O Pleno da Corporación municipal da Estrada, reunido en sesión extraordinaria o 1 de decembro de 1995, acordou a cesión á Comunidade Autónoma de Galicia dun terreo de 3.000 m, para a construcción dun Centro de Desenvolvemento Comarcal.
Conforme os artigos 17.1º da Lei 3/1985, do 12 de abril, do patrimonio da Comunidade Autónoma galega, e 34 do seu Regulamento aprobado polo Decreto 50/1989, do 9 de marzo, a adquisición pura e simple de bens a título gratuíto ou lucrativo requirirá Decreto do Consello da Xunta, por proposta da Consellería de Economía e Facenda. Así mesmo, os artigos 23.1º da mesma lei e 38.1º do Regulamento establecen que non se poderán adquirir bens ou dereitos a título lucrativo cando o valor dos gravames, cargas ou afeccións impostos sobre eles supere o seu valor intrínseco; aínda que non se considera carga, gravame ou afección os investimentos que teña que realiza-la Comunidade Autónoma para dá-lo destino de uso xeral ou servicio público da súa competencia que fixe o cedente ou doador.
Na súa virtude, de conformidade coa proposta da Consellería de Economía e Facenda, feita nos termos nos que o Concello da Estrada acordou a cesión, logo de deliberación do Consello da Xunta de Galicia na súa reunión do día trinta e un de outubro de mil novecentos noventa e seis,
DISPOÑO:
Artigo primeiro.-Acéptase a cesión gratuíta dun terreo de 3.000 m pertencente ó Concello da Estrada, denominado: Terrío de Lamas e Lagoa, composto pola leira nº 426-1 da concentración parcelaria de Matalobos-Toedo, e a rústica Lagoa, destinada a monte. Os lindes son: norte, Manuel Rodríguez García; sur, camiño; leste, Francisco Cajaraville Touceda e Manuel Rodríguez García; e oeste, estrada.
O inmoble descrito atópase inscrito no Rexistro da Propiedade da Estrada, ó tomo 605, libro 490, folio 166, inscrición 1ª, número 67.742.
Artigo segundo.-O inmoble cedido destinarase á construcción dun Centro de Desenvolvemento Comarcal na Estrada (Pontevedra).
Artigo terceiro.-A Consellería de Economía e Facenda, a través da Secretaría Xeral e do Patrimonio, procederá á formalización da cesión no correspondente documento público e á inscrición do ben no Rexistro da Propiedade a nome da Comunidade Autónoma.
Disposición derradeira
A Consellería de Economía e Facenda, a través da Secretaría Xeral e do Patrimonio, levará a cabo tódolos trámites necesarios para a efectividade do presente decreto.
Santiago de Compostela, trinta e un de outubro de mil novecentos noventa e seis.
Manuel Fraga Iribarne
Presidente
José Antonio Orza Fernández
Conselleiro de Economía e Facenda
96-8234