, Gandería e Montes, e de acordo coa lexislación vixente.
A axuda correspondete á execución destes programas non poderá supera-lo 70% do custo adicional orixinado por estes en relación cos programas tradicionais de defensa sanitaria para combate-los mesmos patóxenos.
A contía da axuda por este concepto poderá chegar a un máximo de 15.000 ptas./Ha. que poderá incrementarse ata 30.000 ptas./Ha. no caso de cultivos baixo cuberta.
A Administración poderá establecer uns módulos máximos de axuda por cultivos e zonas segundo as condicións metereolóxicas, incidencia de axentes nocivos, custo de tratamentos e valoración das produccións tradicionais, por unha parte, e pola outra, o custo de tratamentos, seguimento deles e valoración das produccións nos programas experimentais de investigación. Así mesmo, poderá determina-la documentación complementaria que permita a avaliación dos programas en cada caso.
Artigo 5º
Para ter acceso a esta liña de axudas, as agrupacións deberán presentar por duplicado a seguinte documentación:
a) Solicitude de acordo co anexo II.
b) Un programa técnico, elaborado por un enxeñeiro agrónomo ou enxeñeiro técnico agrícola, que conterá como mínimo:
1. Unha memoria na que se recollan os datos xerais da entidade agraria.
2. Un mapa de situación e ámbito de actuación do programa.
3. Cultivos ós que afecta o programa, hectáreas totais, superficie por socio e fitopatóxenos dos especificados no anexo I que inciden nos cultivos.
4. Tipos de actuacións que se van levar a cabo para o control dos organismos nocivos, relacionados nesta orde, indicando o equipo que se vai adquirir para o seguimento e evolución dos fitopatóxenos.
5. Actividades que se van desenvolver, co obxectivo de capacitar e asesora-los asociados participantes no programa:
* Reunións de grupo e cursos que se van impartir: calendario e número de asistentes.
* Visitas de asesoramento a explotacións: número e calendario.
* Demostracións de novas técnicas e métodos: calendario.
* Programas fitosanitarios experimentais de investigación de interese xeral: obxectivos.
* Publicacións e material divulgativo: número.
* Actividades que se van desenvolver en colaboración coas estacións de avisos de detección de risco de pragas e enfermidades da Consellería de Agricultura, Gandería e Montes.
* Outras actividades de interese: descrición e número.
6. Cando a orografía do terreo, extensión ou outra circunstancia así o aconsellen, dentro do programa deberán de facerse zonas de actuación independentes con subprogramas para estas.
c) Certificación do secretario da agrupación que recolla a totalidade de socios desta, o número de socios ós que poida afecta-lo programa, así como cantos deles van participar neste. A este certificado acompañarase unha relación nominal informatizada dos socios do programa fitosanitario, en disquete de 3 œ de alta densidade, nun ficheiro en base de datos coa estructura indicada no anexo III.
d) Copia das normas de funcionamento da agrupación para os efectos de desenvolve-lo programa sanitario.
e) Contrato de servicio técnico para o seguimento do programa.
f) Copia do CIF da agrupación, e último recibo de taxas da licencia fiscal.
g) Certificado de titularidade da conta bancaria da agrupación.
h) Outra documentación que a xuízo da Administración se poida requirir para o cumprimento dos obxectivos desta orde.
Execución do programa
Artigo 6º
O técnico encargado do desenvolvemento e seguimento do programa de defensa sanitaria cumprirá as seguintes condicións:
1. Deberá colaborar cos servicios da Consellería de Agricultura, Gandería e Montes, na recollida dos datos necesarios para a optimización da aplicación
dos programas de detección do risco de pragas e enfermidades, a través da rede de avisos que a consellería puxo en funcionamento en toda Galicia para tal fin.
2. Poderá ser requirido pola Consellería de Agricultura, Gandería e Montes para informar, visita-las explotacións participantes, comprobar actuacións ou resultados en calquera fase de execución do programa. O informe da visita asinarase conxuntamente polos técnicos da entidade agraria e do Servicio Provincial de Axudas Estructurais ó seu remate.
3. Será responsable dun só programa. Excepcionalmente, e no caso de proximidade xeográfica das entidades solicitantes ou por operatividade, poderá levar máis dun programa, sempre que a Consellería de Agricultura, Gandería e Montes estime que estes se poderán desenvolver integramente de acordo coas memorias presentadas. Nese caso, a suma das subvencións previstas nos programas redactados e dirixidos por un só técnico, relativas á contratación do servicio recollido no artigo 4º, apartado 1, non poderá supera-la cantidade de 1.500.000 ptas.
4. A aceptación do seguimento do programa fitosanitario por parte do técnico, será incompatible co desenvolvemento doutras actividades económicas relacionadas directamente cos equipos ou medios subvencionables por esta orde.
5. Manterá informado ó Servicio de Axudas Estructurais das variacións do calendario de actividades que vaia desenvolver e doutras variacións que poidan xurdir respecto ó programa inicialmente aprobado.
Tramitación
Artigo 7º
A documentación presentarase por duplicado, preferentemente, nas delegacións provinciais da Consellería de Agricultura, Gandería e Montes, podendo, non obstante, presentarse en calquera das formas establecidas no artigo 38, alínea 4ª da Lei 30/1992, de réxime xurídico das administracións públicas e do procedemento administrativo común.
Artigo 8º
O prazo de presentación de solicitudes rematará ós 30 días hábiles, contados desde o seguinte á publicación desta orde, que serán resoltas polo conselleiro de Agricultura, Gandería e Montes. A consellería comunicará ós solicitantes no prazo de 90 días a aprobación ou denegación razoada da solicitude; a falta de comunicación no dito prazo, entenderase desestimatoria da petición de axuda.
Xustificación
Artigo 9º
Os programas aprobados estarán realizados antes do 31 de outubro de 1997, non obstante, a Dirección Xeral de Producción Agropecuaria e Industrias Agroalimentarias, por petición da agrupación e tendo en conta o programa e tipo de cultivo, poderá ampliar ese prazo.
Os beneficiarios deberán comunicar, antes do 31 de outubro de 1997, a realización do programa á
Consellería de Agricultura, Gandería e Montes, xuntando a seguinte documentación:
1. Informe técnico da agrupación responsable do seguimento do programa co visto e prace do seu presidente, no que se cuantificarán tódolos datos de interese: numéricos, datas, lugar, etc., para que por parte da administración poida facerse unha evaluación obxectiva do programa desenvolvido nas actividades que se relacionan.
* Reunións do grupo e cursos impartidos: calendario e número de asistentes.
* Visitas de asesoramento a explotacións: número e calendario
* Demostracións de novas técnicas e métodos: calendario, número de participantes
* Programas fitosanitarios experimentais de investigación de interese xeral: obxectivos e resultados obtidos.
* Publicacións e material divulgativo: títulos e número
* Actividades en colaboración coas estacións de avisos detección de risco de pragas e enfermidades da Consellería de Agricultura, Gandería e Montes.
* Outras actividades de interese: descrición e número.
2. Certificados de estar ó día das obrigas fiscais e da Seguridade Social.
3. Certificación do organismo oficial responsable, de que a agrupación non ten pendente de pagamento ningunha débeda, por ningún concepto, coa Administración pública da Comunidade Autónoma.
4. Facturas orixinais ou fotocopias compulsadas xustificativas dos investimentos. No caso de productos fitosanitarios subvencionables, só se admitirán os adquiridos en establecementos dados de alta no Rexistro Oficial de Establecementos e Servicios Praguicidas.
5. Factura definitiva do servicio técnico contratado para o desenvolvemento do programa.
Financiamento
Artigo 10º
Este programa financiarase con cargo ó concepto orzamentario 09-03-614.A-778.0 «Programas de defensa dos vexetais», dos orzamentos xerais da Comunidade Autónoma de Galicia para 1997 dotado con 50.000.000 de ptas. para esta finalidade.
As solicitudes formuladas ó amparo da orde da Consellería de Agricultura, Gandería e Montes, do 18 de marzo de 1996, na que se establecen as axudas para o desenvolvemento de programas de defensa sanitaria dos cultivos para 1996, ás que non se lles foi concedida a subvención solicitada, teranse en conta na presente convocatoria, agás indicación do interesado en sentido contrario dirixida ós Servicios Provinciais de Axudas Estructurais. A tramitación dos expedientes continuará desde o trámite no que se encontraban ó remate do exercicio anterior.
Disposición adicional
O incumprimento dalgún dos requisitos especificados nesta orde poderá dar lugar á perda total ou parcial das axudas, sen prexuízo das accións xudiciais que poidan devengar.
Disposición derradeira
Facúltase o director xeral de Producción Agropecuaria e Industrias Agroalimentarias para dicta-las normas precisas para a aplicación da presente orde.
A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 31 de xaneiro de de 1997.
Tomás Pérez Vidal
Conselleiro de Agricultura, Gandería e Montes
ANEXO I
Relación de cultivos e organismos nocivos
ANEXO I
1. Vide.
-Mera. Só nos casos de contar con equipamento e programa necesarios para o seguemento e evolución do fungo.
-Podremia gris.
-Avelaíña do acio. Seguimento de predios piloto onde se controlará o seu ciclo mediante trampas de feromonas, facendo conteos de posta e penetración.
-Excoriose. Admítense os tratamentos con arsenito sódico. No caso de usar este tipo de producto, a entidade agraria que faga a petición deberá poñerse en contacto co personal técnico da Consellería de Agricultura, Gandería e Montes, para a supervisión e seguimento da súa aplicación
-Acariose.
2. Froiteiras.
-Moteado. Só nos casos de contar con equipamento e programa necesarios para o seguimento e evolución do fungo.
-Piollo de San Xosé.
-Ácaros.
-Avermado.
-Minadores de follas.
-Pulgóns.
3. Patacas.
-Mera. Só nos casos de contar co equipamento e programa necesarios para o seguemento e evolución do fungo.
-Avelaíña. Farase un seguemento do seu ciclo mediante trampas para poder realizar un control racional e eficaz da praga.
-Vermes brancos.
-Vermes grises.
-Vermes de arame.
4. Millo.
-Vermes brancos.
-Vermes grises.
-Vermes de arame.
5. Praderías.
-Verme cortador, e típula. Só cando se realicen controis de seguimento do ciclo biolóxico en predios piloto, e a Consellería de Agricultura, Gandería e Montes, en vista do resultado dos conteos, así o aconselle.
-Labazas (Rumex sp.)
6. Hortícolas ó aire libre.
-Desinfección das plantas por inmersión antes da súa plantación.
-Tratamento de inverno do amorodo.
-Vermes brancos.
-Vermes grises.
-Vermes de arame.
-Mosca branca.
-Trips sp.
-Ácaros.
-Pulgóns
-Minadores de follas.
7. Ornamentais ó aire libre.
-Desinfección de material vexetal de reproducción.
-Mosca branca.
-Pulgóns.
-Trips sp.
-Vermes brancos.
-Vermes grises.
-Vermes de arame.
-Ácaros
8. Cultivo baixo cuberta.
-Desinfección de material vexetal de reproducción.
-Desinfección de solos. Admítese a aplicación de bromuro de metilo sempre e cando a faga unha empresa de tratamentos autorizada para tal fin, debendo presenta-lo contrato-factura de aplicación no momento de xustifica-la subvención.
-Mosca branca.
-Trips sp.
-Pulgóns.
-Minadores de follas.
-Ácaros.
ANEXO III
Campo Nome Tipo Largo
1 Nome-Agrup. Carácter 40 2 CIF-Agrupación Carácter 10 3 Nome-socio Carácter 40 4 DNI-socio Carácter 10 5 Domicilio Carácter 30 6 Municipio Carácter 30 7 Cód.-municipio Numérico 03 8 Cód.-provincia Numérico 02
Especificación dos campos:
1. Nome-Agrup.: nome completo da agrupación.
2. CIF-agrupación: número do CIF da agrupación.
3. Nome-socio: nome do socio (1º apelido, 2º apelido e nome propio, por este orde).
4. DNI-socio: oito dixitos do DNI do socio e maila letra que ten.
5. Domicilio: enderezo completo da explotación do socio.
6. Municipio: concello no que está a explotación do socio.
7. Cód.-municipio: código do concello (xúntase coa documentación).
8. Cód.-provincia: código da provincia (AC15, LU27, OUR32, PO36).
97-864
